5. Nyatwa Zinadzamala?

Thangwi Yanji Mphyakufunika Kudziwa Ntawiro

Khala tisanyindira kuti nyatwa zinadzamala, cidikhiro ceneci mbacidatiphedza njira inaonera ife umaso wathu ngakhale njira inaonera ife Mulungu.

Nyerezerani Ipi

Anthu azinji asafuna kumalisa nyatwa, mbwenye iwo nkhabe kwanisa kucita pizinji toera kuzimalisa. Onani ipi:

Ngakhale kuthambaruka kwa ukondzi . . .

• Mautenda a ntima asapitiriza kupha anthu azinji.

• Utenda wa câncer usapha anthu azinji pyaka pyonsene.

• Dr. David Bloom alemba mu tsamba ya mphangwa ya Frontiers in Immunology: “Dziko isapitiriza kuthimbana na mautenda akuthapulisana, anango akhalipo kutomera kale, anango ndi mapswa anango akubwerera pontho.”

Ngakhale madziko anango ali na kobiri izinji . . .

• Pyaka pyonsene anapiana azinji asafa, kazinji kene pyenepi pisacitika m’mbuto zakuti anthu ndi atcerengi.

• Anthu azinji nkhabe pimbuzi pyadidi.

• Anthu azinji nkhabe madzi adidi.

Ngakhale anthu azinji asadziwa kuti asafunika kutsalakana tani anango . . .

• Lipoti ya Nações Unidas yalonga kuti madziko mazinji asapitiriza kugulisa anthu ninga mabitcu. Anthu anacita pyenepi nee asasakwa, pyenepi pisacitika thangwi mautongi nkhabe dziwa pinacitika peno nkhabe pida toera kuasaka.

  DZIWANI PIZINJI

  Onani vidhyu yakuti Umambo wa Mulungu Ninji? isagumanika mu saiti jw.org.

Bhibhlya Isalonganji

Mulungu asatitsalakana.

Iye nee asakomerwa angationa mbatithabuka peno kutsukwala.

‘Mulungu nee afunga maso ace toera akhonde kuona kuthabuka kwa munthu anapondererwa; Iye nee am’bisira nkhope yace. Pidakhuwa iye toera kuphemba ciphedzo, iye amubva.’—MASALMO 22:24.

“Mu ndzidzi unapereka imwe kuna iye pinthu pyonsene pinakudzudzumisani, thangwi iye asakutsalakanani.”—1 PEDHRU 5:7.

Nyatwa nee zinapitiriza kwenda na kwenda.

Bhibhlya isalonga kuti cifuniro ca Mulungu kwa ife cinadzacitika.

“Mulungu . . . anadzapukuta misozi yonsene m’maso mwawo, pontho nkhabe kudzaonekabve kufa, nee kutsukwala, nee kulira, nee kubva kupha. Thangwi pyakale pyamala.”—APOKALIPSE 21:3, 4.

Mulungu anadzamalisa pinacitisa anthu kuthabuka.

Iye anadzaphatisira Umambo wace toera kucita pyenepi.

‘Mulungu wakudzulu anadzaikha umambo wakuti cipo unadzafudzwa. Pontho umambo unoyu nee unadzapaswa anthu anango tayu, iwo ene unadzakhala kwenda na kwenda.’—DANYELE 2:44.