Pangizani Kutsalakana Kwanu Anango—M’kukhala Akukoma Ntima
1 “Mbuya ngwakufunika [peno ngwakukoma ntima].” (Sal. 145:8) Maseze ndi Ntongi Wankulu Wakudzulu na Pantsi, iye asatsalakana anthu akusowa ungwiro m’njira yadidi, yakutsalakana na yakulemedza. (Gen. 13:14; 19:18-21, 29) Tingakwanise kusasanyira maperekero athu umboni a mphangwa zadidi m’kusangizira Mulungu wathu wakukoma ntima. (Akol. 4:6) Pyenepi pisaphataniza pizinji kupiringana kukhala wadidi na wakulemedza m’kulonga kwathu.
2 Pa Nyumba Na Nyumba: Kodi tisafunika kucitanji tingafika pa nyumba ya munthu m’nzidzi okhonda thema peno angacimwana kulonga na ife na thangwi ya kupingizika na mabasa mazinji? Mphyadidi kudzindikira makhaliro a nzidzi unoyu m’kulonga mwacigwagwa kakamwe peno kumpanga kuti munabwerera m’nzidzi unango. M’njira yadidi tinacalira kukakamiza anthu kutawira mabukhu khala iwo asaakhonda. Kukhala na citsalakano na anango kunadzaticitisambo kutsalakana mwadidi pinthu pyawo, ninga pa kufunga misuwo ya cintalo na ya nyumba pabodzi na kupfunzisa anapiana athu kucita cibodzibodzi. Tisafunika kucita pyonsene kuti mabukhu anaikha ife pansuwo akhonde oneka. Inde, kukoma ntima kunadzatikulumiza kutsalakana anango ninga munafuna ife kuti iwo atitsalakanembo.—Luka 6:31.
3 M’basa Ya M’nseu: Munacita ife basa ya m’nseu, tingakwanise kupangiza cilemedzo m’kukhonda kufunga njira na m’kukhonda kugumanyikana kutsogolo kwa malonda. Kudzindikira makhaliro a anango kunadzaticitisa kusaka kulonga na ale akuti ali na nzidzi pang’ono mbuto mwa kulonga na ale akuti asaoneka mwapakweca kuti nkhabe nzidzi. M’midzidzi inango, tingakwanise kulonga mwakugaluza towera ale anaceza na ife abve. Ngakhale tenepo, tisafunika kugaluza mwakuthema, tayu mwakubveka na anthu onsene.—Mat. 12:19.
4 M’kupereka Umboni Na Ntokodzi: Kukhala na citsalakano na anango kunadzatikulumiza kupereka umboni na ntokodzi pa mbuto yokhonda cita dzumbi maningi. Kudzindikirisika mwakucimbiza na kulonga pinafuna ife kusapangiza kukhala munthu wakulangwa. Kuikha ntokodzi duzi na mulomo pa kulonga na kubulusa fala yakuthema kunadzatiphedza kucitisa anango kutawira makani Auzimu akuwangisa. (1 Akor. 14:8, 9) M’kukhala adidi, akutsalakana na akulemedza m’njira zakusiyana-siyana, tikusangizira Yahova Mulungu wathu wakukoma ntima.