Pangizani Kutsalakana Kwanu Anango—M’kuasimba

¹ Kusimba kwandimomwene kusawangisa anthu, kusaakulumiza kucita pinthu, na kusaabweresera kutsanzaya. Amwazi mphangwa azinji afika pakuona kuti mafala acigwagwa a kusimba kwandimomwene kazinji kene asacitisa anthu kutibvesera m’utumiki. Kodi tinakwanisa tani kusimba anthu munasaka ife kugawana nawo mphangwa zadidi?

² Khalani Wakuonesesa: Wakulemedzeka Yezu Kristu aona mabasa adidi a mipingo minomwe ya ku Asia Menor. (Apok. 2:2, 3, 13, 19; 3:8) M’njira ibodzibodzi, kutsalakana mwandimomwene anthu anagumanikana na ife m’utumiki kunadzatikulumiza kusaka miyai ya kuasimba. Mwacitsanzo, cintalo cakucena, nyakubala anapangiza kufuna anapiana ace, peno kumwetula kwauxamwali kwa mwanaciro nyumba na kumwanyika, pyonsene pisatipasa miyai ya kusimba. Kodi muli dzololo kuti muonesese na kubanza miyai ineyi?

³ Khalani Mbveseri Wadidi: Munamwaza ife mphangwa kwa anango, aphembeni kuti alonge okhene m’kuacita mabvunzo akuthema. Alemedzeni m’kubvesera mwadidi pinalonga iwo. (Arom. 12:10) Panango, munadzaona cinthu cakuti mungakwanise kunsimba na kutoma uperekero umboni pa ntsonga yakudziwika na imwe monsene idakhazikiswa.

⁴ Phatisirani Nzeru: Kodi tisafunika kucitanji khala mwanaciro nyumba alonga pinthu pyakuti nee pisabverana na undimomwene wa Biblya? Mbuto mwa kupokanya mwanaciro nyumba perekani takhuta ku pidalonga iye, mbumupitiriza na mafala ninga awa: “Ndisaona kuti musafunadi kudziwa ntsonga iyi.” (Akol. 4:6) Ngakhale munthu ndi wakupokanya, tingakwanise kunsimba kazinji kene na thangwi ya kufunisisa kwace kudziwa ntsonga ineyi. Njira ineyi yakucita pinthu mwakukhurudzika ingakwanise kuthowesa ale anasaka mwakuwanga kupingiza mphangwa zadidi.—Mis. 25:15.

⁵ Towera kukhala kwakuwangisa, kusimba kwathu kusafunika kukhale kwandimomwene. Kuphatisira njira ineyi yakuwangisa ya kulonga kusalemedza Yahova na kungakwanise kucitisa anango kubvesera mphangwa za Umambo.