Phatisirani Mafala a Mulungu Iwo Ndi Amaso!

“Mafala a Mulungu ndi amaso na amphambvu.”​—AHEB. 4:12, Tradução do Novo Mundo.

MUSAONA TANI?

Munacitanji toera maperekero anu aumboni mu utumiki akhale akuphindulisa kakamwe?

Kodi matratado athu asatiphedza tani toera kuphatisira Bhibhlya paulendo wakutoma na wakubwereza?

Tinasangizira tani citsandzo ca Paulu pakukhunganyika toera kuenda mu utumiki?

1, 2. Ndi basa ipi idapaswa Mose na Yahova, kodi Yahova ampasa cinyindiro canji?

NYEREZERANI kuti muli patsogolo pa ntongi wamphambvu kakamwe pa dziko toera kuimirira mbumba ya Yahova? Panango mbamudadzudzumika, kugopa, peno kubva ninga nee mwathema. Mbamudakhunganya tani mafala anu? Mbamudacitanji toera mafala anu akhale amphambvu ninga muimiriri wa Mulungu wamphambvu zonsene?

² Mose athimbana na makhaliro anewa. Iye akhali ‘munthu wakucepeseka kupiringana anthu onsene.’ Yahova akhadampanga kuti akhafunika kuenda kuna Farao toera kuombola mbumba ya Mulungu mu kupondererwa na ubitcu wawo ku Ejito. (Num. 12:3) Mbwenye Farao akhali munthu wakusowa cilemedzo na wakudzikuza. (Eks. 5:1, 2) Ngakhale tenepo, Yahova akhafuna kuti Mose apange Farao toera kusiya pikwi na pikwi pya mabitcu abuluke mu Ejito! Mwakulinganira Mose abvundza Yahova: ‘Ndine ani ine toera ndiende kalonga na Farao, mbandibulusa ana a Israele?’ Mose akhapibva ninga wakukhonda thema, pontho kuti nee mbadakwanisa. Mbwenye Mulungu ampasa cinyindiro kuti nee mbadakhala ekhene. Yahova alonga: “Ine ndinadzakhala na iwe.”​—Eks. 3:9-12.

3, 4. (a) Thangwi yanji Mose agopa? (b) Ndi munjira ipi mabvero anu anakwanisa kulandana na a Mose?

³ Thangwi yanji Mose agopa? Panango iye akhagopa kuti Farao nee mbadatawira peno kubvesera muimiriri wa Yahova Mulungu. Mose akhagopambo kuti panango Aisraele nee mbadakhulupira kuti iye akhadasankhulwa na Yahova toera kuabulusa mu Ejito. Na thangwi ineyi Mose abvundza Yahova: ‘Ndiye tani mphapo angakhonda kutawira mbakhonda kubvera fala yanga, thangwi iwo anadzalonga kuti Yahova hadaonekera kuna iwe tayu.’​—Eks. 3:15-18; 4:1.

⁴ Ntawiro wa Yahova kuna Mose na pidacitika patsogolo pace pisatipfundzisa ntsonga yakufunika kakamwe. Panango imwe cipo munadzaenda kalonga na ntongi wankulu kakamwe. Mbwenye ndiye tani khala musaona kuti mphyakunentsa kulonga pya Mulungu na Umambo wace kuna anthu anagumanikana na imwe ntsiku na ntsiku. Khala ndi tenepo, onani kuti munapfundzanji kubulukira ku citsandzo ca Mose.

‘NINJI CINA IWE M’MANJA MWAKO?’

