“Gumanyiza Anthu”
1. Kodi misonkhano ya gawo na ya dziko yonsene yalandana tani na kugumanyikana kwakutsandzayisa kudacita Aisraele pidamala iwo kwene kubuluka mu Ejito?
1 Pidamala iwo kwene kubuluka mu Ejito, Yahova apanga Mose toera “kugumanyiza anthu” pa Phiri ya Sinai kuti abve mafala Ace toera akwanise Kungopa na kupfundzisa anawo njira Zace. (Deut. 4:10-13, Tradução do Novo Mundo) Unoyu ukhali ndzidzi wakutsandzayisa kakamwe na wakuwangisa cikhulupiro! Mu nthanda zinatowerera, atumiki a Yahova anadzagumanyikana m’misonkhano ya gawo na ya dziko yonsene toera kupfundziswa na Yahova. Tisafunika kucitanji toera kuphindula kakamwe?
2. Tisafunika kucitanji toera ‘kukhunganyika’ nsonkhano wathu wa gawo?
2 “Khunganyikani”: Yahova apanga Aisraele kuti ‘akhunganyike’ toera kugumanika pa nsonkhano unoyu pa Phiri ya Sinai. (Eks. 19:10, 11) Munjira ibodzi ene, kukhunganyika mwadidi ndi kwakufunika kwa onsene anafuna kugumanika pa nsonkhano wa gawo, tayu basi kwa ale anafuna kudzacita khundu mu programu. Mwacitsandzo, azinji anadzafuna kubulusa ferya kubasa kwawo. Panango makhaliro anu ndi akulandana na a Nehemiya. Iye akhafuna kusiya basa yace ninga nyakupereka pyakumwa kuna Mambo Artaksersi, toera kuenda ku Yerusalemu kuti akaphedze kumangwa papswa kwa malinga, mbwenye iye akhadziwa kuti panango mambo nee mbadatawira. Nehemiya acita phembero, buluka penepo mwacipapo acita phembo yace mu kuphatisira mafala adidi. Mambo antawirisa kuenda, ngakhale kumpasa ciphedzo toera kutsalakana basa yakumanga. (Neh. 2:1-9) Kusiyapo kuphemba ferya kuna patrau wanu, mwacita kale masasanyiro a ulendo wanu na panafuna imwe kufikira? Akulu a mpingo anadzakomerwa kuphedza ale anafuna ciphedzo. Citani masasanyiro toera kufika nakweru, na kukhunganyika toera ‘kubvesera mwacidikhodikho’ pinafuna imwe kubva.—Aheb. 2:1.
3. Ninji cinafuna kutiphedza kukhunganya ntima wathu ku programu ya nsonkhano?
3 Khundu inango ya kukhunganyika kwathu ndi kukhunganya ntima wathu toera kubvesera na kupfundza. (Esd. 7:10) Programu ya nsonkhano inadzaikhwa mwanyapantsi mu Web site jw.org, pontho inadzapangiza misolo ya nkhani zonsene na lemba ibodzi peno mawiri a ntsonga zikulu za nkhani ibodzi na ibodzi. Zenezi ndi mphangwa zadidi toera kuzidinga pa Kulambira kwathu kwa Banja namaulo m’masumana anatowerera nsonkhano wathu wa gawo. Amwazi mphangwa anango asadhinda ndandanda mbaiphatisira toera kuona ntsonga zingasi zinafuna kudingwa pa nsonkhano.
4. Kodi anyakubala anaphatisira tani nsonkhano wa gawo toera kupfundzisa anawo?
4 ‘Pfundzisani Ananu’: Cifuno cibodzi ca nsonkhano udacitwa pa Phiri ya Sinai cikhali kuti anyakubala Aisraele ‘apfundzise anawo.’ (Deut. 4:10) Nsonkhano wa gawo usapasa anyakubala, mwai wakufunika kakamwe toera kucita pibodzi pyene. Anyakubala asafunika akhale pabodzi pene na anawo nkati mwa nsonkhano na kuaphedza toera kubvesera mwadidi. Pakumala kwa ntsiku ibodzi na ibodzi ya nsonkhano, peno mu ntsiku za ntsogolo pa kulambira kwawo kwa banja, mabanja anakwanisa kudinga pabodzi pidapfundza iwo.
5. Tinaphindula tani kubulukira mu kugumanika pa nsonkhano unafuna kudza?
5 Nsonkhano ukulu udacitwa pa Phiri ya Sinai, waphedza Aisraele toera kupasa ntengo mwai wawo wakupambulika wakukhala mbumba ya Mulungu. (Deut. 4:7, 8) Nsonkhano wathu wa gawo unafuna kudza uli na cifuniro cakutiphindulisa mu njira ibodzi ene. Mu ntsiku zitatu, tinadzakwanisa kukhala kunja kwa dziko ya Sathani, na kutsandzaya na ciwangiso cauzimu pabodzi na kugumanyikana kwakuwangisa mu paradizu yathu yauzimu. (Iza. 35:7-9) Nakuti ntsiku ya Yahova iri cifupi kakamwe, nee tisafunika kuduwala mwai unoyu toera kusonkhana na kuwangisana!—Aheb. 10:24, 25.