SUMANA 10-16 YA BWINJA Imwe Munakwanisa Kuphedza Akristu Adasiya Kutumikira Yahova

N’cipiri, ntsiku 11 ya Bwinja, Akristu azinji adasiya kutumikira Yahova anagumanika pa Cikumbuso. Iwo akhadatoma kufamba munjira ya kuenda ku umaso, mbwenye asiya kutumikira Yahova na mathangwi mazinji. Mathangwi anango asalongwa mu bruxura Bwererani Kuna Yahova. (Aheb. 12:1) Ngakhale tenepo, ale adasiya kutumikira aciri akufunika kwa Yahova, ule adaagula na ciropa ca Mwanace. (Mac. 20:28; 1 Ped. 1:18, 19) Tinacitanji toera kuaphedza kuti abwerere kuna Yahova?

Akulu a mpingo asawangisira kakamwe toera kusaka na kuphedza ale adasiya kutumikira Yahova ninga nkumbizi wakuti asasaka mwaphinga bira idatayika. (Luk. 15:4-7) Pyenepi pisapangiza kuti Yahova asafuna kakamwe mabira ace. (Yer. 23:3, 4) Ife tonsene, tayu basi akulu a mpingo, tinakwanisa kuaphedza. Yahova asakomerwa na anatipasa nkhombo tingawangisira toera kuphedza ale adasiya kuntumikira. (Mis. 19:17; Mac. 20:35) Natenepa nyerezerani kuti mbani anafuna imwe kuphedza, pontho citani pyenepi mwakukhonda dembuka!

ONANI VIDYU AJUDAR OS INATIVOS, BULUKA PENEPO DINGANI MIBVUNDZO IYI:

• Kodi Ebbe acitanji pidagumanikana iye na mulongo wakuti nee akhandziwa?

• Thangwi yanji tisafunika kulonga na akulu a mpingo mbatidzati kuphedza nkristu adasiya kutumikira Yahova?

• Kodi Ebbe acitanji mbadzati kuenda kaona Laura pa ulendo waciwiri?

• Kodi Ebbe apangiza tani phinga, kupirira na ufuni mukhawangisira iye toera kuphedza Laura?

• Tinapfundzanji mu nsangani wa Yezu unagumanika pa Luka 15:8-10?

• Ndi nkhombo zipi zidaoneka thangwi yakuwangisira kwa abale na alongo mu mpingo toera kuphedza Laura?