Nsonkhano Wa Gawo Wa Mboni Za Yahova Wa 2007 Wakuti “Towererani Kristu!”
1 Mose apereka citsogolero kwa Aisraele onsene na afambi akhali m’mizinda kuti agumanyikane pabodzi pakupita piaka pinomwe pyonsene towera kuleri mwambo kwa iwo. Kodi na cifuniro canji? “Towera kuti abve mbafundza.” (Deut. 31:10-12) Yahova aona kufunika kwa mbumba yace kugumanyikana m’misoka mikulu. Mwakukhonda dembuka, mbumba ya Yahova inadzagumanyikana pontho m’ntsiku zitatu za Nsonkhano wa Gawo wakuti “Towererani Kristu!”.
2 Kodi mwatoma kukhunganyika? Kodi musafunika kuphemba ntsiku yakupuma kwa nzungu wanu wa basa? Kodi imwe munakwanisa kuphedza anyakupfunza anu a Biblya peno acibale anu okhonda khulupira towera kugumanika pabodzi na imwe pa nsonkhano? Kodi alipo anthu anango pa mpingo panu anafuna ciphedzo towera kugumanika pa nsonkhano? Kodi imwe mukukhunganya towera kugumanika pa nsonkhano wakusiyana na unafuna kuenda mpingo wanu? Kodi munadzafuna mbuto yakufikira? Mphangwa zakutowerera zinadzakuphedzani towera kukhunganyika.
3 Gumanikani Pa Ntsiku Zonsene Zitatu: Yahova asapasa anthu ace cakudya cauzimu cakuinjipa. (Iza. 25:6) Pyenepi pisaphataniza phwando yauzimu inacitwa m’misonkhano yathu ya caka na caka. Pyaoneka kuti cilengeso ca anyakubvesera pa ntsiku ya Cixanu ndi cakucepa kakamwe kupiringana ntsiku zinango. Citani kuti cikhale cifuno canu kugumanika m’ntsiku zonsene zitatu zakutsanzayisa za nsonkhano udatisasanyira gulu ya Yahova! Khala imwe musafunika kuphemba ntsiku yakupuma kwa nzungu wanu wa basa longani pyenepi m’phembero. Buluka penepo, ‘kwatani [peno khalani na] chipapo’ towera kulonga na nzungu wanu wa basa mwakukhonda dembuka ntsiku ya nsonkhano ingamala kudziwiswa. (1 Ates. 2:2; Neh. 2:4, 5) Pinakhala pyakuphedza kakamwe kufokotoza kwa iye kuti nsonkhano wa pacaka ndi nkhundu ya ulambiri wanu. Kucita pyenepi nakweru kunacitisa nzungu wanu kucita masasanyiro towera kutawira phembo yanu mwakukhonda nensa.
4 Khunganyani Anyakupfunza A Biblya Na Banja Yanu: Mphyakukomeresa tani kukhala pabodzi na anyakupfunza a Biblya anu pa nsonkhano, mbabva kufuna kwakupisirwa kwa abale athu Acikristu “mu nsonkhano wa mbumba yonsene”! (Sal. 22:25) Apangeni mwadidi mwanyapantsi towera akwanise kupamba nzidzi na kugumanika pa nsonkhano. Apangeni mathangwi anakomerwa na imwe m’kugumanika pa misonkhano. Munakwanisa kukhunganya anyakupfunza ku pinafunika iwo kudikhira m’kuapangiza mavidiyu athu akuti ali na pyakucitika pya misonkhano idacitwa kale, makamaka vidiyu yakuti Unidos Pelo Ensino Divino peno kuapangiza misolo ya A Sentinela inagomezera nsonkhano. Citani kuti piwalo pya banja pyokhonda khulupira pidziwembo masasanyiro anu. Panango anakwanisa kucita masasanyiro towera kuona drama peno kugumanika pa ntsiku ibodzi basi ya nsonkhano pabodzi na imwe.
5 Phedzani Abale Anu Na Alongo: Mpostolo Paulu acenjeza Akristu ale akuti akhali akupfuma m’njira yakumanungo towera “achite pinthu pya udidi, apfume na kupichita, apasembo anthu anango, nee kumana.” (1 Tim. 6:17, 18) Tinakwanisa kupangiza nzimu wakupasa mwakudzala manja udalonga Paulu tingadinga nkhaliro wa anyakukalamba, anyakudwala, ale ali m’basa ya nzidzi onsene, nyakubala anakuza ekha ana na panango anango m’mpingo akuti angafune ciphedzo towera kugumanika pa nsonkhano. Kutsalakana pyakufunika pya anthu anewa pakutoma ndi basa ya acibale ali m’undimomwene, mbwenye akulu a mpingo na anango anakwanisa kupangiza nzeru pa kupereka ciphedzo cadidi kwa ale anacifunika.—Agal. 6:10; 1 Tim. 5:4.
6 Khala munthu unango m’mpingo asafuna ciphedzo m’kugumana mbuto yakufikira, Nsoka Wakuyang’anira Basa usafunika kutonga khala mmwazi mphangwa athema kucita phembo yace. Ale akuti nkhabe thema asafunika kucita masasanyiro awo ene towera kugumana mbuto yakufikira, kuphataniza adabuluswa mpingo.—1 Akor. 5:11.
