Atambireni na Manja Mawiri

Mbani anafunika kutambirwa na manja mawiri? Anthu onsene anagumanika pa misonkhano yathu Yacikristu. Pyenepi pisaphataniza anthu apswa pabodzi na ale kuti atoma kale kusonkhana. (Arom. 15:7; Aheb. 13:2) Anthu anewa anakwanisa kukhala alambiri andzathu akubuluka ku dziko inango, peno Nkristu adasiya kutumikira, wakuti ali na pyaka pizinji nee kubwera pa misonkhano, mbwenye ntsiku ineyi iye abwera. Nyerezerani kuti ndimwe adasiya kusonkhana mu ndzidzi uzinji. Kodi nee mbumudakomerwa kutambirwa na manja mawiri? (Mat. 7:12) Mphapo, ndiye tani kuwangisira toera kufika nakweru pa Nyumba ya Umambo na kumwanyika anango misonkhano mbidzati toma na pakumala kwa misonkhano? Pyenepi pisathimizira makhaliro adidi na aufuni, pontho pisacitisa kuti Yahova asimbwe. (Mat. 5:16) Ndimomwene kuti imwe nkhabe kwanisa kumwanyika anthu onsene anafuna kugumanika pa misonkhano. Ngakhale tenepo, anthu onsene anapibva kuti atambirwa mwadidi tingacita khundu yathu.a

Midzidzi yonsene ife tisafunika kutambira alendo munjira yadidi, tayu basi m’midzidzi yakupambulika ninga ya Cikumbuso. Anthu apswa angaona kuti tisapangiza ufuni Wacikristu, iwo anakulumizika toera kusimba Mulungu mbacitambo khundu mu ulambiri wandimomwene.—Jwau 13:35.