Mboni za Yahova—Ndi Zakukhunganyika Toera Kumwaza Mphangwa Zadidi
Mu pyaka pyakupiringana 100, Mboni za Yahova ziri zakukhunganyika toera kumwaza mphangwa zadidi. M’basa ineyi ikulu kakamwe yakumwaza mphangwa yakuti ikhadzati kucitwa pa dziko yapantsi, ife tisazimwaza mphangwa zenezi mu pilongero pyakukwana madzana, pontho m’madziko akupiringana 230. (Mat. 24:14) Thangwi yanji basa ineyi ndi yakufunika? Kodi iyo isacitwa tani pa dziko yonsene yapantsi? Vidyu yakuti Testemunhas de Jeová—Organizadas para Pregar as Boas Novas isatawira mibvundzo ineyi mu kupereka unyomonyomo wakusiyana-siyana wa mabasa athu anacitwa pa dziko yonsene yapantsi. Mungamala kuona vidyu ineyi, tawirani mibvundzo inatowerera.
Vidyu ineyi yakuphedzani tani toera kubvesesa na kupereka takhuta thangwi ya (1) kuwangisira kunacita gulu ya Yahova toera kumwaza mphangwa zadidi? (2 Tim. 4:2) (2) mabanja a Beteli kuzungulira dziko yonsene yapantsi? (3) cipfundziso cinapaswa ayang’aniri na amisionaryo? (2 Tim. 2:2) (4) kufunika kwa kutoma ntsiku ibodzi na ibodzi na lemba ya Bhibhlya na kukhunganyika misonkhano ya mpingo ya sumana na sumana? (Mach. 17:11) (5) maphindu akugumanika kwathu pa misonkhano Yacikristu? (Aheb. 10:24, 25) (6) nkhombo zinafuna imwe kutambira dziko yapantsi ingadzakhala Paradizu? (Iza. 11:9) (7) mwai uli na imwe toera kucita khundu m’basa yakubvuna yakuti iri kuenda kutsogolo?—Jwau 4:35.
Vidyu ineyi isapangiza kukhala feramentu yadidi kakamwe toera kulonga na anthu anapangiza cifuno thangwi ya basa ya dziko yonsene yapantsi inacitwa na Mboni za Yahova. (8) Ndi ndzidzi upi wakuthema toera kupangiza vidyu ineyi anyakupfundza athu a Bhibhlya, acibale athu, na anthu anango? (9) Ndi api maonero a anthu pidamala imwe kuapangiza vidyu ineyi?
Munadinga ife pinthu pinakwanirisa Yahova, tisakulumizika kutawira mafala a nyamasalmo: “Mbuya Mulungu wathu, mwatichitira pyakudzumisa pizinji; nkhabe munthu wakulungama na Imwe pa kutisakira pyadidi.” (Sal. 40:5) Tiphatisireni mwadidi vidyu ineyi toera kuphedza anango kupereka takhuta kwa Yahova na gulu yace!