Makhaliro Akuti Asapasa Mbiri Mulungu
1. Thangwi yanji Mboni za Yahova zisadzindikirwa mwadidi zingagumanika pa misonkhano ya gawo?
1 Tingagumanika pa misonkhano ya gawo, ndi kwakukhonda nentsa kwa anthu kutidzindikira kuti tiri pa nsonkhano. M’mbuto zizinji za nsonkhano, anthu azinji asadziwiswa pya makhaliro athu. Kazinji kene maoteli na marestauranti asadzala na anthu anafuna kugumanika pa nsonkhano, pontho anthu apacisa asaona alendo azinji mbakabvala makaraxa. Pitsogolero pinatowerera pinadzatiphedza toera kupasa mbiri Mulungu mu kupangiza makhaliro adidi munagumanika ife mu cisa ca nsonkhano.—1 Ped. 2:12.
2. Tinapasa tani mbiri Mulungu tingabvala nguwo zakuthema mu ndzidzi unagumanika ife mu cisa ca nsonkhano?
2 Nguwo Zakuthema: Mabvaliro athu akuthema tingagumanika pa nsonkhano kazinji kene asakhuya ale anationa. Mbwenye mabvaliro athu pa ndzidzi unafika ife pa oteli, unadya ife pa restauranti, tingaenda kagula pinthu, na m’mbuto zinango—anakwanisa kukhuya kakamwe ale anationa. Ngakhale kuti midzidzi ineyi nee tinabvala ninga tiri pa nsonkhano, nguwo zathu zisafunika kukhala zakuthema, zakulemedzeka, tayu zakupata peno zakuphenekera. Anyakutiona asafunika kudzindikira kusiyana kunaoneka pakati pa ife na anthu akukhonda khulupira. (Arom. 12:2) Mwakuthimizira, tisafunika kubvala makaraxa athu, thangwi pyenepi pinadzadziwisa nsonkhano, kutipasa miyai toera kupereka umboni, pontho toera kudzindikirwa na anango anagumanika pa nsonkhano.
3. Tinapangiza tani kupirira na cilemedzo?
3 Kupangiza Kupirira Na Cilemedzo: Mu ndzidzi wakuti anthu azinji pa dziko yapantsi asafuna pinthu pyawo basi, pontho akukhonda kupereka takhuta, kupirira kwathu na cilemedzo cathu pinadzatsandzayisa kakamwe anyakutiona, ninga anyabasa a mu oteli na restauranti! (2 Tim. 3:1-5) Pakukoya mbuto zakukhala peno tingakhala pa nzera toera kutambira mabukhu adabuluswa, nee tisafunika kutsalakana pya udidi wathu basi tayu, mbwenye pya udidi wa anango. (1 Akor. 10:23, 24) Pakumala kugumanika pa nsonkhano wace wakutoma, mamuna m’bodzi alonga, “Nee nkhani ibodzi inakumbukira ine mwa nkhani zidacitwa pa ntsiku ineyi, mbwenye ndisakumbuka makhaliro adidi adapangiza Mboni za Yahova.”
4. Thangwi yanji tisafunika kuperekeka toera kuphedza pa nsonkhano wa gawo makhaliro athu angatitawirisa?
4 Anyakuperekeka Mwakufuna: Akristu andimomwene asadziwika thangwi ya nzimu wakuperekeka. (Sal. 110:3) Munakwanisa kuperekeka toera kuphedza pa nsonkhano? Pa mbuto ibodzi ya nsonkhano wa gawo, abale na alongo akukwana 600 aperekeka toera kucenesa mbuto ya nsonkhano, mbidzati kufika ntsiku ya nsonkhano. Nyabasa m’bodzi alonga: “Pyenepi ndi pinthu pyakudzumatirisa kakamwe pyakuti cipo tapiona! Pisanentsa kutawira kuti anthu anewa onsene ndi anyakuperekeka.” Tikudikhira kakamwe nsonkhano wa gawo wa 2013 pabodzi na mwai unafuna kudzakhala na ife, tayu basi toera kubvesera na kupfundziswa na Mulungu, mbwenye toera kumpasa mbiri.