Citani Pizinji Kupiringana Kuperekera Ndzanu Basi
1. Tinasangizira tani maonero a mpostolo Paulu mu ndzidzi unaphata ife na anango mu utumiki?
1 Mpostolo Paulu akhaona midzidzi ikhakhala iye pabodzi na anyakukhulupira andzace ninga miyai toera ‘kuwangisana.’ (Arom. 1:12) Mungaphata basa pabodzi na m’mwazi mphangwa ndzanu mu utumiki, musaphatisira ndzidzi unoyu toera kuwangisa ndzanu? Mbuto mwakuperekera ndzanu mbamukhonda kulonga, ndiye tani kulonga pinthu pinakuphedzani toera kukhala m’mwazi mphangwa wakuphindulisa?
2. Tinacitanji toera kuthimizira cinyindiro ca ndzathu anabuluka na ife mu utumiki? Thangwi yanji pyenepi ndi pyakufunika?
2 Kuthimizira Cinyindiro: Amwazi mphangwa anango nkhabe cinyindiro, pyenepi pisapangizika pa maonekero a nkhope zawo peno malongero awo. Ife tinakwanisa kuthimizira cinyindiro cawo mu kuasimba na ntima onsene. Ndi zipi njira zinango toera kuthimizira cinyindiro? Muyang’aniri wa cisa unango mwakusudzuka asacedza na ndzace anabuluka na iye mu utumiki pya kugopa kwace, pontho kuti asaphembera kazinji kene toera kukunda mabvero anewa. M’bale unango alonga tenepa thangwi ya pinamphedza toera kupangiza cinyindiro: “Ndisatoma na kumwetulira. Midzidzi inango ndisacita phembero toera kupangiza kumwetulira kweneku.” Ciripo cinakuphedzani toera kupangiza cinyindiro mu utumiki? Cedzani pyenepi na ndzanu anabuluka na imwe mu utumiki.
3. Ndi pinthu pipi pyakuti tinakwanisa kugawana na ndzathu toera kumphedza kukhala waluso mu utumiki?
3 Gawanani Maluso Akupfundzisa: Musaona kuti mafala akutoma, mbvundzo, peno cinthu cidacitika pacisa cisakuphedzani toera kutomesa makani? Musagumana maphindu adidi kubulukira mu kuthimizira mafala anu ene pa njira za maperekero aumboni? Panganimbo ndzanu. (Mis. 27:17) Paulendo wakubwereza, mu ndzidzi unaenda imwe munakwanisa kucedza pya cifuniro ca ulendo wanu, pontho kuti munacikwanirisa tani. Pakumala kucitisa pfundziro ya Bhibhlya, munakwanisa kufokotoza thangwi yanji mwaphatisira ntsonga, lemba, peno luso yakupfundzisa toera kuphedza nyakupfundza.
4. Thangwi yanji tisafunika kukhala na cifuno cakuphedza Akristu andzathu?
4 Akristu a mu pyaka dzana yakutoma nee akhali na cifuno cakuphedza anyakukhonda khulupira basi. Iwo akhaonambo kuti akhafunika kuwangisana na kupasana cipapo unango na ndzace. (Mach. 11:23; 15:32) Mpostolo Paulu apfundzisa mphale Timoti, buluka penepo amuwangisa toera kudziwisa anango pinthu pidapfundziswa iye. (2 Tim. 2:2) Tingacita pyadidi kwa Akristu andzathu mu ndzidzi unaenda ife mu utumiki, nee tisathimizira kutsandzaya kwawo na maluso awo basi tayu, mbwenye tisakomeresambo Babathu wakudzulu.—Aheb. 13:15, 16.