KODI IMWE MUKHAPIDZIWA?

Ninga Pinalongwa m’Bhibhlya, Mafala Akuti “Nyakukhonda Kubala” Asabvekanji?

Midzidzi inango, mafala anewa asabveka munthu wakukapaliwi. M’midzidzi ya Bhibhlya, amuna anango akhakapaliwi ninga kutcinyuswa peno toera kucitwa mabitcu. Amuna akunyindirika akukapaliwi akhaonera akazi a pa nyumba ya mambo. Mwacitsandzo, amuna akukhonda kubala ninga Hagai na Susagaze akhatumikira ninga anyakuonera akazi na anyagrinya a Mambo Aswero wa ku Persiya, wakuti panango asadziwika na dzina ya Xerxes I.​—Estere 2:3, 14, NM.

Mwandimomwene, si onsene tayu analongwa m’Bhibhlya anyakukhonda kubala akuti ndi akukapaliwi. Anyakupfundza anango alonga kuti mafala anewa asaphatisirwambo mu njira zinango toera kulonga munthu wa cidzo anaphata basa pa nyumba ya mambo. Maonero anewa akhali akulinganira thangwi ndi mafala adaphatisirwa kwa Ebedemeleke xamwali wa Yeremiya na munthu wa mbiri wa Etiopya adamwazirwa mphangwa na Filipi. Mwandimomwene, Ebedemeleke akhali na cidzo cikulu pa nyumba ya mambo, pontho akhalonga na Mambo Zedekiya nkhope na nkhope. (Yeremiya 38:7, 8) Munthu wa mbiri wa Etiopya asalongwa ninga nyakuonera mpfuma wakuti ‘akhadaenda ku Yerusalemu kalambira Mulungu.’​—Machitiro 8:27.

Thangwi Yanji Akumbizi M’midzidzi Ya Bhibhlya Akhapambula Mabira Na Mbuzi?

Thangwi ya kutongwa kwa ntsogolo, Yezu alonga: ‘Pa ndzidzi ule Mwana wa munthu angadzabwera mu mbiri yace, . . . anadzapambula anthu ninga munapambulira nkumbizi mabira na mbuzi.’ (Mateo 25:31, 32) Thangwi yanji akumbizi andimomwene mbadafunika kupambula pinyama pyenepi?

Kazinji kene, mabira na mbuzi pikhabvungazwa mbipidyeswa pabodzi kungaca. Kungadoka pikhaikhwa n’thanga yakuti ikhatsidzikidza ku pikala, mambava na kuthondola kwa kudambo. (Genesi 30:32, 33; 31:38-40) Pinyama pyenepi pikhaikhwa n’thanga yakusiyana toera kutsidzikiza mabira akupfulika makamaka mathunzwi na ana a mabira thangwi mbadaphekeswa na mbuzi zaukali. Bukhu ya All Things in the Bible yalonga, “Akumbizi akhapambulambo mabira na mbuzi mu ndzidzi, wakukama nkaka, na wakugwanda uweya.” Nsangani unoyu wa Yezu wabuluswa mu pinthu pikhacitwa na anthu a mu Israele wakale, thangwi kukumbiza mabira kukhacitwa na anthu azinji.