Yezu Apfundzisa Anyakupfundzace Kucita Phembero

Afarisi akhafuna kakamwe kuoniwa na anthu. Iwo akhacita pinthu pyadidi basi ene toera aoniwe na anango. Iwo akhaphembera pakweca toera anthu aaone. Afarisi akhakoya munsolo maphembero akulapha mbaacita m’masinagoga na n’khundu mwa miseu, mbuto zakuti mbadabviwa na anango. Na thangwi ineyi, anthu adzumatirwa na pidaapanga Yezu kuti: ‘Lekani kuphembera ninga Afarisi. Iwo asanyerezera kuti Mulungu anatunduka thangwi yakuphatisira mafala mazinji, mbwenye nee ndi tenepo. Phembero ndi kulonga na Yahova. Lekani kulonga mafala mabodzi ene pakucita phembero. Yahova asafuna kuti mumpange mabvero anu.’

Yezu athimiza: ‘Musafunika kuphembera tenepa: “Babathu muli kudzulu, dzina yanu mbiceneswe. Umambo wanu mbudze. Cifuno canu cicitwe pantsi pano ninga kudzulu.”’ Yezu aapangambo kuti asafunika kucita phembero thangwi ya cakudya, toera kulekererwa madawo, pontho mbadakwanisa kuphembera thangwi ya pinthu pyawo.

Yezu alonga: ‘Lekani kusiya kuphembera. Pitirizani kuphemba pinthu pyadidi kuna Babanu, Yahova. Nyakubala onsene asafuna kupasa pinthu pyadidi mwanace. Mwananu angaphemba nkate, munampasa mwala? Angaphemba ntsomba, munampasa nyoka?’

Buluka penepo, Yezu alonga: ‘Khala musadziwa kupasa ananu pinthu pyadidi, Babanu Yahova nee anadzakupasani nzimu wakucena? Imwe basi ene musafunika kuphemba.’ Musatowezera pidalonga Yezu pakucita phembero? Ndi pinthu pipi pinalonga imwe pakucita phembero?