Pinafunika Kukumbukirwa Pa Cikumbuso

Akulu a mpingo asafunika kutsalakana ntsonga zinatowerera izi mu kukhunganyikira Cikumbuso:

◼ Onesesani kuti pidzindikiro pikhonde kuperekwa dzuwa mbisati bira.

◼ Pasafunika kucitwa nkate na kugula vinyu ya ntundu wakuthema towera kupiphatisira.​​—⁠Onani Sentinela ya 15 de Fevereiro de 2003, tsa. 14-⁠15.

◼ Maparato, makopo akuikhira vinyu, meza yakuthema na nguwo yakuphimbira meza pisafunika kubwereswa pa mbuto ya cikumbuso mwanyapantsi.

◼ Nyumba ya Umambo peno mbuto inango inafuna kucitirwa cikumbuso isafunika kuceneswa mwadidi mwanyapantsi.

◼ Akalindi na anyakupereka pidzindikiro asafunika kusankhulwa mwanyapantsi na kupangwa basa yawo, njira inafuna iwo kuperekera pidzindikiro na kufunika kwa kukhunganyika mwadidi na kubvala nguwo zacilemedzo.

◼ Masasanyiro asafunika kucitwa towera kupereka pidzindikiro kwa akudzodzwa onsene akuti hadakwanisa tayu kubwera pa cikumbuso thangwi ya utenda.

◼ Khala mipingo mingasi inaphatisira Nyumba ya Umambo ibodzi ene, mipingo ineyi isafunika kubverana mwadidi towera anthu akhonde patana pa nsuwo, pa berere, pa cintalo, mu njira na pakuikha miotokala.

◼ Khala inaphatisirwa mbuto inango towera kucitira cikumbuso, onesesani khala panadzakhala pyakugaluza mafala pyadidi towera anyakubvesera onsene akwanise kubva pinalonga nyakukamba nkhani.