Bokosi Ya Mibvundzo

◼ Kodi amwazi mphangwa asafunika kuphatisira kakamwe Interneti toera kupereka umboni peno kupfundza na anthu anakhala m’madziko anango?

Amwazi mphangwa anango asaphatisira Interneti toera kugumana mapfundziro a Bhibhlya m’madziko akuti basa yathu isakhondeswa peno akuti ali na amwazi mphangwa akucepa. Midzidzi inango, asagumana maphindu. Mbwenye, pana ngozwi amwazi mphangwa angatumizirana mphangwa mukuphatisira e-mail toera kucedza na anthu a madziko anango. (Onani Utumiki Wathu Wa Umambo wa Maluwa 2007 tsa. 7) Maseze cifuno cathu ndi kugumana anthu a mitima yadidi na mphangwa za Umambo, kucedza kweneku kunakwanisa kutsogolera m’bale peno mulongo kucita uxamwali wakuipa, kuphatanizambo kucedza na anyakupanduka. (1 Akor. 1:19-25; Akol. 2:8) Mwakuthimizira, madziko akuti basa ya Umambo ikutcingwa peno kukhondeswa, panango matsamba akutumizwa asatoma kuoniwa na atongi. Kucedza kweneku mbukudaikha pangozwi abale na alongo athu a n’dziko ineyi. Natenepa, amwazi mphangwa nee asafunika kuphatisira Interneti toera kusaka anthu a m’madziko anango toera aamwazire mphangwa zadidi.

Kusiyapo kupangwa na ofesi ya filiali ya dziko yathu, khala ife tapereka umboni wantsusukano kuna munthu wa dziko inango wakuti ali n’dziko yathu, nee tisafunika kuyesera kukulisa cifuno cace angabwerera ku dziko yace, mbuto mwace, tinakwanisa kumpangiza kuti anakwanisa tani kuphatisira jw.org toera kugumana mphangwa zakuthimizirika peno anakwanisa tani kulonga na ofesi ya filiali ya dziko yace. Tinakwanisambo kumuwangisa toera kuenda ku Nyumba ya Umambo cifupi na kunakhala iye. Ndimomwene kuti m’madziko anango nkhabemo Nyumba za Umambo. Khala iye asafuna kucedzerwa na Mboni za Yahova mu dziko inakhala iye, ife tisafunika kulemba formularyu Queira Visitar (S-43) na kuipereka kuna mulembi wa mpingo, wakuti anadzaitumiza mukuphatisira jw.org. Ofesi ya filiali ya n’dziko inakhala munthu adapangiza cifuno isadziwa mwadidi makhaliro a dziko ineyi na pinakhala pyakukhonda nentsa kuna iwo kupereka ciphedzo cauzimu kuna munthu unoyu.​—Onani Utumiki Wathu Wa Umambo wa Khoni 2014 tsa. 7, na Utumiki Wathu Wa Umambo wa Bingu 2011 tsa. 2.

Khala munthu anacedzera ife cincino afuluka kuenda dziko inango peno khala cincino tisapfundza na munthu wa dziko inango wakuti tisadziwana naye mu Interneti basi, tisafunika kutowezera pitsogolero pidalongwa padzulu apa. Mbwenye, tinapitiriza kukulisa cifuno mpaka angapita ncibverano na amwazi mphangwa a n’dziko yace. Khala munthu adapangiza cifuno akukhala n’dziko yakuti basa yathu ikutcingwa peno kukhondeswa, tisafunika kucita mpholemphole tingacedza mphangwa za Bhibhlya mukuphatisira matsamba, ntokodzi peno njira zinango.​—Mat. 10:16.