Thangwi Yanji Nyatwa Zenezi Zonsene?

PINABWERESWA NA UTONGI WAKUIPA

“Panatonga akusowa ulinganiri, anthu onsene asalira.”​—Misangani 29:2.

Mbiri yadzala na anthu anatonga okhene akuti asatonga mwakuipa, asabweresa nyatwa zakukhonda longeka kwa anthu anatonga iwo. Mwandimomwene, pyenepi nee pisacitwa na atongi onsene. Anango anakwanisa kukhala na pifuno pyadidi toera kuphedza andzawo. Mbwenye, mu ndzidzi unatonga iwo, kazinji kene asadzindikira kuti kuwangisira kwawo kusacimwaniswa mu kuthimbana na mapika a mautongi. Peno asaphatisira mwakuipa mphambvu zawo toera kuwina okhene, na kuthabusa anthu. Ntongi wakale wa mu dziko ya Estados Unidos, Henry Kissinger alonga: “Mbiri ndi pinthu pyakucitika pyakuti pyacimwanika, natenepa, ninga nyakudziwisa pya mbiri yakale, munthu asafunika kudziwa kuti dzedze nkhabe calirwa.”

Bhibhlya isalongambo: “Nkhabepo munthu wakucitwa na pfumbi anakwanisa kutsogolera njira ya umaso wace.” (Yeremiya 10:23, Tradução do Novo Mundo) Anthu akusowa ungwiro nkhabe udziwisi wakukwana na luso yakudziwa pya ntsogolo toera kucita pinthu pyawo mwakupembera. Khala anthu nkhabe kwanisa kutsogolera njira ya umaso wawo, anakwanisa tani kutsogolera mbumba? Munakwanisa kuona kuti thangwi yanji atongi nkhabe luso toera kumalisa nyatwa? Mbwenye kazinji kene, utongi wakuipa ndi unacitisa nyatwa!

MACITIRO AUPHEMBERI WAUNTHAWATAWA

Yezu alonga: “Na kufunana kwanu anthu onsene anadzadzindikira kuti ndimwe anyakupfundza anga.”​—Jwau 13:35.

Atsogoleri onsene auphemberi asalonga pya ufuni na kuphatana. Undimomwene ndi wakuti iwo asaphonya kucitisa atowereri awo kukhala na ufuni wakuwanga toera kumalisa tsankhu. Mbuto mwakuphedza anthu kukulisa ufuni, kazinji kene uphemberi usacitisa anthu kumwazana, kukhala abibvu, na nthonga pakati pa mitundu ya anthu. Pakumalisa bukhu yace O Cristianismo e as Religiões do Mundo, Hans Küng alemba: “Anthu anafuna kakamwe pya ndale, anamenyana mwausumankha ndi ale ananyengererwa na kuphatisira uphemberi.”

Mwakuthimizira, atsogoleri azinji auphemberi asalekerera anthu kupita m’mabonde mbadzati kumanga banja na kupita m’mabonde kwa amuna na amuna na kwa akazi na akazi. Pyenepi pisamwazisa mautenda, kutaya mimba, kumita mimba mwakukhonda funa, kumwalana, na kumwazana kwa mabanja, pontho pisacitisa kubva kupha mu ntima na kutsukwala.

KUSOWA UNGWIRO KWA ANTHU NA PIFUNO PYAKUCENAMA

“[Munthu] kusirira kwache, kunansosa mbakunkwekweta. Penepo munthu angapitawira, kusirira kwache kule kunabala mu ntima mwache madawo.”​—Tyago 1:14, 15.

Na thangwi yakusowa ungwiro kwakubalwa nako, tonsene tiri na cipendamiro cakucita madodo, kuphonya, pontho kuthimbana na pifuno ‘pinasirira manungo.’ (Aefesi 2:3) Makamaka ndi kwakunentsa kukhonda cifuno cakuipa tingakhala na mwai wakucicita. Tingacita cifuno cakuipa, makhaliro athu anakhala pa nyatwa.

