Pikumbuso Pya Nsonkhano Wa Gawo

◼ Midzidzi Ya Nsonkhano: Misuwo inadzafungulwa pa ndzidzi 7:00 wakumacibese. Mu ntsiku zitatu za nsonkhano, nyimbo zamalimba zinatoma pa ndzidzi 8:20. Pa ndzidzi unoyu, tonsene tisafunika tikhale m’mipando yathu toera nsonkhano utome munjira yakulemedzeka. N’Cixanu na n’Sabudu, programu inadzamala pa ndzidzi 3:55 wakumaulo, mbwenye n’Dimingu inadzacitwa pa ndzidzi 2:45 wakumaulo.

◼ ‘Kusimba Yahova Mukuimba Nyimbo’: Atumiki a Mulungu asasimba Yahova kutomera kale, pontho nyimbo zisapitiriza kukhala zakufunika kakamwe mu ulambiri wandimomwene lero. (Sal. 28:7) Makhundu onsene a nsonkhano wathu asatoma na nyimbo zamalimba. Nyimbo zenezi nee zakhunganywa basi ene toera kubvesera, mbwenye kupfundza pya Yahova na kumulambira. Natenepa, muimiriri wa nsonkhano angalonga kuti nyimbo zamalimba zisafuna kutoma, ndi ndzidzi wakukhala pantsi toera kupangiza kupereka takhuta thangwi ya masasanyiro anewa, mbuto mwakupitiriza na kucedza. Kucita pyenepi kunapangiza kuti tisapasa ntengo kuwangisira kunacita kwa abale na alongo anacita nyimbo zenezi. Kawiri pa caka abale na alongo anewa asaenda ku Patterson, Nova York mukuphatisira kobiri zawo toera kacita nyimbo zakubalika na zakutitsandzayisa. Pakumala kubvesera nyimbo zamalimba, munthu onsene asafunika kusimba Yahova mukuimba nyimbo zathu Zaumambo.

◼ Pakuikha Miotokala: Pa mbuto zonsene za nsonkhano wa gawo zinatawiriswa ife kuikha miotokala, ale akuti ali na miotokala yawo anadzaiikha mwakukhonda lipa mwakubverana na ndzidzi unafika iwo. Nakuti mbuto zakuikha miotokala ndi zakucepa, pinakhala pyadidi anthu azinji kuphatisira motokala ubodzi ene pingakwanisika.

◼ Kukoya Mbuto Zakukhala: Misuwo ingafungulwa namacibese, taphata miyendo, lekani kuthamanga toera kusankhula mbuto zadidi zinafuna imwe ninga kuti mukupikisana na andzanu. Ntima wakudzimana usatikulumiza toera kuikha patsogolo udidi wa anango, pyenepi pisapangiza kuti ndife Akristu andimomwene, pontho pisakulumiza anyakutiona toera kusimba Mulungu. (Jwau 13:34, 35; 1 Akor. 13:4, 5; 1 Ped. 2:12) Munakwanisa kukoyera mbuto basi ene ale anaenda na imwe m’motokala ubodzi ene, ale anakhala na imwe panyumba ibodzi ene peno ale anacitira imwe pfundziro ya Bhibhlya. Taphata miyendo lekani kuikha pinthu pa mipando yakuti nee mukuikhalira. Kubvera kwanu citsogolero ceneci kunadzacitisa anango toera kukhala pa mipando ineyi. Mbuto zinango zakoyerwa ankhalamba na anyakulamala. Nakuti mbuto zenezi ndi zakucepa, munthu m’bodzi peno awiri basi adasankhulwa toera kuonera nkhalamba peno nyakulamala, anakwanisa kukhala naye pabodzi.

◼ Mabvaliro Akuthema: Mabvaliro athu pa nsonkhano wa gawo asafunika kukhala akuthema, tayu kupangiza mabvaliro a dziko. (1 Tim. 2:9) Ngakhale pa ndzidzi unafika ife pa oteli na unabuluka ife, ndzidzi unacedza ife nsonkhano mbudzati toma peno pakumala kwa nsonkhano tisafunika kucalira mabvaliro akukhonda thema. Mphyadidi kubvala makaraxa mbatikhonda khala na manyadzo kupereka umboni tingakhala na mwai. Tingabvala mwakuthema na kukhala na makhaliro adidi pa nsonkhano wa gawo unafuna kudza, pinadzatundusa anthu a mitima yadidi kubvesera mphangwa za Bhibhlya zakupulumusa umaso, pontho pinadzabweresa mbiri kuna Yahova.​—Sof. 3:17.

