Ife Tisafunika Kupitiriza Na Phinga Yathu Ya Utumiki
1 Caka na caka kutomera 1992, Mboni za Yahova zisaphatisira mwaphinga midzidzi yakupiringana biliyau ibodzi m’basa ya pa dziko yonsene yapantsi ya kumwaza mphangwa za Umambo na kucita anyakupfunza. Tiri akutsanzaya tani kucitambo khundu pang’ono mu kukwanirisika kwa basa ineyi yakudzumisa!—Mat. 28:19, 20.
2 Mwandimomwene, tisafunika kupereka takhuta kwa Yahova na kunsimba, thangwi ndiye anatiphedza mu utumiki wathu nkati mwa ‘midzidzi ino yakugopswa.’ (2 Tim. 3:1) Kodi tisafunika kucitanji khala tisafuna kupitiriza kucita khundu mwaphinga m’basa ineyi yakufunika kakamwe?
3 Pinaticitisa Kukhala Aphinga: Kufuna kakamwe Mulungu na anyakuendekana athu, pabodzi na cifuno cikulu ca kukhala maso mwakubverana na kuperekeka kwathu, pisatikulumiza m’basa yathu ya Umambo. (Mat. 22:37-39; 1 Jwau 5:3) Kufuna kusatikulumiza kucita pyonsene pinakwanisa ife towera ticite khundu mwakukwana m’basa ya kumwaza mphangwa.—Luka 9:23.
4 Wangisirani Towera Kupitiriza Na Phinga: Nyamalwa wathu Dyabo asacita pyonsene pinakwanisa iye towera kupungula phinga yathu ya utumiki. Kukhonda kubveserwa na ale ali mu cisa cathu, pidzudzumiso pya dziko ino, pikakamizo pya umaso wa ntsiku na ntsiku pabodzi na pinenso pya ungumi wathu ndi pinthu pingasi basi pinaphatisira iye towera kupungula phinga yathu.
5 Ndi thangwi yace, tisafunika kuwangisira towera kupitiriza na phinga yathu. Ndi pyakufunika kwa ife kukulisa “kufuna [kwathu] kwakutoma.” Pyenepi pisaphataniza kuleri mwakukhonda phonya na kunyerezera mwacidikhodikho Mafala a Mulungu, Biblya, na kukhala wakuphindula na masasanyiro onsene auzimu a “mbandazi wakukhulupirika na wanzeru.”—Apok. 2:4; Mat. 24:45, Mphangwa Zadidi; Sal. 119:97.
6 Ninga maprofesiya a Biblya asapangiza mwapakweca, ntsiku ya Yahova ya kufudza anthu akucita pyakuipa iri kufika duzi mwakucimbiza. (2 Ped. 2:3; 3:10) Na pyenepi m’manyerezero, tendeni tiwangisire towera tipitirize na phinga yathu ya utumiki, mbiticita khundu mwakukwana m’basa ya pa dziko yonsene yapantsi ya kumwaza mphangwa za Umambo na kucita anyakupfunza yakuti iri kuenda kutsogolo!