Misonkhano Yathu ya Gawo Isapereka Umboni Wamphambvu ku Undimomwene
1. Maphwando a caka na caka akhapasa mwai Aisraele toera kunyerezera na kucedza pinthu pipi pyakufunika pya undimomwene wauzimu?
1 Aisraele akale akhagumanyikana katatu pa caka toera kukumbuka maphwando a caka na caka. Ngakhale kuti basi ene amuna ndiwo akhafunika kugumanika ku maphwando anewa, kazinji kene mabanja onsene akhaenda ku Yerusalemu toera kugumanikambo pa misonkhano ineyi yakutsandzayisa. (Deut. 16:15, 16) Maphwando anewa akhapasa mwai Aisraele toera kunyerezera mwacidikhodikho na kucedza pinthu pyakufunika pya undimomwene wauzimu. Ndi pinthu pipi pingasi pya undimomwene unoyu? Cakutoma ndi cakuti Yahova ndi wakupasa mwakudzala manja, Nyakupasa waufuni. (Deut. 15:4, 5) Caciwiri ndi cakuti iye anakwaniswa kunyindirwa toera kugumana citsogolero na citsidzikizo. (Deut. 32:9, 10) Aisraele mbadakwanisambo kunyerezera kuti ninga mbumba inadziwika na dzina ya Yahova, akhafunika kupangiza njira zaulungami wa Yahova mu umaso wawo. (Deut. 7:6, 11) Lero, misonkhano yathu ya gawo isatiphindulisambo mu njira ibodzi ene.
2. Programu ya nsonkhano wa gawo inadzapereka tani ceza ku undimomwene?
2 Programu Isapereka Ceza ku Undimomwene: Pa misonkhano yathu ya gawo, tisakhala na nkhani, madrama, pipangizo, mibvundzo na matawiro akuti asatiphedza kubvesesa na kuphatisira mwadidi undimomwene wa Bhibhlya. (Jwau 17:17, Tradução do Novo Mundo) Mpaka lero, mabasa mazinji akucitwa toera kukhunganya nsonkhano wa gawo unafuna kudza. Gulu ya Yahova ikukhunganya programu inalonga makamaka thangwi ya pyakufuna pya basa ya m’munda ya dziko yonsene yapantsi. (Mat. 24:45-47, Mphangwa Zadidi) Kodi musafunisisa kuona na kubva pinthu pinafuna kudzapangizwa?
3. Tisafunika kucitanji toera kuphindula na programu ya nsonkhano?
3 Mwandimomwene, ife tinadzaphindula kakamwe tingagumanika na kubvesera mwacidikhodikho programu yonsene ya ntsiku zitatu. Khala mudzati kucita masasanyiro, longani na patrau wanu kuti akupaseni ndzidzi toera kuenda ku nsonkhano. Citani masasanyiro toera kugona na kweru masiku onsene a nsonkhano, pyenepi pinakuphedzani kukhonda odzira nkati mwa programu. Azinji asaona kuti kuyang’anisa nyakucita nkhani na kulemba mwacigwagwa pinthu pinadzafuna iwo kukumbukira kusaaphedza kubvesera. Lekani kutawirisa kuti ntokodzi wanu wa m’manja peno cinthu cinango kukudzudzumisani peno kudzudzumisa anango. Calirani kulongalonga, kulemba mphangwa mu ntokodzi wa m’manja, kudya peno kufamba-famba nkati mwa programu.
4. Anyakubala anaphedza tani anawo toera kuphindula nkati mwa nsonkhano wa gawo?
4 Mu pyaka pyacinomwe, pikhagumanyikana mabanja Aisraele toera kubvesera Mwambo ukhalerwi pa Maphwando a m’Misasa, akhaendambo pabodzi na anawo ang’ono ‘toera abve na kupfundza.’ (Deut. 31:12) Ndi pyakutsandzayisa tani kuona mabanja kukhala pabodzi pene nkati mwa programu ya nsonkhano wa gawo, anapiana mbakabvesera mwakupfulika nee kuodzira! Thangwi yanji nkhabe kuphatisira maulo a ntsiku ibodzi na ibodzi ya nsonkhano toera kuona mphangwa zidalemba imwe na kucedza pabodzi ntsonga zidakukomerani mu programu? “Kusowa nzeru nkhwa ana ang’ono,” natenepa pa ndzidzi wakupuma wakumasikati peno pa mbuto idafikira imwe mphyadidi kuti anyakubala aonere anawo, kuphatanizambo ale akuti ndi athunga pang’ono, mbuto mwa kuasiya kwene basi.—Mis. 22:15; 29:15.