Nyakulemba mabukhu P. D. Mehta alemba: “Pakati pa nyatwa zizinji zinaoneka ndi toera kukwanirisa pifuno pyathu, kusaka kakamwe mpfuma, kufuna pyonsene na umbirimi.” Umbirimi na misambo yakuipa yonsene—pyakumwa pyakuledzeresa, mitombwe yakuledzeresa, cabutha, ulukwali, na pinthu pinango—pisafudza ndzika zizinji zakulemedzwa, pontho pyabweresa nyatwa kwa mabanja awo, axamwali awo na anango. Na thangwi yakusowa ungwiro kwa anthu, tisafunika kutawira pinalonga Bhibhlya: “Mphyakubveka kuti anthu onsene aone na maso awo kuti ndzidzi uno pyakucitwa pyonsene pya umaso piri kubulira thangwi ya nyatwa zibodzi zene.”​—Aroma 8:22, Novo Testamento em Inglês Moderno, yakulembwa na J. B. Phillips.

MPHAMBVU YA MIZIMU YAKUIPA

Bhibhlya isalonga kuti Sathani ndi “mulungu wakuipa wa pantsi pano,” pontho iye asaphatana na mphambvu ya mizimu yakuipa inacemerwa mademonyo.​—2 Akorinto 4:4; Apokalipse 12:9.

Ninga Sathani, mwaphinga mademonyo ali kuyang’anira anthu toera kuapeusa. Mpostolo Paulu adzindikira pyenepi mudalonga iye kuti: ‘Nkhondo yathu si yakumenyana na ale ana manungo na chiropa, mbwenye yakumenyana na akulu na anyamphambvu a dziko ino ya chidima na mizimumbo yakuipa yakundzendza-ndzendza mu mphepo.’​—Aefesi 6:12.

Maseze mademonyo asakomerwa kuthabusa anthu, ceneci nee ndi cifuno cawo cakutoma. Iwo asafuna kupeusa anthu toera kukhonda Mulungu Wakudzulu, Yahova. (Masalmo 83:18, Tradução do Novo Mundo) Macitiro ninga kupfundza nyenyezi, kuombeza, ufiti na kulotera ndi pinthu pingasi pinaphatisira mademonyo toera kupeusa anthu. Ineyi ndi thangwi inaticenjeza Yahova ku ngozwi zenezi na kutsidzikiza ale onsene anakhonda Sathani na mademonyo.​—Tyago 4:7.

TIRI KUKHALA MU “NTSIKU ZAKUMALISA”

Mu pyaka pikwi piwiri nduli, Bhibhlya yalongeratu: “Udziwe kuti pa ntsiku zakumalisa, inadzaoneka midzidzi yakugopswa.”

Kupangiza kuti ninji pinacitisa midzidzi ineyi kukhala yakunentsa, Bhibhlya isapitiriza kufokotoza: “Thangwi anthu anadzafuna pinthu pyawo pyokha basi, anadzasirira ndalama basi, anadzagaya mbadzachita umbirimi, . . . anadzakhonda kufunana, anadzakhonda kubverana, anadzapambizira, anadzachita pya lukwali, anadzakhonda kubvera ntsisi, anadzatchinga anthu adidi, anadzaasandukira, anadzanyozeka, anadzafuna pya upombo kupita kufuna Mulungu.” Mwandimomwene, thangwi ibodzi inacitisa nyatwa zonsene zinaona ife lero ndi yakuti tikukhala mu “ntsiku zakumalisa.”​—2 Timoti 3:1-4.

Mu pinthu pidadinga ife, nkhabe kupangiza pakweca kuti thangwi yanji anthu nkhabe kwanisa kumalisa nyatwa, ngakhale kuti ali na pifuno pyadidi? Mbani anafuna kutiphedza? Tisafunika kuyang’ana Nciti wathu, ule anapikira ‘kufudza mabasa a Demonyo’ na atowereri ace. (1 Jwau 3:8) Nsolo unatowerera unadzadinga kuti Mulungu anadzacitanji toera kumalisa pyonsene pinacitisa nyatwa.