Ntsiku Zitatu za Kuwangiswa Mwauzimu
1. Kodi tinadzatambiranji pa nsonkhano wa gawo wa caka cino?
1 Mu dziko ino yakuipa yakutongwa na Sathani, Yahova akupitiriza kuwangisa atumiki ace. (Iza. 58:11) Njira ibodzi inaphatisira Yahova toera kutiwangisa ndi kubulukira ku nsonkhano wa gawo unacitwa pa caka. Nakuti nsonkhano wa gawo wa caka cino uli cifupi, tinakhunganyika tani toera kutambira na kupasa anango ciwangiso cauzimu?—Mis. 21:5.
2. Kodi ndi masasanyiro api asafunika ife kucita?
2 Khala mudzati kucita pyenepi, sakani ndzidzi wakucita masasanyiro anu na citani ndandanda wa masasanyiro akubasa toera mugumanike pa ntsiku zitatu za nsonkhano wa gawo. Kodi musadziwa kale ndzidzi unadzaphatisira imwe mu ntsiku zitatu toera kufika pa mbuto ya nsonkhano wa gawo na kusaka mbuto inafuna imwe kukhala programu mbidzati kutoma? Mwandimomwene imwe nee munadzafuna kuluza khundu ibodzi ya cakudya cauzimu cidatikhunganyira Yahova! (Iza. 65:13, 14) Kodi mwacita kale masasanyiro toera kufika pa mbuto ya nsonkhano na masasanyiro a mbuto zakugona?
3. Kodi ndi njira zipi zinafuna kutiphedza pabodzi na banja yathu toera kuphindula mwakukwana na programu ya nsonkhano?
3 Ninji cinafuna kukuphedzani kukhazikisa manyerezero toera kubvesesa programu? Khala ndi pyakukwanisika, gonani na kweru masiku onsene a ntsiku za nsonkhano. Nkati mwa programu ikhani maso anu kuna nyakucita nkhani. Dingani malemba onsene m’Bhibhlya yanu. Mwacigwagwa lembani pinthu pinadzafuna imwe kukumbukira. Mabanja anacita pyadidi angakhala pabodzi pene, natenepa anyakubala anakwanisa kuphedza anapianawo kubvesesa mwadidi programu ya nsonkhano. (Mis. 29:15) Panango munakwanisa kulonga ntsonga zikulu za programu ya nsonkhano ya ntsiku ibodzi na ibodzi na banja yanu namaulo. Toera banja yanu ipitirize kukhala na ciwangiso ngakhale pakumala kwa nsonkhano, musafunika kukoya ndzidzi nkati mwa Kulambira kwanu kwa Banja namaulo toera kudinga ntsonga zakufunika zakuti zinaphatisirwa na banja yanu.
4. Kodi tinakwanisa tani kuphedza anango m’mpingo mwathu toera atambire ciwangiso cauzimu?
4 Phedzani Anango Toera Kugumana Ciwangiso: Ife tisafuna kuti anango atambirembo ciwangiso cauzimu. Kodi m’mpingo mwanu musagumanika amwazi mphangwa akugwesera peno anango akuti asafuna ciphedzo toera kuenda ku nsonkhano? Munakwanisa kuaphedza? (1 Jwau 3:17, 18) Akulu a mpingo, makamaka ayang’aniri a misoka ya basa ya m’munda asafunika kuona kuti amwazi mphangwa anewa atambire ciphedzo cinafunika kwa iwo.
5. Kodi tinadzagawira tani micemerero ya nsonkhano wa gawo? (Onanimbo bokosi iri padzulu.)
5 Ninga nduli, masumana matatu mbudzati kufika nsonkhano wathu wa gawo, tinadzakhala na kampanya yakucemera anango toera kugumanika pa nsonkhano wa gawo. Mipingo isafunika kukhazikisa cifuno cakugawira micemerero yonsene mu cisa consene ca mpingo pingakhala pyakwanisika. Khala banja yanu iri na micemerero idasala pakumala kwa kampanya, kwatani micemerero ineyi pakuenda ku nsonkhano wa gawo toera kucemera anthu anafuna imwe kudzapasa umboni wantsusukano. Mphangwa zakuthimizirika zinalonga thangwi ya pyenepi zinadzaperekwa nkati mwa programu ya n’Cixanu. Micemerero idasala yakuti banja yanu nkhabe kudzaiphatisira, ngakhale pa cisa ca nsonkhano isafunika kuperekwa kuna akalindi mungafika pa mbuto ya nsonkhano wa gawo. Taphata miyendo koyani ncemerero ubodzi nakuti unadzafunika kuphatisirwa n’Dimingo pa nkhani yakumalisa.
