NSOLO WA REVISTA | THANGWI YANJI PINTHU PYAKUIPA PISACITIKA KWA ANTHU ADIDI?
Pinthu Pyakuipa Pikunjipa!
Smita,a ndi nkazi wa pyaka 35 pyakubalwa anakhala ku Dhaka, mu dziko ya Bangladesh. Iye akhadziwika na makhaliro adidi ninga aufuni na citsalakano. Anthu akhandziwa ninga nkazi wakuphata basa mwakuwanga na wakutsandzaya, wakuti akhafuna kuphedza anango kuti adziwembo pinthu pidapfundza iye thangwi ya Mulungu. Acibale na axamwali ace atsukwala kakamwe pa ndzidzi wakuti mwakukhonda dikhira, Smita aphatwa na utenda wakugopswa, mbasoweka pa sumana ibodzi ene!
James na nkazace, akhali nkati mwa pyaka 30 pyakubalwa, iwo akhadziwikambo na makhaliro adidi ninga a Smita. Ntsiku inango mu ndzidzi wa khoni, aenda kaona axamwali awo Kumadokero a dzuwa a Estados Unidos. Mbwenye iwo nee abwererabve kunyumba kwawo ku Nova York. Mbadzati kubwerera, iwo acitikirwa na cidengwa ca motokala, iwo asoweka mbasiya acibale na axamwali mwakutsukwala.
Nee tisafunika kuenda kutali toera kuona kuti uipi na nyatwa pikuthimizirika lero. Nkhondo zisapha anyankhondo na anango akuti nee ndi anyankhondo. Upandu na uphanga pisapha anthu akuti nee aputa nseru. Pidengwa na mautenda akugopswa pisaoneka kwa anthu onsene mwakukhonda tsalakana thunga yawo peno makhaliro a umaso wawo. Pidengwa pyacibaliro pisafudza mizinda mwakukhonda sankhula. Kusankhulana na uipi pisagumanika konsene kwene. Panango imwe mwathimbana kale na nyatwa zenezi.
Natenepa, anthu asafika pakucita mibvundzo ninga iyi:
• Thangwi yanji pinthu pyakuipa pisacitika kwa anthu adidi?
• Ndi Mulungu anacitisa pinthu pyakuipa?
• Kodi pidengwa pisacitika pyokha, peno pisacitiswa na anthu?
• Kodi pisacitika thangwi ya Karma, cipfundziso cakuti pidacita munthu kale, ndipyo pinambweresera nyatwa?
• Khala Mulungu ndi wamphambvu zonsene, thangwi yanji iye nkhabe kutsidzikiza anthu adidi ku pinthu pyakuipa?
• Kodi umaso unadzakhala wakusowa uipi na nyatwa?
Toera kutawira mibvundzo ineyi, tisafunika kubvesesa mwadidi ntawiro wa mibvundzo miwiri yakufunika kakamwe: Thangwi yanji pinthu pyakuipa pisacitika kwa anthu onsene? Kodi Mulungu anadzacitanji?
[Cidzindikiro capantsi]
a Madzina acinjwa.