5. Kodi Yahova aikhanji m’manja mwa Mose, mphapo pyenepi pyamalisa tani kugopa kwace? (Onani cithundzithundzi cakutoma.)

⁵ Mudalonga Mose kuna Yahova kuti iye akhagopa kuti anthu nee mbadabvera mafalace, Mulungu ankhunganya toera kuthimbana na pikhafuna kuoneka ntsogolo. Bukhu ya Eksodo isalonga pyenepi: ‘Yahova ambvundza: ‘Ninji cina iwe m’manja mwako?’ Iye antawira: ‘Ndi mpswimbo.’ Mulungu ampanga mbati: ‘Iponye pantsi.’ Iye aiponya pantsi mbisanduka kudza nyoka; na kuiona, Mose athawa. Yahova ampanga mbati: ‘Thasika djanja yako mbuphata ncira wace.’ Mose athasika djanja yace mbaiphata, nyoka yasanduka pontho kudza mpswimbo m’manja mwace. ‘Unadzacita pinthu ipi pyonsene toera iwo atawire kuti Yahova Mulungu . . . aonekera kuna iwe.’’ (Eks. 4:2-5) Inde, Mulungu akhadaikha m’manja mwa Mose pidzindikiro pyakuti mbadakwanisa kupangiza napyo kuti mphangwa zace zabuluka kuna Yahova. Cinthu cikhaona anthu ninga ndodo pyayo, cadzakhala nyoka na mphambvu za Mulungu! Cirengo ceneci mbicidathimizira mphambvu ya mafala a Mose, na kupangiza kuti iye akhali na ciphedzo ca Yahova! Natenepa Yahova ampanga: ‘Kwata m’manja mwako mpswimbo, na iyo iwe unadzacita pirengo.’ (Eks. 4:17) Na cipangizo ceneci ca mphambvu ya Mulungu, Mose mbadakwanisa kuenda kutsogolo na cinyindiro toera kuimirira Mulungu wandimomwene kuna mbumba yace na kuna Farao.​—Eks. 4:29-31; 7:8-13.

6. (a) Ninji cisafunika kukhala m’manja mwathu pakumwaza mphangwa, thangwi yanji? (b) Fokotozani ndi munjira ipi “mafala a Mulungu ndi amaso na amphambvu.”

⁶ Mbvundzo ubodzi ene unakwanisa kucitwa kwa ife munaenda ife kamwaza mphangwa za Bhibhlya kuna anango: “Ninji ciri na imwe m’manja mwanu?” Kazinji kene, tisakhala na Bhibhlya m’manja toera kuiphatisira. Ngakhale kuti anango asaona Bhibhlya ninga bukhu basi, mbwenye Yahova asalonga na ife kubulukira m’Mafalace akupumirwa. (2 Ped. 1:21) Bhibhlya iri na mapikiro analonga pinthu pinafuna kudzacitika mu utongi wa Umambo wace. Na thangwi ineyi, mpostolo Paulu alemba: “Mafala a Mulungu ndi amaso na amphambvu.” (Lerini Ahebere 4:12, NM.) Mapikiro onsene a Yahova ndi amaso, na amphambvu, thangwi iye ndzidzi onsene akuphata basa toera kuakwanirisa. (Iza. 46:10; 55:11) Munthu angadzindikira mphambvu ya Mafala a Yahova, pinaleri iye m’Bhibhlya pinakwanisa kukhuya kakamwe umaso wace.

7. Tinakwanisa tani ‘kulonga mwadidi mafala a undimomwene’?

⁷ Inde Yahova aikha m’manja mwathu Mafalace amaso akuti tinakwanisa kupangiza nawo kuti mphangwa zathu zisabuluka kuna iye. Na thangwi ineyi, pidamala iye kulembera Ahebere, Paulu akulumiza nyakupfundza wace Timoti toera ‘kukhala waphinga na kulonga mwadidi mafala a undimomwene.’ (2 Tim. 2:15) Tinakwanisa tani kuphatisira uphungu wa Paulu? Mu kusankhula malemba akuti anakwanisa kukhuya ntima wa ale anafuna kutibvesera mbitialeri mwakugaluza. Matratado adabuluswa mu caka 2013 acitwa toera kutiphedza kucita pyenepi.

LERINI MALEMBA ADASANKHULWA MWACIDIKHODIKHO!

8. Kodi muyang’aniri m’bodzi wa basa ya m’munda alonganji thangwi ya matratado?

⁸ Matratado mapswa onsene alembwa munjira ibodzi ene. Mungapfundza kuphatisira tratado ibodzi, munadzakwanisa kuphatisira onsene, thangwi onsene alembwa mwakulandana. Thangwi yanji nkhabe nentsa kuaphatisira? Muyang’aniri m’bodzi wa basa ya m’munda ku Hawaii, Estados Unidos alemba: “Ife nee tikhadziwa kuti matratado anewa mbadakhala akuphindulisa kakamwe m’basa ya nyumba na nyumba na pakupereka umboni wapakweca.” Iye aona kuti njira idalemberwa matratado isacitisa anthu kutawira mibvundzo mwakusudzuka, kazinji kene pyenepi pisatsogolera ku makani akuwangisa. Iye asaona tenepo thangwi ya mbvundzo wakuti uli na matawiro toera kusankhula pa tsamba yakutoma ya matratado. Mwanaciro nyumba nee asafunika kudzudzumika kuti panango anapereka ntawiro wakuphonyeka.

