“Pangizani Makhaliro Adidi Pakati Pa Anthu Akunja”

1. Thangwi yanji tisafunika kupangiza makhaliro adidi mu ndzidzi wa misonkhano ya gawo na ya dziko ypnsne?

¹ Pyaka pyonsene anthu asatunduka mu ndzidzi wa misonkhano yathu ya gawo, natenepa, makhaliro athu asafunika kupangiza mwadidi Mulungu analambira ife. (Lev. 20:26) Makhaliro athu adidi, mabvaliro athu na makhunganyikiro athu asafunika kupangiza pakweca kuti ndife atowereri andimomwene a Kristu. Mu ndzidzi unagumanika ife pa nsonkhano wa gawo na wa dziko yonsene, tinakwanisa tani ‘kupangiza makhaliro adidi pakati pa anthu akunja’ na kupasa mbiri Babathu wakudzulu?​—1 Ped. 2:12, Tradução do Novo Mundo.

2. Ndi miyai ipi inafuna kudzakhala na ife toera kupangiza makhaliro Acikristu mu ndzidzi wa nsonkhano?

² Pangizani Makhaliro Acikristu: Ufuni unapangiza ife kwa unango na ndzace na kutsalakana kwathu ‘anthu akunja’ ndi pyakusiyana kakamwe na nzimu wa kupondererana wa dziko. (Akol. 3:10; 4:5; 2 Tim. 3:1-5) Tisafunika kupangiza ntima wadidi na wakupirira munacita ife pinthu na anyabasa a pa oteli na mu restauranti, ngakhale pangaoneka makhaliro akunentsa. Makhaliro adidi asaphembambo kupasa sagwati anyabasa khala mphyakudzolowereka.

3. Kodi anyakubala asakumbuswa toera kucitanji? Thangwi yanji?

³ Anyakubala asafunika kuonera mwadidi anawo pa nsonkhano wa gawo, mu restauranti, na pa oteli. (Mis. 29:15) Nkazi m’bodzi wakuti ndi muyang’aniri wa oteli apanga banja inango: “Ife tisakufunani kakamwe. Mabanja anu na ananu asapangiza makhaliro adidi na cilemedzo. Anyabasa onsene akhalonga pya imwe, tikhafuna kuti mugumanike pano pakumala kwa masumana onsene.”

4. Tinatsalakana tani maonekero athu mu ndzidzi unagumanika ife mu cisa cinacitwa nsonkhano wa gawo?

⁴ Nguwo Zakuthema: Mabvaliro athu tingagumanika pa nsonkhano wa gawo asafunika akhale akuthema na akulemedzeka, tayu kupangiza ntundu wa mabvaliro a dziko. (1 Tim. 2:9) Mbwenye mabvaliro athu pa ndzidzi unafika ife kwene pa oteli, pa ndzidzi wakupuma pakumala kwa programu peno mbidzati kutoma tisafunika kucalira maonekero akukhonda thema. Natenepa, tinadzakomerwa kubvala makaraxa athu, mbatikhonda kukhala na manyadzo toera kupereka umboni tingakhala na mwai wakucita pyenepi. Maonekero athu na makhaliro athu adidi mu ndzidzi unagumanika ife pa misonkhano inafuna kudza nee anadzatundusa anthu a ntima wadidi basi tayu ku mphangwa zakupulumusa umaso zinagumanika m’Bhibhlya, mbwenye anadzakomeresa Yahova.​—Sof. 3:17.

[Bokosi pa matsamba 7-8]

Pikumbuso Pya Nsonkhano Wa Gawo Wa 2014

◼ Midzidzi Ya Nsonkhano: Misuwo inadzafungulwa pa ndzidzi 7:00 wa kumacibese. Mu ntsiku zitatu za nsonkhano, nyimbo zamalimba zinatoma pa ndzidzi 8:20. Pa ndzidzi unoyu, tonsene tisafunika tikhale m’mipando yathu toera nsonkhano utome mu njira yakulemedzeka. N’Cixanu na n’Sabudu, nyimbo na phembero yakumalisa inadzacitwa pa ndzidzi 3:55 wakumaulo, mbwenye n’Dimingu inadzacitwa pa ndzidzi 2:50 wakumaulo.

◼ Misonkhano Ya Madziko Onsene: M’mbuto zinango munadzacitwa misonkhano ya madziko onsene. Kumbukani kuti ofesi ya filiali yaphemba kale mipingo na anthu a madziko akunja pakumala kuona numero ya mipando, pakuikha miotokala, na makwartu a maoteli. Anthu ananjipa amwazi mphangwa angaenda ku nsonkhano wa madziko onsene wakuti nee acemerwa. Khala musafuna kugumanika pa nsonkhano unango kusiyapo nsonkhano wanu, lekani kusankhula nsonkhano wa madziko onsene.

◼ Pakuikha Miotokala: Pa mbuto zonsene za nsonkhano wa gawo zinatawiriswa ife kuikha miotokala, ale akuti ali na miotokala yawo anadzaiikha mwakukhonda lipa mwakubverana na ndzidzi unafika iwo. Nakuti mbuto zakuikha miotokala ndi zakucepa, pinakhala pyadidi anthu azinji kuphatisira motokala ubodzi ene pingakwanisika.

