Kuthimizira Maluso Athu Mu Utumiki​—Kukulisa Cifuno Ca Ale Anapasa Ife Marevista Nthanda Zonsene

Thangwi Yanji Mphyakufunika: Anthu azinji analeri marevista athu nkhabe cifuno cakupfundza Bhibhlya na ife. Panango asafuna kakamwe uphemberi wawo, peno asapibva kuti nkhabe ndzidzi wakupfundza. Mbwenye, munaleri iwo marevista athu ndzidzi onsene, anakwanisa kukhala na cifuno cikulu ca Mafala a Mulungu. (1 Ped. 2:2) Iwo anakwanisa kugumana nsolo unango wakuti unakhuya mitima yawo peno makhaliro awo anakwanisa kucinja. Kuacedzera ndzidzi onsene mu phindi zakucepa kunaabalangaza na kutiphedza kudziwa pifuno na pinthu pinaadzudzumisa. Mukupita kwa ndzidzi pfundziro ya Bhibhlya inakwanisa kutomeswa.

Tinacita Tani Pyenepi:

• Nthanda zonsene, sakani ndzidzi toera kuenda kaapasa marevista mapswa a Ncenjezi na Despertai! Panango munakwanisa kuacedzera pa ndzidzi unango nkati mwa nthanda toera kukulisa cifuno cawo cakuleri nsolo unango wa marevista adansiyira imwe peno toera kuapasa mabukhu anagawirwa mu nthanda ineyi. Lembani mwadidi pyonsene pidacita imwe.​—Onani Utumiki Wathu wa Umambo wa Thongwe wa 2014, tsa. 3.

• Khunganyikani toera kucita maulendo onsene akubwereza. Mbuto mwa kusiya basi marevista, cedzani na mwanaciro nyumba na yeserani kucita naye uxamwali toera kukulisa cifuno cace.

• Sakani miyai toera kutomesa pfundziro. Munthu anapasa imwe marevista nthanda zonsene angakucitani mbvundzo thangwi ya ntsonga inango ya m’Bhibhlya, m’bweresereni bukhu ya pfundziro yakuti isatawira mbvundzo wace. Mbamudzati kubuluka, citani mbvundzo wakulandana na ntsonga ikhadinga imwe na utawireni pa ulendo wakubwereza. Mungacedza mwakukhonda phonya ngakhale m’mphindi zingasi basi mukuphatisira Bhibhlya peno ibodzi mwa mabukhu anaphatisira ife toera kucitisa mapfundziro, mukucitisa pfundziro ya Bhibhlya. Kodi mwapasa mwanaciro nyumba bruxura Mphangwa Zadidi mbamumpangiza mwacigwagwa pfundziro ya Bhibhlya? Mwampangiza mavidyu Thangwi Yanji Tisafunika Kupfundza Bhibhlya? na Kodi Pfundziro ya Bhibhlya Isacitwa Tani? Maseze munthu nee atawira pfundziro pakutoma, mbwenye makhaliro asacinja. Kodi pinakhala pyakuphedza kwa imwe kuyesera pontho?

Yeserani Kucita Ipi Nkati Mwa Nthanda:

• Citani ndandanda wa ale anatawira kutambira marevista nthanda zonsene. Apaseni marevista mapswa na apangeni kuti munadzabweresa anango angafika.