Kaphatisireni Ndzidzi Onsene
1. Kodi katsamba kakuti Kudziwa Undimomwene ndi kadidi toera kucitanji?
1 Katsamba kakuti Kodi Musafuna Kudziwa Undimomwene? kacitwa toera kutiphedza kutomesa mapfunziro a Bhibhlya. Mbwenye ikombo ndi feramentu yamphambvu yakuti tinakwanisa kuiphatisira toera kubzwala mbeu za undimomwene. (Koel. 11:6) Pana njira zingasi toera kutiphedza kuphatisira mwadidi katsamba keneka.
2. Kodi tinaphatisira tani katsamba toera kutomesa makani?
2 Toera Kutomesa Makani: Imwe musafunika kupasa katsamba mwanaciro nyumba, mbamumpangiza mibvunzo mitanthatu pa tsamba yakutoma, buluka penepo mbvunzeni: “Kodi pa mibvunzo ineyi, ndi mbvunzo upi unafuna imwe kugumana ntawiro?” Pakumala kubva ntawiro wa mwanaciro nyumba, dingani mu katsamba ntawiro unapereka Bhibhlya ku mbvunzo udacita mwanaciro nyumba na kuleri lemba ibodzi pa malemba akusowa mafala mu ndima. Lerini peno longani mwacigwagwa tsamba yakumalisa, na gawirani bukhu yakuti Biblya Isapfunzisanji. Ngakhale kuti akhonda bukhu, iye atambira katsamba, kakuti panango kanacitisa undimomwene kumera mu ntima mwace.—Mat. 13:23.
3. Khala mwanaciro nyumba ali na mabasa mazinji, kodi tisafunika kucitanji?
3 Khala Mwanaciro Nyumba Ali Na Mabasa Mazinji: Munakwanisa kulonga: “Nakuti uno ndi ndzidzi wakukhonda kuthema, ndisafuna kusiya katsamba aka. Pasagumanika mibvunzo mitanthatu yakuti azinji a ife asaicita na kasapangiza pakweca pinthu pinalonga Bhibhlya toera kutawira mibvunzo ineyi. Tingadzaonana pontho, ndinadzafuna kudziwa manyerezero anu.”
4. Kodi tinalonganji tingagawira katsamba m’basa ya mu nseu?
4 Tingacita Basa Ya Mu Nseu: Munakwanisa kulonga: “Muli tani. Kodi mwabvunzika kale mibvunzo ninga na iyi? [Dikhirani ntawiro.] Katsamba aka kasapangiza pakweca matawiro akutsanzayisa anagumanika m’Bhibhlya.” Khala munthu ali na ndzidzi, munakwanisa kudinga ntawiro ubodzi kubulukira ku katsamba na kugawira bukhu yakuti Biblya Isapfunzisanji.
5. Kodi m’midzidzi inango tinaphatisira tani katsamba pa zinyumba zinakhonda kugumanika anthu?
5 Khala Panyumba Nkhabepo Munthu: Mu pisa pinango, amwazi mphangwa kazinji kene asasiya mabukhu mwacibisobiso pa zinyumba zinakhonda kugumanika anthu. Khala pyenepi pisacitika m‘mpingo wanu, thangwi yanji nkhabembo kusiya katsamba kakuti Kudziwa Undimomwene? Pa ulendo wakubwereza munakwanisa kulonga: “Tikhandafika pano, imwe nee mukhalipo tayu, natenepa tasiya katsamba ninga aka pa nsuwo wanu. Kodi ndi mbvunzo upi pa mibvunzo iyi unafuna imwe kudziwa ntawiro wace?”
6. Kodi ndi ninji cinacitisa katsamba kakuti Kudziwa Undimomwene kukhala feramentu yadidi kakamwe toera kumwaza mphangwa?
6 Katsamba kakuti Kudziwa Undimomwene kasapangiza undimomwene mu njira yapakweca na yakukhonda nentsa. Kasakomeresa anthu a marelijiau na a makhaliro onsene. Ndi kakukhonda nentsa kugawira, ngakhale anapiana na amwazi mphangwa apswa anakwanisa kukagawira. Kodi musakaphatisira pa midzidzi yonsene yakuthema?