6. Kodi ndi mu njira zipi zakuti tinakwanisa kupangiza cilemedzo cadidi pa nsonkhano wa gawo?
6 Cilemedzo Cakuwangisa: Mu ndzidzi uno wakuti anthu azinji ‘asafuna pinthu pyawo okha basi’ na asapangiza kukhonda kutsalakana mabvero a anango, ndi ciwangiso tani kukhala akuzungulirwa na Akristu anzathu akuti asawangisira toera kulemedza anango! (2 Tim. 3:2) Tisapangiza citsalakano cadidi mu kupita pa mbuto ya nsonkhano mwacilemedzo na mu njira yadidi ingafungulwa misuwo pa ndzidzi 7:00 wa macibese. Tinapangizambo citsalakano mu kukoya mbuto kwa ale anakhala na ife pa nyumba ibodzi ene, anaenda na ife m’motokala ubodzi ene peno ale anapfunza na ife Bhibhlya. Tinatoweza pitsogolero pya muimiriri wa khundu ya programu angaphemba kuti tikhale pantsi toera tibvesere matomero a nyimbo zakutoma kwa programu pa khundu ya macibese peno ya maulo. Tinakwanisambo kupangiza cilemedzo kuna anango mukubweza volume ya ntokodzi wathu wa m’manja toera tikhonde kudzudzumisa anango nkati mwa programu. Njira inango yakupangiza cilemedzo ndi kucalira kulonga, kulemba mphangwa mu ntokodzi wa m’manja, kudya peno kufamba-famba nkati mwa programu.
7. Tinakwanisa tani kutambira na kupasa ciwangiso tingagumanyikana pabodzi na abale athu?
7 Ciwangiso ca Kugumanyikana: Misonkhano ya gawo isatipasa miyai ikulu kakamwe toera kutsanzaya na ciwangiso ca kuphatana kwathu kwa Cikristu pabodzi na ubale wathu. (Sal. 133:1-3) Thangwi yani nkhabe kutoma ‘kufungula mitima yanu’ toera kudziwa abale na alongo akuti abuluka ku mipingo inango? (2 Akor. 6:13) Citani pyenepi kukhala cifuno canu toera kudziwa munthu m’bodzi peno banja ibodzi pa ntsiku ibodzi na ibodzi ya nsonkhano. Ndzidzi wakupuma pakumala kwa programu ya macibese ndi mwai toera kucita pyenepi. Bweresani cakudya cakukhonda kupasa citulo, tsanzayani kudya na kucedza na anango pa mbuto ya nsonkhano. Mungabweresa cakudya munadzacalira kusiya mbuto ya nsonkhano wa gawo toera kuenda kasaka cakudya peno kuenda kadya ku mbuto inango. Pyenepi pinakuphedzani kugumana nkhombo zakukhala na axamwali apswa.
8. Thangwi yanji tisafunika kuperekeka toera kucita basa pa nsonkhano wa gawo, tinakwanisa tani kucita pyenepi?
8 Ndi kwakuwangisa tani kuphata basa pabodzi na alambiri anzathu m’basa ya Mulungu! Munakwanisa kuperekeka toera kuphedza madepartamentu peno kuphedza mpingo wanu pa basa yakukhunganya peno kupswaira mbuto ya nsonkhano wa gawo? (Sal. 110:3) Khala imwe nkhabe cinthu cakucita, taphata miyendo fendedzerani Departamentu ya Basa Yakuperekeka pa nsonkhano wa gawo. Manja mazinji asacitisa kuti basa ikhale yakufewa na yakutsanzayisa.
