Kupereka Umboni Nyumba Na Nyumba

¹ “Anthu aluso m’njira zakusiyana-siyana za kumwaza Undimomwene, anadzatawira kuti basa ya kumwaza mphangwa nyumba na nyumba m’kuphatisira AURORA DO MILÉNIO (m’Cingerezi), m’nzidzi wathu uno ndi njira yadidi kakamwe ya kumwaza Undimomwene.” Mafala anewa a revista ya Torre de Vigia de Sião ya 1.° de Julho ya 1893 agomezera kufunika kwa utumiki wa nyumba na nyumba. Anthu a pa dziko yonsene yapantsi asaona kumwaza mphangwa kukhala cidzindikiro ca Mboni za Yahova. Kodi njira ineyi ya kumwaza mphangwa ikupitiriza kukhala yadidi, ngakhale kuli kwakunensa kakamwe kugumana anthu pa nyumba m’madziko anango?

² Ndi Kwamalemba Na Kwakufunika: Kumwaza mphangwa nyumba na nyumba ndi kwakubulukira m’malemba. Yezu apfunzisa anyakupfunza ace akukwana 70 towera kuenda awiri-awiri m’nyumba za anthu. (Luka 10:5-7) M’nzidzi wakucepa, Yezu mbadamala kufa, Biblya yalonga pya anyakupfunzace: “Ntsiku na ntsiku, ku templo na ku nyumba, iwo akhathimiza kubvekesa mphangwa zadidi.” (Mach. 5:42, Mphangwa Zadidi) Mpostolo Paulu apfunzisambo mwaphinga nyumba na nyumba.—Mach. 20:20.

³ Kumwaza mphangwa nyumba na nyumba kusapitiriza kukhala njira yadidi ya kumwaza mphangwa zadidi lero. Pyenepi pisatiphedza ‘kusaka’ anthu akuthema m’njira ya kulinganira. (Mat. 10:11) Kazinji kene anthu ali akukhurudzika kakamwe pa nyumba. Kulonga nawo nkhope na nkhope—kubva fala yawo, kuona makhaliro a nkhope zawo, na kuona pinaacitikira—kusatiphedza kudziwa pifuno pyawo na pinaadzudzumisa. Kazinji kene pyenepi pisatipasa mwai wadidi towera kuceza m’nzidzi uzinji.

⁴ Citani Macinjo Anu Ene: Mpostolo Paulu akhali dzololo towera kucita macinjo na “thangwi ya mphangwa zadidi.” (1 Akor. 9:23) Panango tingakwanise kucinja ndandanda wathu towera kumwaza mphangwa munagumanika anthu azinji pa nyumba, ninga kumala kwa ntsiku, kumala kwa sumana peno m’ntsiku za firiyadu. Koyani ndandanda wa nyumba zokhonda gumanika anthu, na yeserani kubwerera pontho pa ntsiku inango ya sumana peno pa nzidzi unango pa ntsiku ibodzibodzi.

⁵ Ngakhale anthu akukhala na ungumi wanyatwa angakwanise kucita khundu m’kumwaza mphangwa nyumba na nyumba. Panango tingakwanise kucita masasanyiro a kuenda nawo m’nyumba zokhonda nensa na kuacitisa kuphata basa mwakubverana na makhaliro awo. Mulongo unango wakuti ali na utenda wa kupuma asakwanisa kumwaza mphangwa pa nyumba ibodzi ene hafu ya nzidzi. Inde, akhala wakukomerwa tani pakumala kumwaza mphangwa pabodzi na nsoka!

⁶ Anthu azinji akulandana na mabira akupitiriza kugumanwa m’basa ya nyumba na nyumba. Mmwazi mphangwa mbodzi wamamuna acita odi na apangwa: “Pitani. Ndisadziwa kuti imwe ndiwe ani. Ndikhaphembera kwa Mulungu kuti atumize munthu towera andiphedze, na buluka penepo ndabva odi. Mulungu andibva na akutumani.” Maphindu awa anaoneka asapangiza kuti Yahova asapasa nkhombo njira ineyi ya kumwaza mphangwa. (Mat. 11:19) Khalani wakutonga towera kuona basa ya kumwaza mphangwa mokukhonda phonya ya nyumba na nyumba kukhala khundu yathu ya utumiki.

[Study Questions]

1. Kodi ndi mbvunzo upi unabuluka m’kulonga pya utumiki wa nyumba na nyumba, na thangwi yanji?

2. Kodi kumwaza mphangwa nyumba na nyumba kusagumanika m’malemba api?

3. Kodi ndi maphindu api mangasi a kumwaza mphangwa nyumba na nyumba?

4. Kodi tinacita tani kuti kumwaza mphangwa nyumba na nyumba kukhale kwakuphindulisa kakamwe?

5. Kodi anthu akukhala na ungumi wanyatwa anakwanisa tani kuphatanizwa m’basa ya nyumba na nyumba?

6. Thangwi yanji tisafunika kuona basa ya kumwaza mphangwa mokukhonda phonya ya nyumba na nyumba kukhala khundu yathu ya utumiki?