Phatisirani Mwadidi Ndzidzi Wanu Mu Utumiki

¹ Mwandimomwene pana pizinji pinafunika kucitwa mu utumiki wathu, na ndzidzi udasala ndi ung’ono. (Jwau 4:35; 1 Akor. 7:29) Na masasanyiro adidi pabodzi na kukhunganyika mwanyapantsi, tingakwanise kuphatisira khundu ikulu ya ndzidzi wathu mu utumiki.

² Khunganyikani: Mbamusati kuenda ku nsonkhano wa basa ya m’munda, onesesani khala muli na mabukhu anafuna imwe na nyerezerani mwadidi maperekero anu umboni. Nsonkhano unoyu ungamala na phembero, ndokoni mwakukhonda dembuka m’munda. Pyenepi pinadzacitisa kuti imwe na anaphata na imwe mucite pizinji mwakubverana na ndzidzi uli na imwe towera kucita utumiki wa m’munda.

³ Khala mwaphembiwa kuti mutsogolere nsonkhano wa utumiki wa m’munda, utomeseni pa ndzidzi wakuthema. Nsonkhano usafunika kukhala wacigwagwa—nkhabe funika kupiringana phindi 10 peno 15 tayu. Mbumusati kumwaza nsoka, onesesani khala m’bodzi na m’bodzi asadziwa kuti ndi kupi na mbani anafuna kuenda na iye kaphata basa.

⁴ Ndzidzi Unakhala Imwe Mu Utumiki: Nsonkhano wa kuenda ku basa ya m’munda ungamala, lekani dembuka mwakukhonda funika tayu, sakani njira ya kuenda ku cisa cinafuna phata imwe basa. Khala musafuna kusiya cisa mwakucimbiza, mungakwanise kucita masasanyiro anu a ca kufamba naco towera nsoka wakusala ukhonde buluka mwakucimbiza. Munaphata imwe basa na nsoka, mphyakufunika kunyerezera anango akuti panango asakudikhirani towera mumalise makani anu. Pyenepi pingakwanise kuphataniza kupangana mwanzeru munthu wakulonga maka peno kucita masasanyiro a ulendo wakubwereza kwa munthu unoyu adapangiza cifuno.—Mat. 10:11.

⁵ Munacita imwe maulendo akubwereza, mungakwanise kukoya ndzidzi mu kumenya ntokodzi kwa ale ali mu cisa ceneci mbumusati kuenda ku cinango. Menyerani ntokodzi anthu anango towera mukhale na cibaso cakuti ali panyumba peno nkhabe. (Mis. 21:5) Khala musafuna kucita ulendo wakubwerezera na musadziwa kuti munakhala ndzidzi wakuinjipa, citani masasanyiro akuti anango mu nsoka wanu amwaze mphangwa cifupi na imwe peno kucita ulendo unango wakubwereza.

⁶ Ife tikukhala mu ndzidzi wa kututa peno kubvuna kukulu kwauzimu. (Mat. 9:37, 38) Mwakukhonda dembuka basa inadzamala. Natenepa, cifuno cathu cisafunika kukhala ca kuphatisira mwadidi ndzidzi wathu mu utumiki.