9. Thangwi tisafunika kutsalakana mwadidi makhaliro na maonekero athu pa ntsiku za nsonkhano wa gawo?
9 Makhaliro Athu Asawangisa Anyakutiona: Tonsene ndife anyakucita khundu ya nsonkhano wa gawo nkati mwa ntsiku zitatu za nsonkhano, si basi ene pa mbuto ya nsonkhano tayu. Onsene anationa mu ndzidzi unakhala ife mu nzinda wa nsonkhano asafunika kudzindikira pakweca kusiyana kuli pakati pa ife na ale akuti si Mboni za Yahova tayu. (1 Ped. 2:12) Makhunganyikiro na mabvaliro athu pa nzinda wa nsonkhano, pa mbuto idafikira ife, peno pa marestauranti asafunika kupasa mbiri Yahova. (1 Tim. 2:9, 10) Tingabvala makaraxa athu, anthu anationa anadzadzindikira kuti ndife Mboni za Yahova. Pyenepi pinapasa mwai toera kulonga nawo thangwi ya nsonkhano wathu wa gawo peno kupereka umboni wakuthimizirika.
10. Kodi tinakhala tani na cinyindiro cakuti anyabasa a mu oteli peno a mu restauranti akhale na maonero adidi thangwi ya nsonkhano wathu wa gawo?
10 Kodi tinakwanisa tani kubverana mwadidi na ale anaphata basa mu oteli na mu restauranti? Khala tisafuna kufikira pa oteli peno pa restauranti, nee tisafunika kukoyesa makwartu mazinji akuti nkhabe kudzaaphatisira, pyenepi pinacitisa kuti anango agumanembo makwartu. Pinacitisambo kucalira kuti oteli ikhonde kuluza kobiri. Khala oteli yadzala na anthu mu ndzidzi unafika ife peno unabuluka ife tisafunika kukhala akupirira na akukoma ntima. (Akol. 4:6) Tisafunika kusimba anyabasa a mu oteli peno mu restauranti akuti asatiphedza kuthukula mapasta athu, kukhunganya kwartu yathu peno anacita mabasa anango.
11. Kodi ndi pyakugumana napyo pipi pinapangiza umboni wadidi wa makhaliro athu Acikristu?
11 Kodi makhaliro athu adidi pa ndzidzi wa nsonkhano asakhuya tani anango? Mwakubverana na nsolo wa tsamba ya mphangwa, muyang’aniri m’bodzi wa pa restauranti alonga: “Anthu onsene ndi acilemedzo kakamwe. Tisakomerwa kuatambira pyaka pyonsene.” Caka cidamala munthu wakuti si Mboni tayu ataikirwa na cikhwama cace pa oteli ikhadafikira abale pa ndzidzi wa nsonkhano. Pa ndzidzi udapereka abale cikhwama kuna muyang’aniri wa oteli iye alonga kuna mwanaciro cikhwama: “Pyakhala pyadidi kwa iwe kuti Mboni za Yahova zikhali na nsonkhano wawo pa nzinda uno pontho oteli ikhadadzala na iwo. Panango cikhwama cako nee mbudacionabve tayu.”
12. Munafendedzera ife ndzidzi wa nsonkhano, kodi tisafunika kukhala na cifuno cipi, thangwi yanji?
12 Misonkhano ya gawo ya caka cino iri cifupi kakamwe. Ndzidzi uzinji na kuwangisira kakamwe kwacitwa toera programu na nsonkhano wa gawo ukhale wakuwangisa. Khalani na cifuno cakugumanika pa ntsiku zitatu za nsonkhano wa gawo, na khalanimbo wakukhunganyika toera kutambira pinthu pidakhunganya Yahova na gulu yace kwa imwe. Khalani dzololo toera kuwangisa anango kubulukira mukupangiza kwanu cilemedzo, kugumanyikana kwakutsanzayisa na makhaliro anu adidi. Natenepa imwe pabodzi na anango munakwanisa kupibva ninga nkazi m’bodzi adagumanika pa nsonkhano ule adalemba tenepa, “ine nkhabe kwanisa kulonga kutsanzaya kukulu kakamwe kudakhala na ife!”
[Ntsonga ikulu pa tsamba 4]
Ninga nduli, masumana matatu mbudzati kufika nsonkhano wathu wa gawo, tinadzakhala na kampanya yakucemera anango toera kugumanika pa nsonkhano wa gawo.
