Kufendedzera Mulungu Ndi Kwadidi Kwa Ine
PIKHALI ine na pyaka 9 pyakubalwa, ndalimira kukula. Pyenepi pyacitika ku Costa do Marfim, lero ndiri na pyaka 34 pyakubalwa, cimo canga ndi ca metru ibodzi basi. Pidadzindikira anyakubala anga kuti nee mbidalaphabve, andiwangisa toera kuphata basa mwakuwanga toera ndikhonde kunyerezera kakamwe pya cimo canga. Ndaikha cidade cakugulisira misapo kutsogolo kwa nyumba yathu, mbanditsalakana mbuto ineyi toera ikhale yakucena. Pyenepi pikhatundusa anyakugula azinji.
Mwandimomwene, kuphata basa mwakuwanga nee kwacinja pyonsene. Ndikhapitiriza na cimo cakubvira kakamwe, ndikhanentseka na pinthu pyakukhonda nentsa, ninga kulapha kwa balcão ya maloja. Ndikhaona ninga pyonsene pyacitirwa anthu akulapha kupiringana ine. Ndikhabvereka ntsisi ndekhene, mbwenye pyenepi pyacinja pikhali ine na pyaka 14.
Ntsiku inango, akazi awiri akuti akhali Mboni za Yahova, agula misapo, iwo atoma kupfundza Bhibhlya na ine. Mwakukhonda dembuka, ndadzindikira kuti kudziwa Yahova na cifuniro cace ndi pyakufunika kakamwe kupiringana nyatwa yakubvira kwanga. Pyenepi pyandiphedza kakamwe. Lemba ya Masalmo 73:28 yadzakhala yanga yapantima. Khundu yakutoma ya lemba ineyi isalonga: “Kufendedzera Mulungu ndi kwadidi kwa ine.”
Mbwenye mwakukhonda dikhira, banja yathu yafuluka toera kuenda kakhala ku Burkina Faso, pontho umaso wanga wadzacinja kakamwe. Ku Costa do Marfim kukakhala ife, anthu akhadadzolowera kundiona cifupi na cidade ca misapo. Mbwenye pa cisa cipswa cidaenda ife, ndikhali mulendo, kwa azinji, ndikhali wakusiyana kakamwe. Anthu akhandiyang’anisa, natenepa, ndakhala n’nyumba masumana mazinji. Buluka penepo, ndakumbuka kuti kufendedzera Yahova ndi kwadidi kakamwe. Ndalembera ofesi ya Mboni za Yahova mbatumiza munthu wadidi kakamwe. Nani, wakuti akhali misionaryo akhabwera na mota toera kundicedzera.
Mataka a cisa cikhali ife akhali autherezi ndzidzi onsene, madzi angabvumba cikhali na matope kakamwe. Nani agwa kazinji kene na mota wace mu ndzidzi ukhabwera iye kapfundza Bhibhlya na ine, mbwenye iye apitiriza kubwera. Iye aperekeka toera kuenda na ine ku misonkhano. Ndadzindikira kuti pyenepi pinaphemba kubuluka panyumba mbandipirira kuyang’aniswa na anthu. Kusiyapo pyenepi, kundikwata nduli mwa mota mbapidathimizira kulemera pa mota wakuti ukhanentsa kufambisa. Mbwenye ine ndatawira, mbandikumbuka khundu yaciwiri ya lemba yanga yapantima: “Yahova Ntongi Wankulu ndi pakuthawira panga.”
Ine na Nani tagwa kazinji kene m’matope, mbwenye nakuti tikhafuna kakamwe misonkhano, nee tikhadzudzumika. Nkhope zakukomerwa na zaufuni zikhaona ine mu Nyumba ya Umambo zikhali zakusiyana kakamwe na kuyang’aniswa kukhacitwa ine na anthu kunja. Mudapita nthanda zipfemba, ndabatizwa.
Khundu yacitatu ya lemba yanga yapantima isalonga: “Toera ndidziwise mabasa ace onsene.” Ndikhadziwa kuti utumiki mbudakhala mpingizo wanga ukulu kakamwe. Ndisakumbuka ntsiku yakutoma idaenda ine kamwaza mphangwa nyumba na nyumba. Ana na akulu ene akhandiyang’anisa, akhanditowerera mbasangizira mafambiro anga. Mwandimomwene pyenepi pikhanditsukwalisa, mbwenye ndapitiriza kukumbuka kuti iwo asafunambo Paradizu ninga ine; natenepa, ndakwanisa kupirira.
Toera kululupisa makhaliro anga, ndagula njinga ya anyakulamala ya maroda matatu yakufambiswa na manja. Munthu akhabuluka na ine m’munda akhandikhuba m’makwiriro, mbakwira pa njinga tingafika m’materero. Maseze pakutoma utumiki ukhali wakunentsa, mwakukhonda dembuka watoma kundibweresera kutsandzaya kukulu, natenepa, mu caka 1998 ndapita m’basa ya upainiya.
Ndacitisa mapfundziro a Bhibhlya mazinji, anai mwa anthu anewa abatizwa. Kusiyapo pyenepi, ng’ono wanga wankazi atawira undimomwene! Kubva pya kuthambaruka kwa anango kukhandiwangisa pa ndzidzi wakuthema. Ntsiku inango ndikhali na utenda wa malária, ndatambira tsamba idabuluka ku Costa do Marfim. Ndikhadatomesa pfundziro ya Bhibhlya na nyakupfundza wa ku universidade ku Burkina Faso mbandipasa m’bale toera aicitise. Mukupita kwa ndzidzi, nyakupfundza unoyu aenda kakhala ku Costa do Marfim. Ndakomerwa kakamwe pidabva ine kuti akhatumikira ninga m’mwazi mphangwa wakukhonda batizwa!
Ndisakwanisa tani kutsalakana umaso wanga? Nsoka unango unaphedza anthu akulamala waperekeka toera kundipfundzisa kusona. M’bodzi wa apfundzisi aona maluso anga mbalonga: “Tisafunika kukupfundzisa kusasanya sabau.” Iwo andipfundzisa. Ndisacita sabau yakufula nayo, anthu asafuna kakamwe sabau inacita ine, iwo asadziwisambo anango. Ndisaenda kapereka ndekhene sabau kwa anyakugula anga.
Mwakutsukwalisa, mu caka 2004 ndasiya basa ya upainiya thangwi ya utenda wa nsana udathimizirika kakamwe. Mbwenye ndisapitiriza kucita khundu mwakukwana mu utumiki.
Anthu asalonga kuti ndisadziwika na nkhope yakutsandzaya. Ndiri na mathangwi onsene toera kutsandzaya, thangwi kufendedzera Mulungu ndi kwadidi kwa ine.—Yalongwa na Sarah Maiga.