Bveserani Toera Muphindule
1. Thangwi yanji kuwangisira ndi kwakufunika toera kubvesera na kuphindula pa nsonkhano wa gawo?
1 Mwakukhonda dembuka unadzatoma nsonkhano wa gawo wa 2013. Mabasa mazinji akucitwa toera kukhunganya programu inalonga thangwi ya pyakufuna pya basa ya dziko yonsene yapantsi. Kodi mwacita masasanyiro toera kugumanika mu ntsiku zitatu za nsonkhano wa gawo? Misonkhano mikulu isadzudzumisa kakamwe, natenepa kuwangisira ndi kwakufunika toera kubvesera mwadidi programu. Nakuti makhundu ndi akulapha pang’ono kupiringana a misonkhano ya mpingo, pasafunikambo kubvesera mwakupfulika mu ndzidzi wakulapha. Mwakuthimizira, kucita ulendo, peno pinthu pinango pinacitisa kukhala akuneta kakamwe. Ninji pinafuna kudzatiphedza toera kukhala akupfulika kuti tibvesere na kuphindula?—Deut. 31:12.
2. Tinakhunganya tani ntima toera kuphindula na programu ya nsonkhano wa gawo?
2 Mbudzati Toma Nsonkhano Wa Gawo: Web site yathu yakudziwika, www.jw.org, isapangiza programu ya nsonkhano, yakuti isaphataniza misolo ya nkhani zonsene na lemba ibodzi peno mawiri a nkhani ibodzi na ibodzi. Khala tisaphatisira Interneti, kuona mwanyapantsi mphangwa zenezi kunadzatiphedza toera kukhunganya ntima wathu ku pinthu pinafuna kudzadingwa pa nsonkhano. (Esd. 7:10, Tradução do Novo Mundo) Pa Kulambira kwanu kwa Banja namaulo, munakwanisa kucedza pya nsonkhano toera anthu onsene a pa banja yanu akhale na cifuno cakugumanika pa nsonkhano wa gawo?
3. Ninji pinafuna kudzatiphedza toera kubvesera mwadidi?
3 Nkati Mwa Programu: Pingakwanisika mphyadidi kuenda ku maxarota programu mbidzati toma. Pontho mphyadidi kufunga ntokodzi wanu wa m’manja toera mukhonde kudzudzumiswa mungacemerwa peno mungatumizirwa mphangwa, peno imwe ene kuyesera kutumiza mphangwa kuna anango nkati mwa programu. Fungani ntokodzi wanu, bwezani volume toera mukhonde kudzudzumisa anango mungacemerwa. Mungaphatisira mitcini toera kubulusa mafoto nkati mwa programu, citani pyenepi mu njira yakuti nee munadzudzumisa anango. Calirani kudya peno kumwa nkati mwa programu. (Koel. 3:1) Yang’anisani m’bale anacita nkhani. Angaleri lemba towezerani m’Bhibhlya yanu. Mwacigwagwa lembani ntsonga zakufunika.
4. Anyakubala anaphedza tani anawo toera kubvesera na kuphindula?
4 Tisafunambo kuti anathu abvesere toera aphindule. Misangani 29:15 isalonga: ‘Mwana angasiyiwa ekhene anadzapasa mace manyadzo.’ Natenepa, mphyadidi kuti mabanja akhale pabodzi pene toera anyakubala akwanise kuonesesa kuti anapiana awo akubvesera mwadidi programu mbuto mwakucedza, kulemba mphangwa mu ntokodzi, peno kufamba-famba. Ngakhale kuti ndi ang’ono kakamwe toera kubvesesa pyonsene pinalongwa, anapiana anakwaniswa kupfundziswa toera kukhala pantsi mwakupfulika nee kuodzira.
