Khundu 1
Kodi Mulungu Asatitsa-Lakanadi?
1, 2. Kodi ndi mbvunzo upi unacita anthu thangwi ya Mulungu, na thangwi yanji?
M’NZIDZI unango m’umaso wanu, panango mwatoma kubvunzika: ‘Khala alipo Mulungu wakuti asatitsalakanadi, thangwi yanji asalekerera nyatwa zonsene zinaoneka?’ Tonsene tisatamba nyatwa peno tisadziwa munthu anazitamba.
2 Mwandimomwene, nkati mwa mbiri anthu asatamba nyatwa na kupha ntima thangwi ya nkhondo, kuthabusana, usumankha, kusowa ulungami, ucerengi, utenda na kufa kwa anthu akufunika. M’piaka dzana 20 basi, nkhondo zapha anthu akupiringana mamiliyau 100. Madzana a mamiliyau a anthu anango aphekeswa peno aluza nyumba na pinthu pyawo. Ngakhale pinthu pinango pyakugopswa pisacitika m’nzidzi wathu, mbipibweresa kutsukwala kukulu, misozi izinji na nyerezero yakusowa cidikhiro kwa anthu akukhonda lengeseka.
3, 4. Nakuti Mulungu asalekerera nyatwa, kodi anthu azinji asanyerezera tani?
3 Anango asaipirwa na asanyerezera kuti khala alipo Mulungu, iye nkhabe kutitsalakanadi. Panango iwo angakwanise kunyerezera kuti nkhabepo Mulungu. Mwacitsanzo, mamuna unango adatamba nyatwa ya ntcingo wa dzinza udacitisa kufa kwa axamwali na acibale m’Nkhondo Yakutoma Ya Dziko Yonsene Yapantsi abvunza: “Kodi Mulungu akhali kupi mukhanfuna ife?” Unango, wakuti apulumuka pa kuphiwa kwa mamiliyau a anthu na Anazi m’Nkhondo Yaciwiri ya Dziko Yonsene Yapantsi, atsukwala kakamwe na nyatwa zidaona iye mbabvunza: “Mbudanyanguta ntima wanga, mbudakupasa nyongo.”
4 Natenepa, anthu azinji nkhabe bvesesa thangwi yanji Mulungu wadidi asatawirisa pinthu pyakuipa kucitika. Iwo asapokanya khala iye asatitsalakanadi peno khala iye alipo. Na azinji a iwo asanyerezera kuti nzidzi onsene nyatwa zinadzacita khundu ya umaso wa anthu.
[Foto pa tsamba 2, 3]
Kodi dziko ipswa yakusowa nyatwa iri cifupi?