[Ntsonga ikulu pa tsamba 6]
Makhunganyikiro na mabvaliro athu pa nzinda wa nsonkhano, pa mbuto idafikira ife, peno pa marestauranti asafunika kupasa mbiri Yahova
[Ntsonga ikulu pa tsamba 7]
Khalani dzololo toera kuwangisa anango kubulukira mukupangiza kwanu cilemedzo, kugumanyikana kwakutsanzayisa na makhaliro anu adidi
[Bokosi pa matsamba 4]
Pikumbuso Pya Nsonkhano Wa Gawo Wa 2011
◼ Midzidzi Ya Nsonkhano: Mu ntsiku zitatu nsonkhano unadzatoma mu ndzidzi 8:20 wa kumacibese. Misuwo inadzafungulwa mu ndzidzi 7:00 wa kumacibese. Nyimbo zamalimba zingatoma, tonsene tisafunika tikhale m’mipando mwathu toera nsonkhano utome mu njira yakulemedzeka. N’Cixanu na n’Sabudu nsonkhano unadzamala pa ndzidzi 3:55 wa kumaulo, mbwenye n’Dimingu unadzamala pa ndzidzi 3:00 wa kumaulo.
◼ Pakuikha Miotokala: Pa mbuto zonsene za nsonkhano wa gawo zinatawiriswa ife kuikha miotokala, ale akuti ali na miotokala yawo anadzaiikha mwakukhonda lipa mwakubverana na ndzidzi unafika iwo. Nakuti mbuto zakuikha miotokala ndi zakucepa, pinakhala pyadidi anthu azinji kuphatisira motokala ubodzi ene pingakwanisika.
◼ Kukoya Mbuto Zakukhala: Mbuto zingakwanise kukoyerwa basi ene ale anaenda na ife m’motokala ubodzi ene, ale anakhala na ife pa nyumba ibodzi ene peno ale anacitira ife pfunziro ya Bhibhlya.—1 Akor. 13:5.
◼ Cakudya Camasikati: Taphata miyendo bweresani cakudya canu camasikati kuti mukhonde kusiya mbuto ya nsonkhano wa gawo toera kuenda kasaka cakudya mu ndzidzi wa kupuma. Mungakwanise kuphatisira sestu ing’ono yakuti munakwanisa kuikoya pantsi pa mpando wanu. Nkhabe tawiriswa kuphatisira masestu makulu anaphatisira ife pa kaphwando na acibale peno pyombo pya vidru pa mbuto ya nsonkhano wa gawo.
◼ Pyakupereka: Ife tingakwanise kupangiza kupereka kwathu takhuta mukucita pyakupereka pyathu pyaufulu pa nsonkhano wa gawo toera kuphedza basa ya dziko yonsene yapantsi. Cheque zonsene zinaperekwa pa nsonkhano wa gawo zisafunika kulembwa mu dzina ya “Associação das Testemunhas de Jeová de Moçambique.”
◼ Ngozwi Na Utenda Wa Mwandzidzidzi: Munthu angaduwala pa mbuto ya nsonkhano wa gawo, taphata miyendo bvunzani kalindi anagumanika paduzi, kuti akadziwise mwakucimbiza departamentu ya Ukonzi Wakutoma na ineyi inadzaphemba anthu anadziwa pya ukonzi anagumanika pa nsonkhano wa gawo kuti akadinge na kuphedza nyakuduwala.
◼ Mitombwe: Khala mwalemberwa mitombwe na dotoro toera kumwa, taphata miyendo onesesani toera kukwata mitombwe ineyi, nakuti pa nsonkhano wa gawo nkhabe kudzagumanika mitombwe.
◼ Ntsapato: Pyaka pyonsene, anthu azinji asaphekeka thangwi ya kubvala ntsapato zakukhonda thema. Mphyadidi kusankhula ntsapato zakuthema, zakukwana mwadidi zakuti zinadzakuphedzani toera kufamba mwadidi.
◼ Formularyu Queira Visitar (S-43): Tisafunika kuphatisira formularyu yakuti Queira Visitar (S-43) toera kulemba mphangwa za onsene adapangiza kukomerwa thangwi ya umboni wantsusukano udapereka ife nkati mwa nsonkhano wa gawo. Amwazi mphangwa asafunika kuenda ku nsonkhano na formularyu ibodzi peno mawiri akuti Queira Visitar. Maformularyu akulembwa angakwanise kuperekwa kwa mulembi wa mpingo wanu mungabwerera ku nsonkhano.—Onani Nosso Ministério do Reino wa Novembro de 2009, tsamba 4.