◼ Kupangiza Cilemedzo Pakuphatisira Mitcini Ya Ndzeru Na Mitokodzi: Tisapangiza cilemedzo nkati mwa programu mukubweza volume ya mitokodzi na mitcini inango toera tikhonde kudzudzumisa anango. Tingaphatisira ntcini wakubulusa mafoto, wakugravari, peno mitcini yandzeru tisafunika kucalira kupingiza anango. Tisapangizambo cilemedzo mu kukhonda kulemba mphangwa mu ntokodzi peno kutumiza nkati mwa programu.

◼ Cakudya Camasikati: Taphata miyendo bweresani cakudya canu camasikati kuti mukhonde kusiya mbuto ya nsonkhano toera kuenda kasaka cakudya pa ndzidzi wakupuma. Munakwanisa kuphatisira sestu ing’ono yakuti inakwana pantsi pa mpando wanu. Nkhabe tawiriswa kuphatisira masestu makulu anaphatisira ife pa kaphwando na acibale peno pyombo pya vidru pa mbuto ya nsonkhano wa gawo.

◼ Pyakupereka: Tinakwanisa kupangiza kupereka takhuta mukucita pyakupereka pyathu mwaufulu pa nsonkhano wa gawo toera kuphedza basa ya dziko yonsene yapantsi. Cheque zonsene zisafunika kulembwa mu dzina ya “Associação das Testemunhas de Jeová de Moçambique.”

◼ Mitombwe: Khala mwalemberwa mitombwe na dotoro toera kumwa, taphata miyendo lekani kuiduwala, thangwi pa nsonkhano wa gawo nkhabe kudzagumanika mitombwe.

◼ Ntsapato: Mphyadidi kusankhula ntsapato zakuthema, zakukwana mwadidi zakuti zinadzakuphedzani toera kufamba mwadidi.

◼ Formularyu Queira Visitar (S-43): Tisafunika kuphatisira formularyu Queira Visitar (S-43) toera kulemba mphangwa za onsene adakomerwa na umboni wantsusukano udapereka ife nkati mwa nsonkhano wa gawo. Munakwanisa kupereka maformularyu akulembwa ku Mbuto Inakoyerwa Mabukhu peno kuna mulembi wa mpingo wanu mungabwerera ku nsonkhano.

◼ Restauranti: Pasani mbiri dzina ya Yahova kubulukira ku makhaliro anu adidi pa marestauranti. Bvalani munjira inapangiza kuti ndimwe Nkristu. Simbani anyabasa a mu restauranti inafika imwe.

◼ Masasanyiro A Mbuto Zakugona: Ntsiku ya nsonkhano mbidzati kufika, Departamentu Ya Masasanyiro A Mbuto Zakugona isatoma kuphata basa toera kucita masasanyiro a kutsalakana onsene anaphemba pakugona. Masasanyiro anewa asathimizira kutsandzaya kwa kukhala pabodzi ninga Akristu. Mbwenye, kudziwa kuti pinthu pyonsene pisafunika pifambe ‘mwakuthema na mwakundendemera,’ pontho kuti pyenepi pisaphataniza ukhali wadidi wa anango, pasafunika pikumbuso pingasi. Ale akuti ndi alendo panyumba za abale asafunika kukomerwa na pire pinapaswa iwo pontho kubverana mu pinthu pinaphembwa iwo. Pontho, citani pyonsene toera musiye kwartu yakucena ntsiku zonsene mbamudzati kuenda ku nsonkhano, pontho pakupangana toera kubwerera kunyumba. Kukhala mulendo panyumba ya m’bale nkhabe malisa basa yathu yakusaka pyakudya pyathu pyene na motokala wa kuenda nawo ku nsonkhano. Natenepa, m’bodzi na m’bodzi asafunika kucita masasanyiro ace. Kubverana na kubvesesa kwanu mu pinthu pyenepi kunadzacitisa mwanaciro nyumba kupangiza khodzo yace mwakufuna, tayu mwakukakamizika. Midida ineyi isaphatisirwambo kwa ale anafikira pa mbuto ya nsonkhano. Iwo asafunika kubverana na akalindi toera kusiya mbuto ya nsonkhano wa gawo yakucena ntsiku zonsene.​—1 Akor. 14:40, Chiverano Chachinchino.

◼ Basa Yakuperekeka: Munthu onsene anafuna kuphedza asafunika kulonga na Departamentu ya Basa Yakuperekeka pa nsonkhano wa gawo. Ana akukhonda kukhala na pyaka 16, anakwanisambo kuphedza mwadidi mukuphata basa cifupi na anyakubalawo, cifupi na nyakuaonera peno cifupi na munthu wathunga adatawiriswa na anyakubala toera kuaonera.