5. Kodi makhaliro athu adidi tingagumanika pa oteli anadzalemedzesa tani undimomwene?
5 Makhaliro Athu Adidi Asalemedzesa Undimomwene: Makhaliro athu adidi mu ndzidzi unagumanika ife pa cisa ca nsonkhano asalemedzesa undimomwene. (Tito 2:10) Anyabasa a pa oteli asaona khala nsoka wa anthu usatoweza miyambo ya oteli, khala ndi akupirira peno asalonga mwacilemedzo na anyabasa. (Akol. 4:6) Mu ndzidzi wakuti aimiriri a ofesi ya filiali akhacita masasanyiro pa oteli caka cidamala, muyang’aniri wacikazi wa anyakugulisa aapanga: “Ife tisafuna anthu anu kufikira pa oteli yathu thangwi iwo ndi anthu adidi. Iwo ndi anthu acilemedzo na akukoma ntima, ndzidzi onsene asalemedza anyabasa athu na asatsalakana mbuto zathu mwacilemedzo.”
6. Tinalemedzesa tani undimomwene kubulukira ku mabvaliro athu tinagumanika pa cisa ca nsonkhano wa gawo?
6 Tingabvala karaxa yathu ya nsonkhano wa gawo, nee pisabvekesa basi ene nsonkhano na kucitisa anango toera kutidzindikira mbwenye kusaperekambo umboni kwa ale anationa. Anthu a pa cisa ca nsonkhano wa gawo anadzaona kuti ale adabvala karaxa ya nsonkhano abvala mwadidi na mwakulemedzeka, tayu kubvala mwaphwazo peno mabvaliro akudzolowereka a dziko anacitisa anango kukhala na manyerezero akuipa. (1 Tim. 2:9, 10) Natenepa, tisafunika kutsalakana mabvaliro na makhunganyikiro athu tingagumanika pa cisa ca nsonkhano wa gawo, kuphataniza pa ndzidzi unafika ife kwene pa oteli. Kufika pa oteli mudabvala kabudula na kamizeti nee pisapangiza cilemedzo. Ngakhale kuti nsonkhano wa gawo ukucitwa padambo, nguwo zathu zisafunika kukhala zakulemedzeka. Khala tisafuna cinja nguwo pakumala kwa programu toera kuenda ku restauranti peno ku nsika, tisafunika kukumbuka kuti ticiri pa nsonkhano, pontho nee tisafunika kubvala mu njira yakukhonda lemedzeka.
7. Ndi njira ipi ibodzi toera kutsandzaya na kuphatana kwathu kwa Cikristu nkati mwa nsonkhano wa gawo?
7 Pa maphwando a caka na caka, Aisraele akhatsandzaya kucedza na alambiri andzawo akhabuluka ku makhundu anango a dzindza ya Israele, na ale akhabuluka ku madziko anango, pyenepi pikhaacitisa kukhala akuphatana. (Mach. 2:1, 5) Nkati mwa misonkhano ya gawo ubale wathu Wacikristu usapangizika pakweca. Makhaliro anewa akutsandzayisa a paradizu yathu yauzimu kazinji kene asatundusa anyakuona. (Sal. 133:1) Mbuto mwakusiya mbuto ya nsonkhano pa ndzidzi wakudya toera kusaka cakudya, mphyadidi kakamwe kukwata cakudya cathu mbatisaka miyai toera kudziwa na kucedza na abale pabodzi na alongo ale ali cifupi na ife!
