Atambireni!

1. Ndi ndzidzi upi unatipasa mwai wadidi toera kupereka umboni, pontho thangwi yanji?

¹ Nkhabepo ndzidzi unango unatipasa mwai wadidi toera kupereka umboni kupiringana ndzidzi wa Cikumbuso. Onani: Caka cino alendo akupiringana mamiliyau khumi asadikhirwa kugumanika pa Cikumbuso toera kubva njira ziwiri za ufuni ukulu zidapangizwa kubulukira ku ciomboli. (Jwau 3:16; 15:13) Iwo anadzapfundza kuti ziripo nkhombo kwa iwo kubulukira ku sagwati wa Yahova. (Iza. 65:21-23) Mwandimomwene, si nyakucita nkhani basi tayu anadzapereka umboni pa ntsiku ineyi. Tonsene tinadzakhala na mwai toera kupereka umboni wamphambvu mu kutambira alendo na ntima onsene.​—Arom. 15:7.

2. Tinatambira tani alendo na ntima onsene?

² Mbuto mwakukhala pa mpando mbamudikhira kutoma kwa nsonkhano, mphyadidi kutoma dziwana na ale ali cifupi na imwe. Panango alendo anakhala akupswipa ntima thangwi yakukhonda kudziwa pinafuna kucitwa. Kumwetulira kwathu na kuamwanyika mwauxamwali kunaaphedza toera kupibva kuti atambirwa mwadidi. Toera kudziwa khala munthu abwera thangwi yakutambira ncemerero, musafunika kumbvundza khala ndi ulendo wakutoma kugumanika pa misonkhano yathu peno kumbvundza khala alipo anadziwana na iye m’mpingo. Panango munakwanisa kuncemera toera akhale cifupi na imwe mbamuphatisira pabodzi Bhibhlya yanu na bukhu yanu ya nyimbo. Nkhani ingamala, perekekani toera kutawira mibvundzo yace. Khala mpingo wanu usafunika kubuluka mwakucimbiza toera mbuto iphatisirwe na mpingo unango, munakwanisa kulonga: “Ndisafuna kudziwa maonero anu thangwi ya Cikumbuso. Pana njira yakuti ndinakwanisa kupita n’cibverano na imwe?” Buluka penepo, citani masasanyiro toera kucedza naye ntsiku inango. Makamaka akulu a mpingo anadzaonesesa toera kuwangisa amwazi mphangwa adalimira kumwaza mphangwa adagumanika pa Cikumbuso.

3. Thangwi yanji tisafunika kuwangisira toera kutambira alendo pa Cikumbuso?

³ Kwa alendo azinji, unoyu unadzakhala ulendo wakutoma kuona kutsandzaya, ntendere, na kuphatana kwathu mu paradizu yauzimu ninga atumiki a Yahova. (Sal. 29:11; Iza. 11:6-9; 65:13, 14) Kodi alendo anadzakumbukanji pakumala kugumanika pa Cikumbuso? Pizinji pinadzanyindira pinafuna kucita ife toera kuatambira.