Kugawira Marevista—Kusaphedza Toera Kutomesa Mapfundziro a Bhibhlya

1. Thangwi yanji gulu ya Yahova isakulumiza amwazi mphangwa toera kukhala na anthu anatambira marevista pa nthanda?

¹ Anthu azinji nkhabe cifuno ca kupfundza Bhibhlya na ife, mbwenye asakomerwa kuleri marevista athu. Natenepa, gulu ya Yahova isakulumiza amwazi mphangwa toera kukhala na anthu anatambira marevista pa nthanda. Anthu angaleri marevista athu mwakubwereza-bwereza, kazinji kene asakulisa cifuno cawo ku Mafala a Mulungu. (1 Ped. 2:2) Pakumalisa, pinthu pinaleri iwo pisaakulumiza toera kutawira pfundziro ya Bhibhlya.

2. Tinakulisa tani cifuno ca ale anagawira ife marevista pa nthanda?

² Thirirani Mbeu Za Undimomwene: Mbuto mwakugawira kwene marevista mbamubwerera pyanu, cedzani na mwanaciro nyumba, pontho yeserani kukulisa uxamwali na iye. Pyenepi pinadzakuphedzani kudziwa makhaliro ace, pifuno pyace, na pinakhulupira iye, pyakuti pinadzakucitisani kulonga mwandzeru. (Mis. 16:23) Khunganyikani toera kucita ulendo onsene wakubwereza. Pingakwanisika, gomezerani ntsonga na lemba inagumanika m’marevista, mbamuthirira mbeu za undimomwene muntima mwace. (1 Akor. 3:6) Lembani ntsiku idacita imwe ulendo wakubwereza, bukhu idagawira imwe, ntsonga idacedza imwe, na lemba idaleri imwe.

3. Tisafunika kubwerera kangasi kwa ale anagawira ife marevista pa nthanda?

³ Tisafunika Kubwerera Kangasi? Musafunika kubwerera kabodzi pa nthanda toera kugawira marevista mapswa kwa ale anagawira imwe marevista pa nthanda. Ngakhale tenepo, mwakubverana na makhaliro anu na cifuno ca munthu, munakwanisa kubwerera kazinji kene pa nthanda. Mwacitsandzo, pakupita sumana ibodzi peno mawiri pakumala kusiya marevista, munakwanisa kubwerera mbamulonga: “Ndabwera toera kukupangizani mwacigwagwa cinthu cibodzi m’marevista adakusiyirani ine.” Pyenepi pinadzacitisa mwanaciro nyumba kukhala na cifuno cakuleri nsolo unoyu. Khala iye auleri kale, munakwanisa kumphemba toera alonge maonero ace thangwi ya nsolo unoyu, na kucedza naye mwacigwagwa. Pontho, khala iye asakomerwa kuleri mabukhu athu, munakwanisa kubwerera mbamungawira tratado, bruxura, peno bukhu inagawira ife mu nthanda ineyi.

4. Tinakwanisa kucitanji m’midzidzi inango toera kuona khala ale anagawira ife marevista pa nthanda ali na cifuno ca kupfundza Bhibhlya?

⁴ Lekani kudikhira mwanaciro nyumba akuphembeni pfundziro. Khalani wakutoma. Maseze iye akhonda kale kupfundza Bhibhlya, m’midzidzi inango munakwanisa kumpangiza nsolo wakuti: “Kutawirwa kwa mibvundzo ya Bhibhlya” inagumanika mu Ncenjezi, na kuona khala iye ali na cifuno ca kudinga na imwe nsolo unoyu. Panango munakwanisa kutomesa pfundziro pa nsuwo wa mwanaciro nyumba. Mbwenye mungacimwana kutomesa pfundziro, munakwanisa kupitiriza kumbweresera marevista toera kukulisa cifuno cace.