8. Khala makhaliro athu asatawirisa, ndi mathangwi api alipo toera kuperekeka pa nsonkhano?
8 Kazinji kene anyakuona asatunduswa na makhunganyikiro adidi na kubverana kwathu pa misonkhano ya gawo, makamaka angadziwa kuti mabasa onsene asacitwa na anthu akuperekeka. Kodi muli dzololo toera ‘kuperekeka mwekhene’ toera kuphata basa pa nsonkhano wa gawo? (Sal. 110:3, NM) Kazinji kene anthu onsene pa banja asaperekeka toera kuphata basa ninga njira yakupfundzisa anawo toera kuphedza anango. Khala imwe muli na manyadzo, kuphata basa pa nsonkhano ndi njira yadidi toera kudziwana na anango. Mulongo m’bodzi alonga: “Kusiyapo acibale anga na axamwali anga angasi, nee ndikhadziwana na azinji pa nsonkhano. Mbwenye mu ndzidzi udaphedza ine kucenesa mbuto ya nsonkhano, ndadziwana na abale pabodzi na alongo azinji. Ndatsandzaya kakamwe!” Kuthimizira nsoka wa axamwali athu mu kuphedza mabasa pa nsonkhano wa gawo kunadzabweresa kutsandzaya kukulu. (2 Akor. 6:12, 13) Khala cipo mudzati kuperekeka, longani na akulu a mpingo kuti munakwanisa tani kukhala wakuthema toera kuphedza.
9. Tinadzacemera tani anango toera kugumanika pa nsonkhano wa gawo?
9 Cemerani Anango toera Kubva Undimomwene: Ninga mu pyaka pya nduli, masumana matatu mbudzati kufika nsonkhano wathu wa gawo, tinadzakhala na kampanya yakucemera anango toera kugumanika pa nsonkhano. Mipingo inadzafuna kuphata basa cisa cawo consene pakugawira ncemerero. (Onani bokosi “Tinagawira Tani Ncemerero?”) Micemerero yonsene inafuna kudzasala isafunika kubwereswa ku nsonkhano wa gawo. Micemerero ineyi inadzaphatisirwa toera kupereka umboni wantsusukano pa cisa ca nsonkhano wa gawo.
10. Longani pyakugumana napyo pinapangiza kuti kampanya yathu inacitwa pa caka isabweresa maphindu.
10 Kodi anthu asatawira tani kampanya ineyi inacitwa kabodzi pa caka? Pa nsonkhano wa gawo ubodzi, kalindi aphedza banja ibodzi kugumana mbuto toera kukhala. Iwo alonga na kalindi kuti atambira ncemero na “auona kukhala wakutsandzayisa.” Iwo acita ulendo wa makilometru 320 na motokala toera kugumanika pa nsonkhano! Mu njira inango, mulongo m’bodzi akhacita basa ya nyumba na nyumba apasa ncemero mamuna m’bodzi wakuti akhaoneka ninga akhali wakufunisisa kudziwa pya nsonkhano. Mulongo anfokotozera pya ncemerero. Pakupita ntsiku zingasi, mulongo unoyu akhali pa nsonkhano wa gawo, iye aona mamuna unoyu pabodzi na xamwali wace pa nsonkhano, iwo akhali na bukhu ipswa idabuluswa pa nsonkhano!
11. Thangwi yanji kugumanika kwathu pa misonkhano ya gawo pyaka pyonsene ndi kwakufunika kakamwe?
11 Maphwando a caka na caka akhali masasanyiro aufuni akubuluka kwa Yahova toera kuphedza Aisraele “kuntumikira mwakukhonda kudodoma na mu undimomwene.” (Yoswa. 24:14, NM) Sawasawa, kugumanika kwathu pa misonkhano ya gawo pyaka pyonsene kusatiphedza toera ‘kufamba mu undimomwene’ pontho ndi khundu yakufunika ya kulambira kwathu. (3 Jwau 3) Tisadikhira kuti Yahova anadzapasa nkhombo kuwangisira kwa onsene anyakufuna undimomwene toera kugumanika na kuphindula mwakukwana!