5. Thangwi yanji mphyakuphindulisa kudinga programu, pontho tinacita tani pyenepi?
5 Pakumala Kwa Programu Ya Ntsiku Ibodzi Na Ibodzi: Lekani kudembuka. Gonani nakweru toera mupume mwadidi. Kudinga pontho pidabva imwe kunadzakuphedzani toera kupikumbukira mu ndzidzi uzinji. Natenepa, mphyadidi kukhala pabodzi ninga banja m’mphindi zingasi toera kucedza pya programu maulo onsene. Mungaenda ku restauranti pabodzi na axamwali anu, ndiye tani kukwata ntsonga zidalemba imwe toera kucedza ntsonga ibodzi peno ziwiri zidakukomerani? Mungabwerera kunyumba pakumala kwa nsonkhano, mphyadidi kuphatisira ndzidzi ungasi nkati mwa Kulambira kwanu Kwa Banja namaulo mbamucedza kuti munaphatisira tani mphangwa zenezi ninga banja. Munakwanisambo kukoya ndzidzi masumana onsene toera kudinga mabukhu mapswa adabuluswa.
6. Kodi pyakukwana kugumanika basi pa nsonkhano wa gawo? Fokotozani.
6 Phwando isaphindulisa khala munthu adya mbakhurudzika. Ndi sawasawambo na phwando yauzimu inafuna kudzacitwa pa nsonkhano wa gawo. Tiphinduleni kakamwe mu kugumanika pa programu yonsene ya nsonkhano wa gawo, kubvesera mwacidikhodikho mbatiphatisira pinafuna ife kupfundza.
[Bokosi pa tsamba 3]
Pikumbuso Pya Nsonkhano Wa Gawo Wa 2013
◼ Midzidzi Ya Nsonkhano: Misuwo inadzafungulwa pa ndzidzi 7:00 wa kumacibese. Mu ntsiku zitatu za nsonkhano, nyimbo zamalimba zinadzatoma pa ndzidzi 8:20. Pa ndzidzi unoyu, tonsene tisafunika tikhale m’mipando yathu toera nsonkhano utome mu njira yakulemedzeka. N’Cixanu na n’Sabudu, nyimbo na phembero yakumalisa inadzacitwa pa ndzidzi 3:50 wakumaulo, mbwenye n’Dimingu inadzacitwa pa ndzidzi 2:35 wakumaulo.
◼ Pakuikha Miotokala: Pa mbuto zonsene za nsonkhano wa gawo zinatawiriswa ife kuikha miotokala, ale akuti ali na miotokala yawo anadzaiikha mwakukhonda lipa mwakubverana na ndzidzi unafika iwo. Nakuti mbuto zakuikha miotokala ndi zakucepa, pinakhala pyadidi anthu azinji kuphatisira motokala ubodzi ene pingakwanisika.
◼ Kukoya Mbuto Zakukhala: Mbuto zingakwanise kukoyerwa basi ene ale anaenda na imwe m’motokala ubodzi ene, ale anakhala na imwe panyumba ibodzi ene peno ale anacitira imwe pfundziro ya Bhibhlya.—1 Akor. 13:5.
◼ Cakudya Camasikati: Taphata miyendo bweresani cakudya canu camasikati kuti mukhonde kusiya mbuto ya nsonkhano wa gawo toera kuenda kasaka cakudya pa ndzidzi wakupuma. Mungakwanise kuphatisira sestu ing’ono yakuti munakwanisa kuikoya pantsi pa mpando wanu. Nkhabe tawiriswa kuphatisira masestu makulu anaphatisira ife pa kaphwando na acibale peno pyombo pya vidru pa mbuto ya nsonkhano wa gawo.
◼ Pyakupereka: Ife tingakwanise kupangiza kupereka kwathu takhuta mukucita pyakupereka pyathu mwaufulu pa nsonkhano wa gawo toera kuphedza basa ya dziko yonsene yapantsi. Cheque zonsene zinaperekwa pa nsonkhano wa gawo zisafunika kulembwa mu dzina ya “Associação das Testemunhas de Jeová de Moçambique.”