9, 10. (a) Kodi matratado athu asatiphedza tani toera kuphatisira Bhibhlya? (b) Ndi tratado ipi idaphatisira imwe mwakuphindulisa kakamwe, thangwi yanji?

⁹ Tratado ibodzi na ibodzi isatiphedza toera kuleri lemba idasankhulwa mwadidi. Mwacitsandzo, onani tratado yakuti, Kodi Nyatwa Zinadzamala? Mwakukhonda tsalakana khala mwanaciro nyumba atawira kuti “inde,” “nkhabe,” peno “panango,” mwakukhonda thimizira mafala anango, fungulani tratado, mbamulonga: “Uyu ndi ntawiro wa Bhibhlya.” Buluka penepo, lerini Apokalipse 21:3, 4.

¹⁰ Munjira ibodzi ene, pakudinga tratado yakuti, Kodi Bhibhlya Musaiona Tani?, nkhabe funika kudzudzumika na ntawiro udasankhula mwanaciro nyumba pa tsamba yakutoma. Fungulani tratado mbamulonga: “Bhibhlya isalonga kuti ‘Malemba onsene mbakupumirwa na Mulungu.’” Munakwanisa kuthimizira: “Mwandimomwene, lemba ineyi isalonga pizinji.” Buluka penepo, fungulani Bhibhlya yanu mbamuleri 2 Timoti 3:16, 17.

11, 12. (a) Munaphatisira tani matratado munjira yakuti inacitisa utumiki wanu kukhala wakutsandzayisa? (b) Kodi matratado anakuphedzani tani toera kukhunganyika ulendo wakubwereza?

¹¹ Makhaliro a mwanaciro nyumba anapangiza khala mphyakuthema kudinga mphangwa zizinji za tratado. Munjira yonsene, kusiyapo kugawira tratado kuna mwanaciro nyumba, imwe munakomerwa thangwi mwakhala na mwai wakuleri Mafala a Mulungu kuna iye​—ngakhale kuti mwaleri lemba ibodzi peno mawiri paulendo wakutoma. Paulendo unango munakwanisa kupitiriza kucedza.

¹² Tsamba yakumalisa ya tratado ibodzi na ibodzi, iri na mbvundzo pantsi pa nsolo wakuti “Nyerezerani” na malemba toera kuaphatisira paulendo wakubwereza. Tratado yakuti, Ndi Api Maonero Anu Thangwi Ya Tsogolo?, mbvundzo toera kuudinga paulendo wakubwereza ndi wakuti: “Mulungu anadzacinja tani dziko yathu toera kukhala na makhaliro adidi kakamwe?” Malemba anapangizwa ndi Mateo 6:9, 10 na Danyele 2:44. “Thangwi yanji tisakalamba pontho mbatifa?” Unoyu ndi mbvundzo wakubwereza wa tratado yakuti, Anyakufa Anakwanisadi Khala Pontho Maso? Malemba anapangizwa ndi Genesi 3:17-19 na Aroma 5:12.

13. Fokotozani kuti tinaphatisira tani matratado toera kutomesa mapfundziro a Bhibhlya.

¹³ Phatisirani matratado toera kutomesa mapfundziro a Bhibhlya. Munthu angacita scan pa cidzindikiro ca QR pa tsamba yakumalisa ya tratado, iye anadzapita mu Web site yathu yakuti inamuwangisa toera kupfundza Bhibhlya. Matratado asapangizambo nsolo wakuthema wa bruxura Mphangwa Zadidi Za Mulungu! Mwacitsandzo, tratado yakuti, Mwandimomwene Mbani Akuonera Dziko?, isapangiza nsolo 5 wa bruxura ineyi. Tratado yakuti, Ninji Cinacitisa Banja Kukhala Yakutsandzaya?, isapangiza nsolo 9. Mungaphatisira matratado ninga munafunikira iwo, mukutowezera njira yadidi yakuphatisira Bhibhlya m’maulendo akutoma na akubwereza. Ninga maphindu, imwe munakwanisa kutomesa mapfundziro mazinji. Munacitanji pontho toera kuphatisira mwadidi Mafala a Mulungu mu utumiki wanu?

