Citani Maulendo Akubwerezera Kwa Ale Anapangiza Kufuna

¹ Azinji mwa ife ali m’undimomwene lero thangwi munthu unango aona kutawira kwathu kwadidi mphangwa za Umambo na mwakupirira abwerera—panango m’maulendo mazinji—towera kusakulira kufuna kweneku. M’njira ibodzibodzi ife tisafunika kucita maulendo akubwerezera mwacidikhodikho kwa onsene anapangiza kufuna kung’ono peno kukulu. Mwandimomwene, kucita maulendo akubwerezera kwaphatanizwa m’basa yathu ya ‘kucita anyakupfundza.’—Mat. 28:19, 20, Mphangwa Zadidi.

² Kudzindikira Kufuna: Ngakhale kuti munthu nee atawira bukhu, maonekero a nkhope yace, malongero, peno kusankhula kwa mafala kungapangize kufuna kung’ono peno kukulu ku mphangwa za Umambo. M’njira zenezi tingakwanise kucita maulendo akubwerezera. M’bale unango acitira munthu maulendo akubwerezera masumana maxanu akutowererana mbakhonda kugawira bukhu. Pa ulendo wacitanthatu, munthu atawira bukhu, na pakumalisira yatomeswa pfunziro ya Biblya.

³ Mungadzindikira kufuna, citani ulendo wakubwerezera mwakucimbiza, panango pakupita ntsiku zakucepa. Lekani kupasa “demonyo [peno nyamalwa]” mwai wa kubulusa pidadzuwalwa m’ntima mwa munthu. (Mat. 13:19) Citani pyonsene towera kukwanirisa mafala anu khala mwacita masasanyiro a kucita ulendo wakubwerezera pa nzidzi wakuthonyeka.—Mat. 5:37.

⁴ Utumiki Wa M’nseu: Kodi musawangisira kusakulira kufuna kunagumana imwe m’utumiki wa m’nseu peno umboni wantsusukano? Cifupi na kumala kwa makani anu, mungakwanise kulonga: “Ndakomerwa kuceza na imwe. Kodi ndinakwanisa kukugumanani kupi kuti ticeze pontho?” Pingakhala pyakuthema, amwazi mphangwa anango asapasa munthu wakufuna numero yawo ya ntokodzi peno asaphemba kupasana. Anthu angakuonani m’utumiki wa m’nseu pa mbuto ibodzi ene mokhonda phonya, iwo nee ananyinyirika kukupasani numero yawo ya ntokodzi tayu peno kunakhala iwo. Maseze iwo akhonde kukupangani kuti munaonana nawo tani pontho, imwe mungakwanise kupitiriza kuyesera-yesera towera kuthimizira kufuna kwawo pa ulendo unafuna imwe kudzagumanikana nawo pontho m’njira.

⁵ Munaona ife pidadzwala ife na kuthirira mbipikula, pyenepi pisatikomeresa. M’njira ibodzibodzi, tinakwanisa kukomerwa m’kucita maulendo akubwerezera na kuphedza anthu kukula mwauzimu. (1 Akor. 3:6) Citani kuti maulendo akubwerezera kwa ale onsene anapangiza kufuna kung’ono peno kukulu kukhale cifuno canu.