Misolo Ipswa Toera Kutomesa Mapfunziro A Bhibhlya

1. Kodi ndi nsolo ukulu upi upswa unadzagumanika mu A Sentinela ya anthu onsene, na unadzaphatisirwa tani?

¹ Kutomera pa nthanda inafuna kudza, A Sentinela ya anthu onsene inadzabulusa misolo ipswa toera kutiphedza kutomesa mapfunziro a Bhibhlya. Misolo ineyi inadzagumanika pantsi pa nsolo ukulu wakuti “Aprenda da Palavra de Deus” [Pfunzani Mafala A Mulungu]. Nakuti anthu azinji mu cisa cathu anadzafunisisa kuleri nsolo ubodzi na ubodzi, mwandimomwene misolo ineyi yacitwa toera kuidinga na mwanaciro nyumba.

2. Kodi ndi api makhaliro a nsolo unoyu?

² Makhaliro a Nsolo Unoyu: Nsolo na misolo ming’ono yalembwa ninga mibvunzo toera kubvunza mwanaciro nyumba pa kucedza. Malemba akufunika asapangizwa mu zindima, mbwenye ndi akusowa mafala, natenepa mwanaciro nyumba anadzatsanzaya kuapfunza kubulukira m’Mafala a Mulungu. Ndima zinagumanika ndi zakukhonda lapha zakuti tinakwanisa kuzidinga na mwanaciro nyumba mu ndzidzi wakucepa. Nsolo ubodzi na ubodzi unadzathonyeza bukhu yakuti Biblya Isapfunzisanji, inadzatiphedza kucinja pfunziro mu revista toera kuenda ku bukhu ineyi pingaoneka kukhala pyakuthema.

3. Tingaenda pa nyumba na nyumba, kodi tinaphatisira tani misolo ineyi toera kutomesa pfunziro ya Bhibhlya mu ndzidzi wakucepa?

³ Tinauphatisira Tani: Pakugawira marevista citani mbvunzo wakuti unacitisa mwanaciro nyumba kupangiza cifuno ku nsolo unoyu. Mwacitsanzo, revista ya 1° de Janeiro isalonga kufunika kwa Bhibhlya. Munakwanisa kubvunza: “Kodi musaona Bhibhlya ninga Mafala a Mulungu peno ninga bukhu yadidi basi? [Dikhirani ntawiro.] Pana pinthu pinango pyakutsanzayisa pa nsolo uyu.” Pangizani mbvunzo wakutoma, lerini ndima yakutoma, na lerini lemba inagumanika mu ndima. Lerini pontho mbvunzo, na phembani mwanaciro nyumba toera kutawira. Dingani mphangwa zakunjipa pingakwanisika, mukuphatisira mibvunzo yakukhala na cilengeso ninga citsogolero toera kucedza. Mbamudzati kupangana, citani mbvunzo unagumanika pa ndima inatowerera na citani masasanyiro toera kubwerera na kudzadinga mbvunzo unoyu. Bwererani toera kupitiriza kudinga nsolo unoyu pa sumana ibodzi na ibodzi mpaka ndzidzi unafuna imwe kubweresa revista inango. Njira inango ndi kugawira kwene pfunziro ya Bhibhlya kwa mwanaciro nyumba. Buluka penepo phatisirani nsolo wa revista toera kupangiza macitiro a pfunziro.

4. Kodi tinaphatisira tani misolo ineyi tingacita maulendo akubwereza?

⁴ Munakwanisambo kuphatisira misolo ineyi ipswa mwakuphindulisa kwa anthu anapasa imwe marevista mwakukhonda phonya na pa maulendo anango akubwereza. Imwe mungakwanise kulonga: “Pana misolo ipswa mu A Sentinela. Lekani ndikupangiseni kuti munaiphatisira tani.” Tiri kuphembera kuti misolo ineyi ipswa iphedze anthu azinji kuti “adziwembo mapfundisiro adidi.”—1 Tim. 2:4.