Kunadzaperekwa Umboni Wamphambvu
1. Kusiyapo nkhani, ndi ninji pinango pinafuna kutundusa alendo? Fokotozani.
1 Lini? Mu cidodo ca ntsiku ya Cikumbuso. Kwacitwa basa ikulu toera kucemera anthu kuti agumanike na ife pa Cikumbuso. Pinafuna kutundusa alendo, nee ndi pinafuna kubva iwo basi. Pakumala kugumanika pa Cikumbuso, nkazi m’bodzi alonga pidaona iye—anthu onsene akhali auxamwali, nyumba yakubalika, yakukhunganywa mwadidi yakuti yamangwa na yatsalakanwa na anthu akuperekeka. Mwandimomwene, si nyakucita nkhani basi tayu, mbwenye tonsene, tinakwanisa kucita khundu toera kupereka umboni pa ntsiku ineyi yakufunika kakamwe ya pacaka.—Aef. 4:16.
2. Kodi m’bodzi na m’bodzi wa ife anakwanisa tani kupereka umboni kuna alendo?
2 Mwanyikani Alendo Mu Njira Yadidi: Kumwetulira kwathu pabodzi na kutambira alendo kunakwanisa kupereka umboni. (Jwau 13:35) Ngakhale kuti nee munakwanisa kulonga na anthu onsene, munakwanisa kupitiriza kumwanyika mwaufulu na kulonga dzina yanu kuna ale ali cifupi na imwe. (Aheb. 13:1, 2) Onesesani mwadidi alendo anapangiza kuti nkhabe anadziwana na iwo. Panango iwo atambira ncemerero pa ndzidzi wa kampanya. Mungakwanise kumbvunza, “Ndi kutoma kugumanika pa cakucitika ninga ici?” Mphembeni toera mukhale pabodzi pene, perekekani toera kutawira mibvunzo yace. Khala mpingo wanu unabuluka mwakucimbiza pakumala Cikumbuso toera mpingo unango uphatisirembo mbuto ineyi, munakwanisa kulonga: “Ndisafuna kudziwa maonero anu thangwi ya Cikumbuso. Pana njira yakuti ndinakwanisa kupita n’cibverano na imwe?”
3. Kodi tinatambira tani ale adalimira kumwaza mphangwa?
3 Tambirani Ale Adalimira Kumwaza Mphangwa: Mwakukhonda penula, amwazi mphangwa adalimira kumwaza mphangwa anadzagumanika pa Cikumbuso, kuphatanizambo ale anabwera kabodzi basi pa caka pa ndzidzi wa Cikumbuso. Citani bweraniko kwa iwo, na pangizani kuti muli wakutsanzaya kakamwe na kuaona. (Arom. 15:7) Pakumala Cikumbuso, mwakucimbiza Akulu a mpingo anakwanisa kuenda kaaona mu zinyumba zawo toera kuawangisa kuti apitirize kugumanikana pa misonkhano ya mpingo. Tikuphembera kuti anthu azinji anafuna kugumanikana pa Cikumbuso anadzakhuiwa toera kupasa mbiri Mulungu, nee thangwi ya pire pinafuna kubva iwo basi, mbwenye thangwi ya pinafuna kuona iwo ninga cipangizo ca ‘makhaliro athu adidi a pire pinaona iwo.’—1 Ped. 2:12.