[Ntsonga ikulu pa tsamba 4]
Makhaliro athu adidi mu ndzidzi unagumanika ife pa cisa ca nsonkhano asalemedzesa undimomwene
[Ntsonga ikulu pa tsamba 5]
Masumana matatu mbudzati kufika nsonkhano wathu wa gawo, tinadzakhala na kampanya yakucemera anango toera kugumanika pa nsonkhano
[Bokosi pa matsamba 3-6]
Pikumbuso Pya Nsonkhano Wa Gawo Wa 2012
◼ Midzidzi Ya Nsonkhano: Mu ntsiku zitatu nsonkhano unadzatoma pa ndzidzi 8:20 wa kumacibese. Misuwo inadzafungulwa pa ndzidzi 7:00 wa kumacibese. Nyimbo zamalimba zingatoma, tonsene tisafunika tikhale m’mipando yathu toera nsonkhano utome mu njira yakulemedzeka. N’Cixanu na n’Sabudu nsonkhano unadzamala pa ndzidzi 3:55 wakumaulo, mbwenye n’Dimingu unadzamala pa ndzidzi 2:40 wakumaulo.
◼ Pakuikha Miotokala: Pa mbuto zonsene za nsonkhano wa gawo zinatawiriswa ife kuikha miotokala, ale akuti ali na miotokala yawo anadzaiikha mwakukhonda lipa mwakubverana na ndzidzi unafika iwo. Nakuti mbuto zakuikha miotokala ndi zakucepa, pinakhala pyadidi anthu azinji kuphatisira motokala ubodzi ene pingakwanisika.
◼ Kukoya Mbuto Zakukhala: Mbuto zingakwanise kukoyerwa basi ene ale anaenda na imwe m’motokala ubodzi ene, ale anakhala na imwe pa nyumba ibodzi ene peno ale anacitira imwe pfundziro ya Bhibhlya.—1 Akor. 13:5.
◼ Cakudya Camasikati: Taphata miyendo bweresani cakudya canu camasikati kuti mukhonde kusiya mbuto ya nsonkhano wa gawo toera kuenda kasaka cakudya pa ndzidzi wakupuma. Mungakwanise kuphatisira sestu ing’ono yakuti munakwanisa kuikoya pantsi pa mpando wanu. Nkhabe tawiriswa kuphatisira masestu makulu anaphatisira ife pa kaphwando na acibale peno pyombo pya vidru pa mbuto ya nsonkhano wa gawo.
◼ Pyakupereka: Ife tingakwanise kupangiza kupereka kwathu takhuta mukucita pyakupereka pyathu mwaufulu pa nsonkhano wa gawo toera kuphedza basa ya dziko yonsene yapantsi. Cheque zonsene zinaperekwa pa nsonkhano wa gawo zisafunika kulembwa mu dzina ya “Associação das Testemunhas de Jeová de Moçambique.”
◼ Ngozwi Na Utenda Wa Mwandzidzidzi: Munthu angaduwala pa mbuto ya nsonkhano wa gawo, taphata miyendo bvundzani kalindi anagumanika paduzi, kuti akadziwise mwakucimbiza departamentu ya Ukonzi Wakutoma, departamentu ineyi inadzaphemba anthu anadziwa pya ukondzi anagumanika pa nsonkhano wa gawo kuti akadinge na kuphedza nyakuduwala.
◼ Mitombwe: Khala mwalemberwa mitombwe na dotoro toera kumwa, taphata miyendo onesesani toera kukwata mitombwe ineyi, nakuti pa nsonkhano wa gawo nkhabe kudzagumanika mitombwe.
◼ Ntsapato: Mphyadidi kusankhula ntsapato zakuthema, zakukwana mwadidi zakuti zinadzakuphedzani toera kufamba mwadidi.
◼ Formularyu Queira Visitar (S-43): Tisafunika kuphatisira formularyu yakuti Queira Visitar (S-43) toera kulemba mphangwa za onsene adapangiza kukomerwa thangwi ya umboni wantsusukano udapereka ife nkati mwa nsonkhano wa gawo. Amwazi mphangwa asafunika kuenda ku nsonkhano na formularyu ibodzi peno mawiri akuti Queira Visitar. Maformularyu akulembwa angakwanise kuperekwa kwa mulembi wa mpingo wanu mungabwerera ku nsonkhano.—Onani Utumiki Wathu Wa Umambo wa nthanda ya Gonkho ya 2011, tsamba 3.
