Okhonda Gopa Mbwenye Antendere
1 Anthu azinji anamwazira ife mphangwa zadidi asatawiradi kuti ali akuphonyana na undimomwene wa Biblya. Munamwaza ife mphangwa zadidi mokhonda gopa, tisafunikambo ‘kukhala a ntendere na anthu onsene’ mbiticalira kupindisa anthu mwakusowa thangwi. (Arom. 12:18; Mach. 4:29) Kodi tinakwanisa tani kukhala okhonda gopa mbwenye antendere munamwaza ife mphangwa za Umambo?
2 Kuona Makhundu Akubverana: Munthu wantendere asacalira kupokanyisana. Kupikisana mwakusowa thangwi na mwanaciro nyumba wakuphatisisa pikhulupiro nee kunadzakhala kwakumphedza kutawira mphangwa zathu mwaufulu tayu. Iye angalonga pinthu mwakudodomeka, panango mwaluso tingakwanise kutomesa ntsonga yakutibveranisa. M’kugomezera pinthu pinakhulupira ife tonsene, tingakwanise kubulusa manyerezero akuipa na kutundusa ntima wace.
3 Kodi tingasiya mwanaciro nyumba na maonero akudodomeka, pisabveka kuti tiri kubverana naye peno tikululupisa undimomwene? Nkhabe. Basa yathu ninga atumiki Acikristu si kupokanya tayu manyerezero onsene akudodomeka anathimbana na ife, mbwenye ndi kumwaza mphangwa zadidi za Umambo wa Mulungu. (Mat. 24:14) Mbuto mwa kusumula maonero akudodomeka analongwa, tingakwanise kuona manyerezero anewa ninga mwai wa kudziwa pinanyerezera munthu m’ntima.—Mis. 16:23.
4 Pangizani Cilemedzo: Iripo midzidzi inafunika ife kukhala okhonda gopa na acipapo pa kupokanya pipfunziso pyakuipa. Natenepa, ninga anthu a ntendere, tisacalira kusingirira pabodzi na kulonga mafala akupwaza ale anakhulupira na anapfunzisa pyakudodomeka. Nkhaliro wa kukuzika usathawisa anthu anango, mbwenye kucepeseka na nkhaliro wa udidi usafungula manyerezero a kufuna undimomwene. Kupangiza cilemedzo kwa anyakubvesera athu na kukoya kuthema kwa pikhulupiro pyawo, kungaacitise kukhala okhonda nensa kutawira mphangwa zathu.
5 Mpostolo Paulu akhadziwa pikhulupiro pya akhamwazira iye mphangwa na ayesera kuapangiza mphangwa zadidi m’njira yakuti mbadakwanisa kutundusa mitima yawo. Mwakufuna ‘kuli anthu onsene achitikambo munthu wa onsene towera kupulumusa onsene.’ (1 Akor. 9:22) Tingakwanise kucita cibodzibodzi m’kukhala antendere munamwaza ife mphangwa zadidi mokhonda gopa.