◼ Restauranti: Pasani mbiri dzina ya Yahova kubulukira ku makhaliro anu adidi pa marestauranti. Simbani anyabasa a mu restauranti idafikira imwe.
◼ Masasanyiro A Mbuto Zakugona: Ntsiku za nsonkhano wa gawo mbizisati kufika, Departamentu Ya Masasanyiro A Mbuto Zakugona isatoma phata basa toera kucita masasanyiro a kutsalakana onsene anaphemba pakugona. Masasanyiro anewa asathimizira kutsanzaya kwa kukhala pabodzi ninga Akristu. Mbwenye, kudziwa kuti pinthu pyonsene pisafunika pifambe ‘mwakuthema pontho mwakundendemera’ nakuti pyenepi pisaphataniza ukhali wadidi wa anango, pasafunika pikumbuso pingasi. Ale akuti ndi alendo mu nyumba za abale asafunika kukomerwa na pire pinapaswa iwo pabodzi na kubverana m’pinthu pinaphembwa iwo. Pontho, citani pyonsene toera musiye kwartu yakucena ntsiku zonsene mbumusati kuenda ku nsonkhano wa gawo na mbumusati kupangana toera kubwerera kunyumba. Kukhala mulendo pa nyumba ya m’bale nkhabe malisa kupitawirira kwathu kwa kusaka pyakudya pyathu pyene na motokala wa kuenda nawo ku nsonkhano wa gawo. Natenepa, munthu m’bodzi na m’bodzi asafunika kucita masasanyiro ace m’pyenepi. Kubverana na kubvesesa kwanu mu pinthu pyenepi kunadzacitisa mwanaciro nyumba kupangiza khodzo yace mwakufuna, tayu mwakukakamizika. Midida ibodzi ene isaphatisirwambo kwa ale anafikira pa mbuto ya nsonkhano wa gawo. Iwo asafunika kubverana na akalindi toera kusiya mbuto ya nsonkhano wa gawo yakucena ntsiku zonsene.—1 Akor. 14:40, Chiverano Chachinchino.
◼ Basa Yakuperekeka: Kutsanzaya kunakhala na ife tingagumanika pa nsonkhano wa gawo kunakhala kwakuthimizirika tingaperekeka tekhene toera kuphedza mabasa anafunika kucitwa. (Mach. 20:35) Munthu anafuna kuphedza asafunika kulonga na Departamentu ya Basa Yakuperekeka pa nsonkhano wa gawo. Ana akukhonda kukhala na pyaka 16 pyakubalwa, anakwanisambo kuphedza mwadidi mukuphata basa cifupi na anyakubalawo, cifupi na nyakuaonera peno cifupi na munthu wathunga adatawiriswa na anyakubala toera kuonera ana anewa.
◼ Ubatizo: Nyakufuna kubatizwa asafunika kukhala pa mbuto idasankhulwa toera iwo akhale programu mbidzati kutoma n’Sabudu namacibese. Onsene adatawirwa toera kubatizwa asafunika kubweresa nguwo zakuthema za ubatizo na tuwalya. M’midzidzi yakale anango akhabvala nguwo zakukhonda thema zakuti zikhadodomesa ndzidzi wa ubatizo. Akulu a mpingo angacita mibvunzo ya ubatizo m’bukhu ya Organizados, asafunika kuonesesa khala anyakufuna kubatizwa abvesesa mwadidi nkhani ineyi pabodzi na midida ya Bhibhlya inalonga thangwi ya pyenepi.
[Bokosi pa tsamba 5]
Tinagawira Tani Ncemerero?
Toera kuphata basa mu cisa cathu consene, tisafunika kulonga mwacigwagwa. Tinakwanisa kulonga mafala ninga awa: “Muli tani. Tikucita basa yakuti ikucitwa mu dziko yonsene yapantsi toera kugawira ncemerero. Uyu ndi ncemerero wanu. Munadzagumana mphangwa zakuthimizirika mu ncemerero.” Tsamba yakutoma ya ncemerero yacitwa toera kukhuya pifuno pya anthu, natenepa pasani ncemerero mwanaciro nyumba mbamumpangiza tsamba yakutoma. Khalani wakugalamuka. Pa kugawira ncemerero pakumala kwa sumana, pingakwanisika gawiranimbo marevista.