Pyakugumana napyo

◼ Australia: John, mamuna wa makhaliro adidi, akhaenda ku gereja mu uwana wace, mbwenye adzakhala “wakukhonda khulupira Mulungu.” Mpainiya m’bodzi ansiyira bruxura, A Vida​—Teve um Criador? Buluka penepo, paulendo waciwiri iye asiya bruxura, Origem da Vida. M’bale unoyu apitiriza kukulisa cifuno cace mu kumbweresera marevista mapswa na kumpangiza misolo yonsene inalonga pya kucitwa peno maprofesiya a Bhibhlya. Mudaona iye kuti John akhapangiza cifuno, iye angawira bukhu, A Bíblia​—Palavra de Deus ou de Homem? Pakumala kuileri, John atoma kudzindikira ekhene kuti iye akhali “nyakukhonda khulupira Mulungu wa maonero adidi.” Buluka penepo, mpainiya aphatisira bukhu Biblya Isapfunzisanji, mbapangiza John ndima 8 pa tsamba 20 na ndima 13-16 pa matsamba 23-24. Malemba anagumanika mu ndima zenezi akhuya kakamwe John, iye alonga, “Panango mphyadidi ndidinge pontho Bhibhlya.”

◼ Mexiko: Mamuna unango apanga m’mwazi mphangwa kuti iye nee asakhulupira kuti Bhibhlya ndi yakupumirwa na Mulungu. M’mwazi mphangwa aperekeka toera kumuonesa pipangizo pyakuti Bhibhlya ndi yakupumirwa. Pakumala kucedza m’maulendo mangasi, ntima wa mamuna unoyu watoma kukhuyiwa na pikhapfundza iye m’Bhibhlya. Makamaka, iye akhuyiwa kakamwe pidapfundza iye pya midida ya Mulungu. Iye apanga m’mwazi mphangwa: “Pakutoma, pikhaleri ife pabodzi Bhibhlya, ndikhaiona ninga ndi uphungu wakulandana na wa mabukhu anango, pontho nee ikhandikhuya. Mbwenye cincino, tingaileri, makamaka uphungu wayo unalonga pya makhaliro adidi, isakhuya ntima wanga.”

◼ Estados Unidos: Pikhapereka iwo umboni mu nzinda wakuthambaruka kakamwe, banja ibodzi yagumana nkazi adabuluka ku Taiwani wakuti akhakhulupira Mulungu, mbwenye akhaona kuti Bhibhlya ndi ya Azungu. Iye aenda pa mbuto ikhagawira iwo mabukhu thangwi akhanyerezera kuti ataika, ngakhale kuti iye akhali na umaso wadidi. Iye akhadikhira kuti Bhibhlya mbidamphedza toera kugumana cifuniro mu umaso. Banja yatoma kupfundza na nkazi unoyu mu kuphatisira bukhu Biblya Isapfunzisanji pabodzi na bruxura, Como Ter Verdadeira Paz e Felicidade. Mbuto mwakupfundza nsolo 2 wa bukhu, iwo adinga mu bruxura khundu yakuti, “Um guia prático para beneficiar toda a humanidade.” Pidamala iwo kudinga ndima zitanthatu zakutoma za khundu ineyi, nkazi unoyu alonga mwakudzumatirwa kuti Bhibhlya ndi yakupambulika mwakulandaniswa na mabukhu anango a mauphemberi. Pakumala kudinga maprofesiya a Bhibhlya akuti asakwanirisika, iye alonga: “Nkhabepo bukhu inango yakuti ndinakwanisa kuiona kukhala yakundendemera ninga Bhibhlya!”

◼ Japau: Ngakhale kuti mamuna unango apanga m’bale kuti iye nkhabe khulupira Mulungu, m’bale apitiriza kucita maulendo akubwereza a cigwagwa kwa iye, mbadinga naye misolo ya mu Despertai! yakuti, “Teve um Projeto?” Mwapang’ono na pang’ono mamuna unoyu acinja maonero ace mbatoma kutawira kuti panango Nciti alipo. Cincino iye asakhulupira kuti Mulungu alipo, pontho, m’bale akupfundza naye mu kuphatisira bruxura Mphangwa Zadidi Za Mulungu!

◼ Kanada: Mulongo m’bodzi agawira marevista mapswa kuna nkazi wakuti akhabuluka panyumba kuenda kuna motokala wace. Pidabwerera mulongo pa ntsiku ibodzi ene, nkazi apanga mulongo kuti nee ali na cifuno, pontho nee asakhulupira Mulungu. Mulongo atonga kukhonda bwerera nduli, mbwenye ambweresera bruxura, Como Ter uma Vida Satisfatória. Pidagumana iye nkazi unoyu panyumba, mulongo ampanga kuti maseze akhadziwa kuti nee asakhulupira Mulungu, iye akhanyerezera kakamwe pya iye thangwi akhakuza ekhene ana. Iye ampangiza ndima 6 pa tsamba 4 ya bruxura ineyi, inalonga kuti tinagumana kupi uphungu wadidi. Buluka penepo, awangisa nkazi unoyu toera kuleri maonero anagumanika pa nsolo 2 unalonga pya kukuza ana. Nkazi unoyu atambira bruxura mwakukomerwa kakamwe.