Kuthimizira Maluso Athu Mu Utumiki​—Kulemba Pya Cifuno Ca Munthu

‘Cita mphole na iwe wekhene na mapfundzisiro ako.’ (1 Tim. 4:16) Uphungu unoyu wakupumirwa udapereka mpostolo Paulu kuna Timoti usapangiza kuti, mwakukhonda tsalakana khala ndife apswa peno a maluso, tisafunika kuwangisira toera kuthambaruka. Toera kutiphedza kucita pyenepi, misolo ipswa yakuti, “Kuthimizira Maluso Athu Mu Utumiki—Kulemba Pya Cifuno Ca Munthu,” inadzabuluswa mu Utumiki Wathu Wa Umambo. Nsolo ubodzi na ubodzi unadzafokotoza luso ibodzi yakufunika, na kupereka maonero mangasi akuti tinaiphatisira tani. Nkati mwa nthanda, tonsene tisawangiswa kuphatisira luso ineyi. Pakumala kwa nthanda, khundu ya Nsonkhano Wa Basa inadzatipasa mwai toera kulonga maphindu adakhala na ife pa kuphatisira luso ineyi. Nthanda ino tikuwangisa onsene toera kulemba pya cifuno ca munthu.

Thangwi Yanji Mphyakufunika: Toera kukwanirisa basa yathu, tisafunika kucita pizinji kupiringana kumwaza mphangwa. Tisafunika kubwerera kuna ale anapangiza cifuno na kuapfundzisa, kuthirira mbeu za undimomwene zinabzwala ife. (Mat. 28:18, 19; 1 Akor. 3:6-9) Pyenepi pisaphemba kugumana pontho munthu adacedza na ife, kulonga pinandzudzumisa, mbatiphatisira pinthu pidacedza ife m’maulendo adapita. Natenepa, tingagumana munthu adapangiza cifuno, tisafunika kulemba pyenepi.

Tinacita Tani Pyenepi:

• Onesesani kuti muli na pyonsene pinafunika toera kulemba pya cifuno ca munthu. Tsalakanani mwadidi mphangwa zidalemba imwe, pontho zikhale zipswa. Lembani pidaona imwe mungabuluka panyumba ya munthu adapangiza cifuno.

• Lembani mphangwa thangwi ya mwanaciro nyumba. Lembani dzina yace, numero yakupita naye n’cibverano, kunakhala iye, numero ya ntokodzi, peno e-mail. Ninji pidaona imwe mwa iye na banja yace, pyakuti pinadzakuphedzani?

• Lembani unyomonyomo wa mphangwa zidacedza imwe. Ndi lemba ipi idaleri imwe? Alonga kuti asakhulupiranji? Ndi bukhu ipi idasiya imwe? Lembani ndzidzi na ntsiku idacedza imwe.

• Lembani pinanyerezera imwe kucita paulendo unafuna kudza. Mwabverana kuti munadzadinganji? Mwabverana kuti munabwerera lini?

• Thimizirani mphangwa zanu ndzidzi onsene unabwerera imwe. Nkhabe cakuipa mungalemba mphangwa zizinji kupiringana zinafuna imwe.

Yeserani Kucita ipi Nkati mwa Nthanda:

• Pakulemba mphangwa, fokotozerani ale anaphata basa na imwe kuti ninji pinalemba imwe.