◼ Restauranti: Pasani mbiri dzina ya Yahova kubulukira ku makhaliro anu adidi pa marestauranti. Simbani anyabasa a mu restauranti idafikira imwe.
◼ Masasanyiro A Mbuto Zakugona: Ntsiku za nsonkhano wa gawo mbizisati kufika, Departamentu Ya Masasanyiro A Mbuto Zakugona isatoma phata basa toera kucita masasanyiro a kutsalakana onsene anaphemba pakugona. Masasanyiro anewa asathimizira kutsandzaya kwa kukhala pabodzi ninga Akristu. Mbwenye, kudziwa kuti pinthu pyonsene pisafunika pifambe ‘mwakuthema na mwakundendemera’, pontho kuti pyenepi pisaphataniza ukhali wadidi wa anango, pasafunika pikumbuso pingasi. Ale akuti ndi alendo pa nyumba za abale asafunika kukomerwa na pire pinapaswa iwo pabodzi na kubverana mu pinthu pinaphembwa iwo. Pontho, citani pyonsene toera musiye kwartu yakucena ntsiku zonsene mbumusati kuenda ku nsonkhano wa gawo na mbumusati kupangana toera kubwerera kunyumba. Kukhala mulendo pa nyumba ya m’bale nkhabe malisa kupitawirira kwathu kwa kusaka pyakudya pyathu pyene na motokala wa kuenda nawo ku nsonkhano wa gawo. Natenepa, munthu m’bodzi na m’bodzi asafunika kucita masasanyiro ace mu pyenepi. Kubverana na kubvesesa kwanu mu pinthu pyenepi kunadzacitisa mwanaciro nyumba kupangiza khodzo yace mwakufuna, tayu mwakukakamizika. Midida ibodzi ene isaphatisirwambo kwa ale anafikira pa mbuto ya nsonkhano wa gawo. Iwo asafunika kubverana na akalindi toera kusiya mbuto ya nsonkhano wa gawo yakucena ntsiku zonsene.—1 Akor. 14:40, Chiverano Chachinchino.
◼ Basa Yakuperekeka: Munthu anafuna kuphedza asafunika kulonga na Departamentu ya Basa Yakuperekeka pa nsonkhano wa gawo. Ana akukhonda kukhala na pyaka 16 pyakubalwa, anakwanisambo kuphedza mwadidi mukuphata basa cifupi na anyakubalawo, cifupi na nyakuaonera peno cifupi na munthu wathunga adatawiriswa na anyakubala toera kuonera ana anewa.
◼ Ubatizo: Anyakufuna kubatizwa asafunika kukhala pa mbuto idasankhulwa toera iwo akhale programu mbidzati kutoma n’Sabudu namacibese. Onsene adatawirwa toera kubatizwa asafunika kubweresa nguwo zakuthema za ubatizo na tuwalya. M’midzidzi yakale anango akhabvala nguwo zakukhonda thema zakuti zikhadodomesa ndzidzi wa ubatizo. Akulu a mpingo angacita mibvundzo ya ubatizo m’bukhu ya Organizados, asafunika kuonesesa khala anyakufuna kubatizwa abvesesa mwadidi nkhani ineyi pabodzi na midida ya Bhibhlya inalonga thangwi ya pyenepi.
[Ntsonga ikulu pa tsamba 6]
Tinagawira Tani Ncemerero?
Toera kuphata basa mu cisa cathu consene, mphyadidi kulonga mwacigwagwa. Tinakwanisa kulonga mafala ninga awa: “Muli tani. Tikucita basa yakuti ikucitwa mu dziko yonsene yapantsi toera kugawira ncemerero uyu. Uyu ndi ncemerero wanu. Munadzagumana mphangwa zakuthimizirika mu ncemerero.” Khalani wakugalamuka. Pa kugawira ncemerero pakumala kwa sumana, pingakwanisika gawiranimbo marevista.