NSOLO WA REVISTA | KODI MULUNGU ASAKUTSALAKANANI?

Mulungu Asakufendedzerani

“Nkhabe munthu anakwanisa kudza kuna ine angakhonda kunkwewa Babanga adandituma.”​—JWAU 6:44.

THANGWI YANJI ANANGO ASAPENULA: Anthu azinji anakhulupira Mulungu asanyerezera kuti iwo ali kutali kakamwe na iye. Christina, nkazi unango wa ku Irlanda wakuti akhaenda ku gereja masumana onsene alonga: “Ndikhamuona ninga Mulungu adacita pinthu pyonsene, mbwenye nee ndikhandziwa. Cipo ndabva kuti ndiri duzi na iye.”

MAFALA A MULUNGU ASAPFUNDZISANJI: Munabva ife ninga tatayika, Yahova nee asatisiya mwakucimbiza, mbwenye asapitiriza kuyesera kutiphedza. Yezu apangiza citsalakano ca Mulungu munjira iyi: “Munthu angakhala na mabira 100, ingatayika ibodzi, iye hanasiya tayu 99 pa mapiri, mbaenda kasaka ire idatayika?” Kodi iye akhafuna kupfundzisanji? ‘Tenepambo, Babanga wakudzulu hanafuna tayu kuti m’bodzi wa ana awa atayike.’​—Mateo 18:12-14.

M’bodzi na m’bodzi wa “ana awa” ndi akufunika kakamwe kuna Mulungu. Kodi Mulungu ‘asasaka tani ale adatayika’? Mwakubverana na lemba ya Jwau 6:44, Yahova asakwewera anthu kuna iye.

Onani kuti Mulungu asacitanji toera kukwewera kuna iye anthu a ntima wadidi. Mu pyaka dzana yakutoma N.W., Mulungu atuma nyakupfundza Wacikristu akhacemerwa Filipi toera kuenda kagumana na nkadamu wa ku Etiopya toera kunfokotozera mabvekero a profesiya ya Bhibhlya ikhaleri iye. (Machitiro 8:26-39) Mukupita kwa ndzidzi, Mulungu atuma mpostolo Pedhro toera kuenda kunyumba ya nkadamu Waciroma, akhacemerwa Kornelyo, wakuti akhacita maphembero mbawangisira toera kulambira Mulungu. (Machitiro 10:1-48) Mulungu atsogolerambo mpostolo Paulu na andzace toera kuenda ku nyandza kunja kwa nzinda wa Filipi. Kweneku, iwo agumana nkazi m’bodzi “wakugopa Mulungu” akhacemerwa Lidya, ‘Yahova afungula ntima wace mwakukwana toera kubvesesa.’​—Machitiro 16:9-15.

Kwa m’bodzi na m’bodzi, Yahova acita pyonsene toera ale akuti akhansaka, akhale na mwai wa kundziwa. Mbani lero anaenda kalonga na anthu m’manyumba mwawo, na m’mbuto zapakweca toera kumwaza mphangwa za Bhibhlya zinalonga thangwi ya Mulungu? Anthu azinji mbadatawira kuti ndi ‘Mboni za Yahova.’ Bvundzikani mwekhene: ‘Kodi pyenepi pisapangiza kuti Mulungu akuphatisira anthu anewa toera kundifendedzera?’ Tisakuwangisani toera mucite phembero kuna Mulungu kuti akuphedzeni toera mutawire kuwangisira kunacita iye toera kukufendedzeresani kuna iye.a

[Cidzindikiro capantsi]