Mphangwa Zadidi kwa Anthu Onsene

Kulamuswa kwa Yezu kwacitisa anyakupfundzace kukhulupira na kukhala aphinga. Mpostolo Paulu acita ulendo wakupambulika m’mbuto zonsene za Azya Menori na Mediteraniani mbakhazikisa mipingo, kuwangisa na kupasa cipapo Akristu toera kukhala dzololo pakuthimbana na makhaliro akuipa na kutcingwa. Mwakukhonda tsalakana pinentso pyenepi, azinji adzakhala Akristu.

Paulu aikhwa nkaidi ekhene. Ngakhale nkaidi, iye alemba matsamba akupereka ciwangiso na uphungu ku mipingo Yacikristu. Iye aacenjeza thangwi ya upanduki. Mu kutsogolerwa na nzimu wakucena wa Mulungu, Paulu akhadaoneratu kuti ‘anyamalwa anadzalonga pyakukhonda kulungama’ anadzapita pakati pawo “towera anyengerere anyakupfundza.”​—Machitiro 20:29, 30.

Kumala kwa pyaka dzana yakutoma, upanduki unoyu ukhadatoma. Pa ndzidzi unoyu Yezu wakuti alamuswa mwa akufa apasa mpostolo Jwau Mafokotozero a maonero a kuphiphirisa pya ntsogolo. Ninga mudalembera Jwau kuti nee apingizi nee apfundzisi aunthawatawa mbadacimwanisa Mulungu kukwanirisa cifuniro cace cakutoma kwa anthu na dziko. ‘Mbumba zonsene, madzindza onsene, anthu a malongero onsene na mitundu ya anthu onsene’ anadzabva mphangwa zadidi za Umambo wa Mulungu. (Apokalipse 14:6) Paradizu anadzacitwa papswa pa dziko yapantsi, pontho anthu onsene anafuna kucita cifuno ca Mulungu anadzakhala mu Paradizu!

Kodi pyenepi pisabveka ninga “mphangwa zadidi” kuna imwe? Khala ndi tenepo, pfundzani pizinji pya mphangwa za Mulungu kwa anthu zinagumanika m’Bhibhlya, pontho zinakuphindulisani tani lero na ntsogolo.

Munakwanisa kuleri Bhibhlya mwekhene mu Interneti www.jw.org/seh. Pa Web Site ineyi munakwanisambo kudinga mabruxura A Bíblia​—Qual É a sua Mensagem? na Mphangwa Zadidi Za Mulungu! pontho na bukhu Kodi Mwandimomwene Biblya Isapfunzisanji? pabodzi na mabukhu anango analonga thangwi yanji tinakwanisa kunyindira Bhibhlya, pontho tinaphatisira tani uphungu wace wadidi pa banja yathu na munthu payekha. Peno mbvundzani m’bodzi wa Mboni za Yahova toera kudziwa pizinji.

​—Yabuluswa pa Machitiro, Aefesi, Afilipi, Akolose, Filemoni, 1 Jwau, Apokalipse.