Bokosi Ya Mibvundzo

◼ Mbani asafunika kulemba makuponi na maphembo a Interneti?

Kazinji kene mabukhu athu ali na makuponi akuti anakwaniswa kulembwa na kutumizwa ku ofesi ya filiali toera kuphemba mabukhu peno kuphemba kucedzerwa na Mboni za Yahova. Mwakuthimizira, Mbuto yathu ya Interneti www.watchtower.org inakwaniswa kuphatisirwa toera kuphemba pfundziro ya Bhibhlya. Masasanyiro anewa asaphedza anthu azinji toera kupfundza undimomwene. Mbwenye pasaoneka madodo pa ndzidzi unaphatisira amwazi mphangwa maferamentu anewa toera kucita masasanyiro kwa acibale awo peno kwa anthu anango toera atambire ciphedzo cauzimu.

Anango adatumizirwa na ofesi ya filiali mabukhu adakhonda iwo kuphemba adungunya, mbanyerezera kuti gulu yathu ikuwanentsa, pontho mbanyerezera kuti filiali yaaikha pa ndandanda wa anthu toera kuatumizira mabukhu. Amwazi mphangwa adatambira tsamba toera kucedzera munthu wakuti nee acita phembo toera kucedzerwa akhala akunentseka pa ndzidzi wakuti munthu akhafuna iwo kucedzera apangiza kuipirwa. Natenepa, maphembo anacitwa m’Mbuto yathu ya Interneti peno mu kuphatisira makuponi asafunika kucitwa na anthu adapangiza cifuno, tayu amwazi mphangwa kucitira anthu anewa. Pingaoneka kuti maphembo anewa acitwa toera kuphedza munthu unango, filiali nee inadzatawira maphembo anewa.

Mphapo, tinakwanisa tani kuphedza mwauzimu acibale peno anthu anango? Khala musafuna kuti munthu unoyu atambire mabukhu, thangwi yanji imwe nkhabe kuntumizira mabukhu anewa ninga muoni? Khala iye apangiza cifuno, pontho asafuna kucedzerwa na Mboni za Yahova mbwenye imwe nkhabe dziwa kuti munapita tani n’cibverano na akulu a mpingo wa pacisa, musafunika kulemba formularyo Queira Visitar (S-43) mbamupasa mulembi wa mpingo wanu, iye anadzaitambira na kuitumiza ku ofesi ya filiali. Mbwenye, khala munthu adapangiza cifuno asagumanika nkaidi, m’mbuto zinaphedzwa anthu toera kusiya nsambo wa kumwa mitombwe yakuledzeresa, peno mu nyumba yaungumi, imwe nee musafunika kupita n’cibverano na ofesi ya filiali toera iphedze munthu unoyu. Mbuto mwace, musafunika kumuwangisa toera apite n’cibverano na abale anacedzera mbuto zenezi peno alembere ekhene ofesi ya filiali.