Kodi Tinakwanisa Tani Kuphedza Ale Adagumanika Pa Cikumbuso?

¹ Pa ntsiku 22 ya Murope ya 2008, pikwi na pikwi pya anthu kuzungulira dziko yonsene yapantsi pinadzatambira umboni ukulu kakamwe. Ale anafuna kudzagumanika pa Cikumbuso anadzabva pya kufuna kukulu kwa Yahova mu kupasa anthu ciomboli. (Jwau 3:16) Iwo anadzapfunza pya Umambo na kuti Yahova anadzauphatisira tani towera kukwanirisa cifuno cace pa dziko yonsene yapantsi. (Mat. 6:9, 10) Iwo anadzaona okhene kufunana na kubverana kwa mbumba ya Mulungu na kutambira kwathu alendo.—Sal. 133:1.

² Anyakupfunza Biblya: Anango anafuna kudzagumanika pa Cikumbuso anadzakhala ale adatoma kwene kupfunza Biblya na ife. Apangizeni kwa abale na alongo. Apangeni pya misonkho ya mpingo inacitwa masumana onsene, na mwacigwagwa apangizeni makhaliro a Nyumba ya Umambo. Nkati mwa nkhani, nyakukamba anadzawangisa anthu anewa kuti apitirize kuthambaruka mwauzimu. Imwe mungakwanise kuphatisira mafalace ninga phata ya kuwangisa anyakupfunza anu.

³ Adalimira Kumwaza Mphangwa: Anango anafuna kudzagumanika pa Cikumbuso anadzakhala amwazi adalimira kumwaza mphangwa. Amwanyikeni mu njira yadidi. Lekani kucita mabvunzo anu ene peno kulonga pinthu pyakuti pinaacitisa kukhala na manyadzo tayu. Ntsiku peno masumana mangasi Cikumbuso cingamala, akulu a mpingo asafunika kucedzera amwazi adalimira kumwaza mphangwa adagumanika pa Cikumbuso, mbaasimba thangwi ya kuwangisira kwawo towera kugumanika pa cikumbuso na kuaphemba kuti agumanike pa nsonkhano wa mpingo unafuna kudza.

⁴ Alendo: Anango anafuna kudzagumanika anadzakhala anyakudziwana nawo peno anthu a m’banja adacemera ife. Panango anango atambira ncemerero nkati mwa basa yakupambulika ya kugawira micemerero. Khala mwaona anthu akuti nkhabe kuadziwa, ndokoni kacedza nawo, apangeni dzina yanu na apaseni bweraniko. Mphyakukwanisika kuti cipo iwo adzati kugumanika pa misonkhano yathu. Mu kucedza kwanu munakwanisa kudziwa kuti munakwanisa tani kucedza nawo pontho. Mu kuenda kaacedzera peno kumenya ntokodzi pakupita ntsiku zingasi Cikumbuso cingamala, mungakwanise kukulisa cifuno cawo na kutomesa pfunziro ya Biblya.

⁵ Mphangwa zinafuna longwa mu nkhani ya Cikumbuso zingakwanise kuphatisirwa ninga phata yakupangiza bukhu yakuti Biblya Isapfunzisanji pa ulendo wakubwereza. Mwacitsanzo, nyakukamba nkhani ya Cikumbuso anadzaleri Izaiya 65:21-23. Pa ulendo wakubwereza, mungakwanise kutculula nkhani na kulonga tenepa: “Ndisafuna kukupangizani nkhombo zinango zinakwanisika thangwi ya ciomboli.” Buluka penepo dingani tsamba 4-5 ya bukhu Biblya Isapfunzisanji. Panango imwe mungakwanise kulonga: “Anthu azinji asabvunzika kuti tinadzaona lini kukwanirisika kwa profesiya ya Izaiya.” Buluka penepo dingani ndima 1-3 ya nsolo 9. Njira inango yakutomesa pfunziro ya Biblya ndi kulonga kwene basi mafala a nyakukamba nkhani ya Cikumbuso, buluka penepo mbumupangiza bukhu Biblya Isapfunzisanji, na kupangiza macitiro a pfunziro.

⁶ Tendeni tonsene tisake miyai towera tiphedze anyakupfunza Biblya, amwazi adalimira kumwaza mphangwa na alendo anafuna kudzagumanika pa Cikumbuso. (Luka 22:19) Mwandimomwene Yahova anadzapasa nkhombo kuwangisira konsene kunafuna cita ife towera kuthimizira basa yathu ya Umambo.

[Study Questions]

1. Kodi ndi umboni upi ukulu kakamwe unafuna kudzaperekwa pa ntsiku 22 ya Murope ya 2008?

2. Kodi tinakwanisa tani kuphedza anyakupfunza Biblya adagumanika pa Cikumbuso?

3. Kodi tinacitanji towera kuwangisa amwazi adalimira kumwaza mphangwa akuti agumanika pa Cikumbuso?

4. Kodi m’bodzi na m’bodzi wa ife anakwanisa tani kuphedza alendo?

5. Kodi tingakwanise kulonganji towera kutomesa pfunziro ya Biblya?

6. Kodi ndi miyai ipi iri na ife munabvera ife ntemo wa Yezu wa kukumbuka kufa kwace?