7 Ngakhale munthu pa ekha, banja, peno mpingo, tomani kucita masasanyiro akugumanika pa nsonkhano mwakukhonda dembuka. Mwakubverana na makhaliro a pacisa, mpingo ubodzi na ubodzi, banja, peno mmwazi mphangwa asafunika kunyerezera m’phembero pinthu pyakuti pingakwanise kucitwa towera kukhonda kuluza nsonkhano. Abale anango angakwanise kutoma kukoya kobiri pa nthanda ibodzi na ibodzi towera akwanise kulipa miotokala. Mipingo ingakwanisembo kucita masasanyiro towera kulipa maxibombo peno motokala towera kukwata abale kuenda ku nsonkhano. Anango angakwanise kubverana towera kufamba pabodzi kuenda ku nsonkhano m’misoka ya banja, m’kutowerera citsanzo ca Atumiki a Yahova akale.—Luka 2:41-44.
8 Towezani Masasanyiro: Munafika ife pa mbuto ya nsonkhano, pisaonekeratu kuti mabasa mazinji acitwa m’kukhunganyira kufika kwathu. Abale akufuna anatumikira ninga akalindi asatimwanyika, asatipasa ndandanda, na kutiphedza m’kutipangiza mbuto yakukhala. Abale na alongo amala kucenesa kale pinthu na kusasanya platifomu yakubalika. Mabasa akufunika amalambo kucitwa kale towera kukhunganya pinthu pya ndandanda, masasanyiro a mbuto yakufikira na kutsalakana unyomonyomo uzinji.
9 Pa nsonkhano ubodzi na ubodzi, anthu azinji acita mabasa m’nthanda zizinji towera kucita masasanyiro akufunika, na mabanja awo acitambo khundu m’kuphedza kuapasa nzidzi towera kutsalakana pinthu pyenepi pyakufunika. Kodi tinapereka takhuta tayu kuwangisira konsene kudacitwa ku phindu yathu? Tingakwanise kupangiza takhuta wathu m’kubvera pitsogolero pyonsene pinagumanika m’nsolo uno na pitsogolero pyakuthimizirika pyakuti tingatambire nsonkhano wathu mbusati kutoma. (Aheb. 13:17) Kufuna kubvera kwa munthu m’bodzi na m’bodzi kungacitise kuti pinthu pyonsene “pichitwe mwakuthema pontho mwakundendemera.”—1 Akor. 14:40, Chiverano Chachinchino.
10 Na thangwi ya ‘kuona kuti ntsiku iri duzi,’ kugumanyikana kwa mbumba yonsene ya Mulungu ndi kwakufunika kakamwe. (Aheb. 10:25, Mphangwa Zadidi) Pa misonkhano yathu Yacikristu, nsoka wa mbandazi wakukhulupirika na wanzeru usatipasa mphangwa towera kutiphedza ‘kucita [kukwanirisa] mafala onsene” anafuna Yahova kuti tiatowerere. (Deut. 31:12) Tomani cincino kucita masasanyiro towera kugumanika pa ntsiku zitatu za Nsonkhano wa Gawo wakuti “Towererani Kristu!” na phindulani tenepa na pipfunziso pyonsene pyauzimu na kutsanzaya na ubale!
[Study Questions]
1, 2. (a) Kodi Mose awangisa tani Aisraele towera kuphindula m’kusonkhana pabodzi? (b) Kodi ndi kukhunganya kupi kunafunika ife kutoma kucita cincino?
3. (a) Kodi ndi kukwaniriswa kupi kwa Izaiya 25:6 kunacitika lero? (b) Kodi ndi ninji pidaoneka thangwi ya anyakubvesera pa ntsiku Yacixanu ya nsonkhano, na tisafunika kucitanji?
4. Kodi tinakwanisa tani kukhunganya anyakupfunza athu a Biblya na piwalo pya banja pyokhonda khulupira towera kugumanika pa nsonkhano?
5, 6. (a) Kodi tinakwanisa tani kupangiza nzimu wakupasa mwakudzala manja udatcululwa pa 1 Timoti 6:18? (b) Kodi ndi masasanyiro api adacitwa towera kuphedza anthu akuti angafune ciphedzo m’kugumana mbuto zakufikira?
7. Kodi tisafunika kucitanji towera kugumanika pa nsonkhano?
8, 9. (a) Kodi ndi masasanyiro api adacitirwa ife mbatisati kufika pa mbuto ya nsonkhano? (b) Kodi tinapangiza tani kupereka takhuta ku basa yonsene idacitwa ku phindu yathu? (Lerini Ahebere 13:17.)
10. (a) Thangwi yanji kugumanyikana kwa mbumba ya Yahova ndi kwakufunika kakamwe m’nzidzi wathu? (b) Kodi m’bodzi na m’bodzi wa ife asafunika kucitanji cincino?
Nzidzi Wa Ndandanda
[Caption on page 3]
Cixanu na Sabudu
8:20 - 16:05
Dimingu
8:20 - 15:10