DINGANI NTSONGA ZINADZUDZUMISA ANTHU

14, 15. Munakwanisa tani kutowezera citsandzo ca Paulu mu utumiki wanu?

¹⁴ Paulu akhali na cifuno cikulu toera kubvesesa makhaliro a anthu azinji mu utumiki wace. (Lerini 1 Akorinto 9:19-23.) Onani, Paulu akhali na cidikhiro toera ‘kuwina Ayuda, ale ali pantsi pa mwambo, anthu akusowa mwambo, na anthu akufewa.’ Inde, iye akhafuna kulonga na “anthu onsene” toera kupulumusa anango. (Mach. 20:21) Tinakwanisa tani kusangizira citsandzo ca Paulu munakhunganyika ife toera kuenda kamwaza undimomwene kwa ‘anthu a mitundu yonsene’ mu utumiki wathu?​—1 Tim. 2:3, 4.

¹⁵ Maonero asaperekwa nthanda zonsene mu Utumiki Wathu Wa Umambo. Yeserani kuaphatisira. Mbwenye khala pana pinthu pinango pinadzudzumisa anthu mu cisa canu, citani mibvundzo yakuti inacitisa anthu kupangiza cifuno toera kudinga pinthu pyenepi. Nyerezerani makhaliro a cisa cinakhala imwe, makhaliro a anthu anagumanika mwenemu, na pinthu pinaadzudzumisa kakamwe. Buluka penepo, nyerezerani malemba analonga pya ntsonga zenezi. Muyang’aniri unango wa cisa na nkazace asagomezera kakamwe Bhibhlya, iye alonga: “Anaciro nyumba azinji asatitawirisa kuleri lemba ibodzi tingalongeratu ntsonga inafuna ife. Tingamala kuamwanyika, uku Mabhibhlya athu ali akufunguka m’manja, ife tisaleri lemba.” Tendeni tione pitsandzo pingasi pya ntsonga, mibvundzo, na malemba akuti munakwanisa kuaphatisira mu cisa canu.

16. Fokotozani kuti tinakwanisa tani kuphatisira Izaiya 14:7 mu utumiki.

¹⁶ Khala musakhala mu cisa cakuti ntendere usapingizwa na uphanga, munakwanisa kulonga: “Nyerezerani kuti uyu ndi nsolo wa tsamba ya mphangwa za lero: ‘Cincino, dziko yonsene yapantsi iri yakupfulika, nkhabebve pyakudzudzumisa. Anthu akukhuwa na kusekera’! Ndi pyenepi pinalonga Bhibhlya pa Izaiya 14:7. Mwandimomwene, Bhibhlya iri na mapikiro mazinji a Mulungu analonga pya midzidzi ya ntendere inafuna kudzaoneka ntsogolo mwathu.” Buluka penepo, lerini ibodzi mwa mapikiro anewa m’Bhibhlya.

17. Munakwanisa tani kuphatisira Mateo 5:3 pakucedza na munthu?

¹⁷ Kodi amuna azinji mu cisa cinakhala imwe asanentseka toera kutsalakana umaso wa mabanja awo? Khala ndi tenepo, munakwanisa kutomesa makani mu kuabvundza: “Kodi mamuna asafunika kuwina kobiri zingasi toera banja yace ikhale yakutsandzaya?” Angamala kutawira longani: “Amuna azinji asawina kobiri izinji kupiringana ineyi, mbwenye mabanja awo asapitiriza kukhala akukhonda tsandzaya. Mphapo ninji pinafunika toera kutsandzaya?” Lerini Mateo 5:3, NM mbamugawira pfundziro ya Bhibhlya.

