Kuwangisana Unango Na Nzace Mu Utumiki
1 Ife tonsene tisakomerwa na kutambira mafala a ciwangiso ‘pa ndzidzi unafunikira iwo.’ (Mis. 25:11) Munaphata ife basa na anango mu utumiki, kodi tinakwanisa tani kukhala na cinyindiro cakuti makani athu ndi akuwangisa?
2 Makani Akuwangisa: Ndi pyakuwangisa tani kuphataniza ntsonga zauzimu m’makani athu munacita ife basa ya kumwaza mphangwa! (Sal. 37:30) Tingakwanise kulonga pya nkhani yathu peno pyakugumana napyo pidakhala na ife cincino m’basa ya m’munda. (Mach. 15:3) Kodi tapfunza ntsonga yakukomeresa pa kuleri kwathu tekhene Biblya, marevista mapswa, peno pa misonkhano ya mpingo? Pontho tingakwanise kulonga ntsonga zidalongwa pa nkhani yapakweca idabva ife cincino pa Nyumba ya Umambo.
3 Ife tingakwanise kufewa manungo mwanaciro nyumba angacita mbvunzo wakuti ife nkhabe kwanisa kuutawira. Pinadzakhala pyakuphindulisa kwa ife kubvunga mphindi zingasi tingabuluka panyumba ineyi towera kudinga na nzathu kuti tinatawira tani mbvunzo unoyu ungacitwa pontho kutsogolo, panango mu kudinga bukhu ya Raciocínios. Khala takomerwa na maperekero umboni a nzathu, mafala a kusimba kwandimomwene angakwanise kupereka ciwangiso cadidi.
4 Tomani Ndimwe: Kodi pana anthu mu nsoka wathu wa pfunziro ya bukhu akuti tasiya kale kuphata nawo basa? Kuaphemba kuti atiperekere mu utumiki kungakwanise kucitisa ‘cibalangazo’ peno ciwangiso kwa unango na nzace. (Arom. 1:12) Apainiya a ndzidzi onsene na akuphedza asakomerwa angakhala na anthu akuphata nawo basa, makamaka namacibese kakamwe peno namaulo, mu ndzidzi wakuti ndi amwazi mphangwa akucepa anaphata basa mu utumiki. Ife tingakwanise kuphedza apainiya mu kuphata nawo basa mu utumiki. Kodi pana m’mwazi mphangwa wakuti ungumi wace usancimwanisa kucita pikhafuna iye mu utumiki? Kucita masasanyiro akuti m’mwazi mphangwa unoyu atiperekere, panango ku pfunziro ya Biblya, kungakwanise kukhala kwakuphindulisa.—Mis. 27:17.
5 Ndzidzi onsene kusimba na kulonga mafala akupereka takhuta kusawangisa, ngakhale m’pinthu ping’ono. Tisafunika kukumbuka pyenepi munaphata ife basa na anango mu utumiki, nakuti cifuno cathu ndi cakupitiriza ‘kuwangisana unango na nzace.’—1 Ates. 5:11, Mphangwa Zadidi.