KODI IMWE MUKHAPIDZIWA?

Ndi Basa Ipi Ikhali Na Nkadamu Wa Anyankhondo Waciroma?

Malemba Acigrego Acikristu kazinji kene asalonga pya akadamu Aciroma. Nyankhondo akhayang’nira kuphiwa kwa Yezu akhali na cidzo ceneci, ninga cikhali na Kornelyo, Jentiu adatoma kupita mu Cikristu. Nyankhondo akhayang’anira kumenywa kwa mpostolo Paulu na Julyo adaperekera Paulu ku Roma, akhalimbo akadamu.​—Marko 15:39; Machitiro 10:1; 22:25; 27:1.

Nkadamu kazinji kene akhayang’anira nsoka wa anyankhondo akukwana 50 peno 100. Iye akhali na basa yakupfundzisa na kusandika anyankhondo ace, kutsalakana pyakubvala pyawo, pinthu pikhaphatisira iwo na kuapaka mu ndzidzi wa nkhondo.

Cidzo ca nkadamu wa anyankhondo cikhali cikulu kakamwe. Ale akhacita basa ineyi akhali anyankhondo akupfundziswa mwadidi. Toera kukoya mwambo na maluso a anyankhondo Aciroma pikhanyindira iwo. Mwakubverana na bukhu inango, akadamu “kazinji kene akhali amuna a maluso na akudziwa mwadidi pya nkhondo.”

Kodi Masupeyu a M’midzidzi Ya Bhibhlya Asiyana Tani Na a Ntsiku Zino?

Mwakusiyana na masupeyu a ntsiku zino, masupeyu a m’midzidzi ya Bhibhlya kazinji kene akhacitwa na utale wakupukutwa mwadidi​—safuli, nkuwa, prata, ndalama peno prata yakubvungazwa na ndalama. Mafala akutoma akuti masupeyu analongwa m’Bhibhlya asabverana na kumangwa kwa tabernakulu, mbuto yakutoma yaulambiri mu Israele. Akazi akhapereka masupeyu ku tabernakulu toera kusasanya phande ya safuli na miyendo yace. (Eksodo 38:8) Pisaoneka kuti masupeyu akhafunika kunyunguluswa toera kucita pyenepi.

Masupeyu adagumanwa na anyakupfundza pinthu pyakukumbwa pantsi nkati na kunja kwa Israele, kazinji kene akhagumanwa mu pinthu pinabvaliwa na akazi toera kubalikisa maonekero awo. Midzidzi mizinji, masupeyu anewa akhali aardondo mbabalikiswa na matabwa, utale peno akhali na mphatiro wa nyanga za ndzou wakuti kazinji kene ukhalembwa cithundzithundzi ca nkhope ya nkazi. Masupeyu akukhonda pukutwa mwadidi nee akhabalikiswa.

Kuyetimira kwa masupeyu akale ndi kwakusiyana na a ntsiku zino. Pyenepi pisabvekesa pidalonga mpostolo Paulu kuti: “Cincino nee tikuona mwadidi thangwi tikuphatisira supeyu ya utale.”​—1 Akorinto 13:12, NM.