18. Munakwanisa tani kuphatisira Yeremiya 29:11 toera kubalangaza anango?

¹⁸ Kodi anthu a mu cisa canu asathabuka thangwi ya cidengwa cidacitika cincino? Munakwanisa kutomesa makani mu kulonga kuti: “Ndabwera kudzakuonani toera kukubalangazani. (Lerini Yeremiya 29:11, NM.) Mwaona pinthu pitatu pinafuna Mulungu kwa ife? ‘Ntendere,’ ‘tsogolo,’ na ‘cidikhiro.’ Si pyakuwangisa tayu kudziwa kuti iye asafuna kuti tikhale na umaso wadidi? Kodi pyenepi pinakwanisika tani?” Dingani nsolo wakuthema wa bruxura Mphangwa Zadidi Za Mulungu!

19. Fokotozani kuti tinaphatisira tani Apokalipse 14:6, 7 toera kucedza na anthu auphemberi.

¹⁹ Musakhala mu cisa cakuti anthu asafuna pya uphemberi? Khala ndi tenepo, munakwanisa kutomesa makani mu kubvundza munthu: “Khala anju alonga na imwe, mbamudatoweza pidalonga iye? (Lerini Apokalipse 14:6, 7.) Nakuti anju unoyu akulonga kuti ‘Gopani Mulungu,’ si pyakuthema tayu kudziwa kuti ndi Mulungu upi analonga iye? Anju asapangiza Mulungu unoyu mudalonga iye kuti ndi ‘Uyu adacita thambo na pantsi pano.’ Mbani Mulungu unoyu?” Lerini Masalmo 124:8 inalonga kuti: ‘Ciphedzo cathu ciri mu dzina ya Yahova adacita pyakudzulu na pyapantsi.’ Citani masasanyiro toera kudinga pizinji thangwi ya Yahova Mulungu.

20. (a) Tinakwanisa tani kuphatisira lemba ya Misangani 30:4 toera kupfundzisa munthu dzina ya Mulungu? (b) Pana lemba inango inaphatisira imwe mwakuphindulisa?

²⁰ Munakwanisa kutomesa makani na mphale peno ntsikana mu kulonga kuti: “Ndisafuna kuleri lemba ibodzi yakuti iri na mbvundzo wakufunika kakamwe. (Lerini Misangani 30:4.) Nkhabe munthu anakwanisa kucita pyenepi, natenepa, lemba ineyi isalonga pya Nciti wathu.a Tinakwanisa tani kudziwa dzina yace? Ndinakomerwa kakamwe kukupangizani dzina ineyi m’Bhibhlya.”

PHATISIRANI MPHAMBVU YA MAFALA A MULUNGU MU UTUMIKI WANU

21, 22. (a) Kodi lemba yakusankhulwa mwadidi inakwanisa tani kucinja umaso wa munthu? (b) Muli wakutonga toera kucitanji mu utumiki wanu?

²¹ Imwe nkhabe dziwa kuti anthu anadzakhuiwa tani na lemba yakusankhulwa mwacidikhodikho. Mwacitsandzo, abale awiri ku Australya amenya nsuwo wa nkazi unango. M’bodzi wa iwo ambvundza: “Musadziwa dzina ya Mulungu?” Buluka penepo aleri lemba ya Masalmo 83:18. Nkazi unoyu alonga: “Ndadzumatirwa kakamwe! Pidaenda iwo, ine ndacita ulendo na motokala nsindzo wa makilometru akukwana 56 toera kuenda ku mbuto inaguliswa mabukhu, ndikhafuna kuona Mabhibhlya anango, na kusaka dzina ineyi mu disionaryo. Pidaona ine mbanditawira kuti dzina ya Mulungu ndi Yahova, ndanyerezera kakamwe khala pana cinthu cinango cakuti nee ndikhacidziwa.” Buluka penepo, mwakukhonda dembuka iye na mamunace atoma kupfundza Bhibhlya, mukupita kwa ndzidzi iwo abatizwa.

²² Mafala a Mulungu asacinja umaso wa ale anaaleri mbakulisa cikhulupiro ku mapikiro a Yahova. (Lerini 1 Atesalonika 2:13.) Mphangwa za Bhibhlya ndi zamphambvu kakamwe kupiringana cinthu consene cakuti tinakwanisa kucilonga toera kukhuya ntima wa munthu. Na thangwi ineyi, ndzidzi onsene unakhala ife na mwai, tisafunika kuphatisira Mafala a Mulungu. Iwo ndi amaso!

[Cidzindikiro capantsi]