Khundu 2
Dziko Yakusowa Nyatwa
1, 2. Kodi anthu azinji ali na maonero api akusiyana?
MBWENYE, mamiliyau a anthu kuzungulira dziko yonsene yapantsi ali na maonero akusiyana kakamwe. Iwo asaona mwanyapantsi tsogolo yakudzumisa ya anthu. Iwo asalonga kuti mokhonda dembuka pa dziko ino yapantsi nee panadzaonekabve uipi na nyatwa tayu. Ali na cinyindiro cakuti mokhonda dembuka pyakuipa pinadzabuluswa na dziko yonsene yapantsi inadzacitwa ipswa. Asalongambo kuti phata ya dziko ineyi ipswa iri kucitwa cincino!
2 Anthu anewa asakhulupira kuti m’dziko ineyi ipswa nee munadzakhala nkhondo, kuthabusana, usumankha, kusowa ulungami na ucerengi. Inadzakhala dziko yakusowa utenda, kutsukwala, misozi, ngakhale kufa. M’nzidzi unoyu anthu anadzakhala aungwiro na anakhala maso kwenda na kwenda mwakutsanzaya m’paradizu ya pa dziko yapantsi. Inde, ngakhale ale adafa anadzalamuswa muli akufa mbakhala na mwai wakukhala maso kwenda na kwenda!
3, 4. Thangwi yanji anthu anewa ali na cinyindiro ca maonero awo?
3 Kodi maonero anewa a ntsogolo ndi ndoto basi, peno nkhunyengeteka basi? Nkhabe. Maonero anewa asabuluka m’cikhulupiro cakukhala na phata yakuwanga yakuti Paradizu unoyu anabweradi. (Ahebere 11:1) Thangwi yanji iwo ali na cinyindiro ceneci? Thangwi Nciti wamphambvu zonsene wa kudzulu na pantsi apikira pyenepi.
4 Biblya isalonga pya mapikiro a Mulungu: “Muli pyonsene pidakupangani Mbuya Mulungu wanu, nee chibodzi chidakhonda kuchitika; pyonsene pyachitika.” “Mulungu si munthu tayu, towera aname . . . Kodi, iye analonga mbakhonda sidzikira pinalonga Iye? Peno anapikira mbakhonda kupitoweza?” “Ndipyombo pidadumbira Mbuya wa mphambvu zonsene, pidanyerezera ine pyonsene pinadzachitika, na pirembo pidatonga ine.”—Yoswa 23:14; Numero 23:19; Izaiya 14:24.
5. Kodi ndi mabvunzo api anafunika kutawirwa?
5 Natenepa, khala cifuniro ca Mulungu cikhali cakucita dziko yapantsi kukhala paradizu yakusowa nyatwa, thangwi yanji iye alekerera kuti pinthu pyakuipa picitike? Thangwi yanji iye adikhira piaka pikwi pitanthatu mpaka cincino towera kumalisa pyakuipa? Kodi madzana onsene anewa a piaka pya nyatwa asapangiza kuti Mulungu nkhabe kutitsalakanadi, peno kuti iye nee alipo?