◼ Kukoya Mbuto Zakukhala: Misuwo ingafungulwa namacibese, taphata miyendo, lekani kuthamanga toera kusankhula mbuto zadidi zinafuna imwe ninga kuti mukupikisana na andzanu. Ntima wakudzimana usatikulumiza toera kuikha patsogolo udidi wa anango, pyenepi pisapangiza kuti ndife Akristu andimomwene, pontho pisakulumiza anyakutiona toera kusimba Mulungu. (Jwau 13:34, 35; 1 Akor. 13:4, 5; 1 Ped. 2:12) Mbuto zingakwanise kukoyerwa basi ene ale anaenda na imwe m’motokala ubodzi ene, ale anakhala na imwe panyumba ibodzi ene peno ale anacitira imwe pfundziro ya Bhibhlya. Mbuto zinango zakoyerwa ankhalamba na anyakulamala. Nakuti mbuto zenezi ndi zakucepa, munthu m’bodzi peno awiri basi adasankhulwa toera kuonera nkhalamba peno nyakulamala, anakwanisa kukhala naye pabodzi.

◼ Cakudya Camasikati: Taphata miyendo bweresani cakudya canu camasikati kuti mukhonde kusiya mbuto ya nsonkhano toera kuenda kasaka cakudya pa ndzidzi wakupuma. Munakwanisa kuphatisira sestu ing’ono yakuti inakwana pantsi pa mpando wanu. Nkhabe tawiriswa kuphatisira masestu makulu anaphatisira ife pa kaphwando na acibale peno pyombo pya vidru pa mbuto ya nsonkhano wa gawo.

◼ Pyakupereka: Tingakwanise kupangiza kupereka takhuta mukucita pyakupereka pyathu mwaufulu pa nsonkhano wa gawo toera kuphedza basa ya dziko yonsene yapantsi. Cheque zonsene zisafunika kulembwa mu dzina ya “Associação das Testemunhas de Jeová de Moçambique.”

◼ Mitombwe: Khala mwalemberwa mitombwe na dotoro toera kumwa, taphata miyendo lekani kuiduwala, thangwi pa nsonkhano wa gawo nkhabe kudzagumanika mitombwe.

◼ Citsidzikizo: Taphata miyendo, citani mpholemphole toera kucalira kuphekeka thangwi ya kugwa. Pyaka pyonsene anthu asakuwazika thangwi ya ntsapato. Mphyadidi kusankhula ntsapato zakuthema, zakukwana mwadidi zakuti zinadzakuphedzani toera kufamba mwadidi.

◼ Formularyu Queira Visitar (S-43): Tisafunika kuphatisira formularyu Queira Visitar (S-43) toera kulemba mphangwa za onsene adapangiza kukomerwa thangwi ya umboni wantsusukano udapereka ife nkati mwa nsonkhano wa gawo. Munakwanisa kupereka maformularyu akulembwa ku Mbuto Inakoyerwa Mabukhu peno kuna mulembi wa mpingo wanu mungabwerera ku nsonkhano.

◼ Masasanyiro A Mbuto Zakugona: Ntsiku ya nsonkhano mbidzati kufika, Departamentu Ya Masasanyiro A Mbuto Zakugona isatoma kuphata basa toera kucita masasanyiro a kutsalakana onsene anaphemba pakugona. Masasanyiro anewa asathimizira kutsandzaya kwa kukhala pabodzi ninga Akristu. Mbwenye, kudziwa kuti pinthu pyonsene pisafunika pifambe ‘mwakuthema na mwakundendemera’, pontho kuti pyenepi pisaphataniza ukhali wadidi wa anango, pasafunika pikumbuso pingasi. Ale akuti ndi alendo panyumba za abale asafunika kukomerwa na pire pinapaswa iwo pabodzi na kubverana mu pinthu pinaphembwa iwo. Pontho, citani pyonsene toera musiye kwartu yakucena ntsiku zonsene mbamudzati kuenda ku nsonkhano, pontho pakupangana toera kubwerera kunyumba. Kukhala mulendo panyumba ya m’bale nkhabe malisa basa yathu yakusaka pyakudya pyathu pyene na motokala wa kuenda nawo ku nsonkhano. Natenepa, m’bodzi na m’bodzi asafunika kucita masasanyiro ace. Kubverana na kubvesesa kwanu mu pinthu pyenepi kunadzacitisa mwanaciro nyumba kupangiza khodzo yace mwakufuna, tayu mwakukakamizika. Midida ineyi isaphatisirwambo kwa ale anafikira pa mbuto ya nsonkhano. Iwo asafunika kubverana na akalindi toera kusiya mbuto ya nsonkhano wa gawo yakucena ntsiku zonsene.​—1 Akor. 14:40, Chiverano Chachinchino.

◼ Basa Yakuperekeka: Munthu onsene anafuna kuphedza asafunika kulonga na Departamentu ya Basa Yakuperekeka pa nsonkhano wa gawo. Ana akukhonda kukhala na pyaka 16, anakwanisambo kuphedza mwadidi mukuphata basa cifupi na anyakubalawo, cifupi na nyakuaonera peno cifupi na munthu wathunga adatawiriswa na anyakubala toera kuaonera.

◼ Ubatizo: Anyakufuna kubatizwa asafunika kukhala pa mbuto idasankhulwa toera iwo akhale programu mbidzati kutoma n’Sabudu namacibese. Onsene adatawirwa toera kubatizwa asafunika kubweresa nguwo zakuthema za ubatizo na tuwalya. Nduli, anango akhabvala nguwo zakukhonda thema zakuti zikhadodomesa ndzidzi wa ubatizo. Akulu a mpingo angacita mibvundzo ya ubatizo m’bukhu ya Organizados, asafunika kuonesesa khala anyakufuna kubatizwa abvesesa mwadidi nkhani ineyi pabodzi na midida ya Bhibhlya inalonga pyenepi.