◼ Mitombwe: Khala mwalemberwa mitombwe na dotoro toera kumwa, taphata miyendo onesesani toera kukwata mitombwe ineyi, nakuti pa nsonkhano wa gawo nkhabe kudzagumanika mitombwe.
◼ Ntsapato: Mphyadidi kusankhula ntsapato zakuthema, zakukwana mwadidi zakuti zinadzakuphedzani toera kufamba mwadidi.
◼ Formularyu Queira Visitar (S-43): Tisafunika kuphatisira formularyu yakuti Queira Visitar (S-43) toera kulemba mphangwa za onsene adapangiza kukomerwa thangwi ya umboni wantsusukano udapereka ife nkati mwa nsonkhano wa gawo. Munakwanisa kupereka maformularyu akulembwa ku Mbuto Inakoyerwa Mabukhu peno kuna mulembi wa mpingo wanu mungabwerera ku nsonkhano.
◼ Restauranti: Pasani mbiri dzina ya Yahova kubulukira ku makhaliro anu adidi pa marestauranti. Bvalani mu njira inapangiza kuti ndimwe Nkristu. Simbani anyabasa a mu restauranti idafikira imwe.
◼ Masasanyiro A Mbuto Zakugona: Ntsiku za nsonkhano wa gawo mbizisati kufika, Departamentu Ya Masasanyiro A Mbuto Zakugona isatoma phata basa toera kucita masasanyiro a kutsalakana onsene anaphemba pakugona. Masasanyiro anewa asathimizira kutsandzaya kwa kukhala pabodzi ninga Akristu. Mbwenye, kudziwa kuti pinthu pyonsene pisafunika pifambe ‘mwakuthema na mwakundendemera’, pontho kuti pyenepi pisaphataniza ukhali wadidi wa anango, pasafunika pikumbuso pingasi. Ale akuti ndi alendo panyumba za abale asafunika kukomerwa na pire pinapaswa iwo pabodzi na kubverana mu pinthu pinaphembwa iwo. Pontho, citani pyonsene toera musiye kwartu yakucena ntsiku zonsene mbumusati kuenda ku nsonkhano, pontho pakupangana toera kubwerera kunyumba. Kukhala mulendo panyumba ya m’bale nkhabe malisa basa yathu yakusaka pyakudya pyathu pyene na motokala wa kuenda nawo ku nsonkhano. Natenepa, m’bodzi na m’bodzi asafunika kucita masasanyiro ace. Kubverana na kubvesesa kwanu mu pinthu pyenepi kunadzacitisa mwanaciro nyumba kupangiza khodzo yace mwakufuna, tayu mwakukakamizika. Midida ineyi isaphatisirwambo kwa ale anafikira pa mbuto ya nsonkhano. Iwo asafunika kubverana na akalindi toera kusiya mbuto ya nsonkhano wa gawo yakucena ntsiku zonsene.—1 Akor. 14:40, Chiverano Chachinchino.
◼ Basa Yakuperekeka: Munthu anafuna kuphedza asafunika kulonga na Departamentu ya Basa Yakuperekeka pa nsonkhano wa gawo. Ana akukhonda kukhala na pyaka 16, anakwanisambo kuphedza mwadidi mukuphata basa cifupi na anyakubalawo, cifupi na nyakuaonera peno cifupi na munthu wathunga adatawiriswa na anyakubala toera kuaonera.
◼ Ubatizo: Anyakufuna kubatizwa asafunika akhale pa mbuto idasankhulwa, programu mbidzati kutoma n’Sabudu namacibese. Onsene adatawirwa toera kubatizwa asafunika kubweresa nguwo zakuthema za ubatizo na tuwalya. M’midzidzi yakale anango akhabvala nguwo zakukhonda thema zakuti zikhadodomesa ndzidzi wa ubatizo. Akulu a mpingo angacita mibvundzo ya ubatizo m’bukhu ya Organizados, asafunika kuonesesa khala anyakufuna kubatizwa abvesesa mwadidi nkhani ineyi pabodzi na midida ya Bhibhlya inalonga pyenepi.