Lekani Duwala Ale Adalimira Kumwaza Mphangwa
1 Kodi musadziwa munthu adalimira kumwaza mphangwa? Panango iye asiya kugumanyikana na mpingo na atayika. Mungakwanise kupita ncibverano na munthu unoyu munacita imwe utumiki wa nyumba na nyumba. Tisafunika kukumbukira kuti munthu unoyu asapitiriza kukhala m’bale wathu wauzimu. Tisafunika kupangiza kufuna kwathu kwa iye na kumphedza kubwerera ku mpingo kuna ‘nkumbizi na kuna mwoneri wa mioyo yathu.’—1 Ped. 2:25.
2 Pangizani Citsalakano: Kuceza pang’ono m’ntokodzi peno kuenda kaona munthu adalimira kumwaza mphangwa kunampasa cibaso cakuti nee tanduwala tayu. Kodi tingakwanise kulonganji? Tingakwanise kumuwangisa m’kuncitisa basi kudziwa kuti tisannyerezera. Citisani makani anu kukhala adidi na akuwangisa. (Afil. 4:8) Tingakwanise kulonga ntsonga zidakomerwa na ife za misonkhano idamala kwene pita. Tingakwanisembo kuncemerera ku nsonkhano wa mpingo peno nsonkhano wa cisa unafuna kucitika kutsogolo na kunkoyera pakukhala peno kumphedza kufika kweneko.
3 Mulongo unango adalimira kumwaza mphangwa kupiringana piaka 20 agumanwa m’cisa. Maseze iye nee akhafuna kutawira pfunziro ya Biblya, mulongo adangumana apitiriza kuenda kamuona mbakampasa marevista mapswa. Mudamala nsonkhano wa gawo, mmwazi mphangwa alonga ntsonga zingasi na mulongo adalimira kumwaza mphangwa, na pakumalisira iye atoma pontho kumwaza mphangwa.
4 Munthu Angabwerera: Kodi tisafunika kuntsalakana tani m’bale adalimira kumwaza mphangwa angatoma kugumanika pa misonkhano? Kodi Yezu atsalakana tani anyakupfunzace pakumala kunthawa m’nzidzi wakucepa? Mwakufuna iye aalonga ninga “abale” ace na apangiza kuti asaanyindira. Ngakhale iye aapasa basa yakufunika. (Mat. 28:10, 18) Natenepa m’nzidzi wakucepa, iwo akhali akudzudzumika m’kubvekesa mphangwa zadidi “nee kupuma.”—Mach. 5:42.
5 Mbatisati kuperekeka towera kupfunza Biblya na munthu adalimira kumwaza mphangwa peno mbatisati kuphemba munthu adalimira kumwaza mphangwa m’nzidzi uzinji kutiperekera m’utumiki, tisafunika kuphemba citsogolero kwa akulu a mpingo. Tingagumanikana m’cisa na munthu adalimira kumwaza mphangwa, tisafunika kupanga akulu a mpingo towera iwo ampase ciphedzo cakufunika.
6 Ninga Biblya isapangiza mwapakweca, anafuna kudzapulumuka ndi ule basi anathamanga mpaka kunkhomo. (Mat. 24:13) Natenepa, dziwani anthu adagwegweduka peno adatayika. Tingaonesa mwakupirira kufuna kwa Yahova m’kupangiza citsalakano candimomwene kwa anthu anewa, tinadzakomerwa kuaona kutoma pontho basa yawo yakucena kukhundu kwathu.—Luka 15:4-10.
[Study Questions]
1. Thangwi yanji tisafunika kufikira adalimira kumwaza mphangwa towera kuawangisa?
2. Kodi tinakwanisa tani kupasa ciwangiso kwa munthu onsene adalimira kumwaza mphangwa?
3. Kodi mulongo unango atoma tani pontho kumwaza mphangwa?
4. Kodi tisafunika kutsalakana tani munthu anatoma pontho kugumanika pa misonkhano?
5. Longani pinthu pyakuti tisafunika kulonga na akulu a mpingo thangwi ya munthu adalimira kumwaza mphangwa.
6. Kodi ndi kukomerwa kwanji kunafuna khala na ife m’kuphedza anthu adalimira kumwaza mphangwa?