Tinaphedza Tani Ale Akuti Pakutoma Nee Anatawira Kupfundza Bukhu Biblya Isapfunzisanji
1. Kodi bukhu Biblya Isapfunzisanji inacitisa anthu onsene kukhala na cifuno paulendo wakutoma? Fokotozani.
1 Kuti munthu akhale mulambiri wa Yahova asafunika apfundze mwakukwana pinapfundzisa Bhibhlya. Mbwenye, anango nee ali mu uphemberi Wacikristu, pontho nee asaona Bhibhlya ninga Mafala a Mulungu. Anango nkhabe khulupira Mulungu, pontho nee asalemedza Bhibhlya. Ndi maferamentu api anakwanisa kuphedza mwakukwana ale akuti pakutoma nee ali na cifuno cakupfundza bukhu Biblya Isapfunzisanji? Maonero anatowerera ndi akubverana na a amwazi mphangwa a m’madziko 20 akusiyana-siyana.
2. Khala munthu atipanga kuti nkhabe khulupira Mulungu, tisafunika kuyesera kucitanji, na thangwi yanji?
2 Ale Akuti Nkhabe Khulupira Mulungu: Khala munthu asalonga kuti nkhabe khulupira Mulungu, mphyadidi kusaka kudziwa thangwi yanji. Ndi thangwi yakuti asakhulupira pya kusanduka kwa pinthu? Aluza cikhulupiro thangwi ya uipi uli n’dziko, peno umpfakafaka wa mauphemberi? Abuluka ku dziko yakuti kusakhondeswa kukhulupira Mulungu? Panango iye nee asakhonda kuti Mulungu alipo, mbwenye cipo aona kuti mphyakufunika Kunkhulupira. Amwazi mphangwa azinji asaona kuti kubvundzisa: “Kodi ndzidzi onsene musanyerezera tepo?” kusacitisa munthu kufokotoza maonero ace. Bveserani, pontho lekani kugwandira mafala. Tingabvesesa thangwi yanji iye nkhabe khulupira Mulungu, tinadzadziwa kuti tinatawira tani, pontho ndi bukhu ipi inafuna ife kugawira.—Mis. 18:13.
3. Tinakwanisa tani kupangiza cilemedzo kwa munthu, na pinakhulupira iye?
3 Pakutawira, calirani kucitisa munthu kubva kuti mukupwaza maonero ace. Maonero awa abuluka ku Estados Unidos: “Mphyakufunika kakamwe kulemedza ufulu wa munthu wakusankhula pinafuna iye kukhulupira. Mbuto mwakufuna kuwina pa makani, mphyadidi kucita mibvundzo yakuti inacitisa anthu kunyerezera mbafika pa kudzindikira okhene.” Pakumala kubvesera ntawiro wa mwanaciro nyumba, kazinji kene muyang’aniri wa cisa m’bodzi asatoma mafalace mu kubvundza: “Kodi mwatoma kale kudinga khala pyenepi pinakwanisika?”
4. Tinakwanisa tani kuphedza ale akuti ndi Abudista?
4 Fala yakuti Mulungu ndi yacilendo kwa Abudista azinji. Amwazi mphangwa anango ku Britanya asakomerwa kuphatisira bruxura, Como Ter Verdadeira Paz e Felicidade pakupereka umboni kwa anthu anewa. Pakumala kudinga mafala akutoma, iwo asadinga khundu yakuti “Existe realmente um Criador supremo?” Buluka penepo, asadinga khundu yakuti “Um guia prático para beneficiar toda a humanidade.” Pakumalisa, iwo asakwanisa kupangiza bukhu Biblya Isapfunzisanji na kupanga mwanaciro nyumba: “Ngakhale kuti imwe nkhabe khulupira Mulungu, kupfundza Bhibhlya ndi kwakuphindulisa thangwi iyo iri na citsogolero cakuphata basa.” M’bale wakuti ndi mpainiya ku Estados Unidos wakuti asatumikira mu cisa cinalongwa Cixina alonga: “Anthu azinji mu cisa cathu asakomerwa kuleri. Kazinji kene iwo asaleri bukhu yonsene mbatidzati kucita ulendo wakubwereza. Mbwenye iwo panango nee anabvesesa kuti pfundziro ya Bhibhlya ninji. Natenepa, ndisakomerwa kugawira bruxura Mphangwa Zadidi paulendo wakutoma thangwi iyo yalembwa mu njira yakuti isawangisa kucedza.” Muyang’aniri wa cisa anatumikira mu cisa cinalongwa Cixina mu Estados Unidos alonga kuti ndi pyakukwanisika kupangiza bukhu Biblya Isapfunzisanji paulendo wakutoma. Mbwenye mphyadidi kakamwe kutoma pfundziro pa nsolo 2, wakuti pa mafala akutoma usalonga pya Bhibhlya, mwakusiyana na nsolo 1, unalonga pya Mulungu.
5. Thangwi yanji kupirira ndi kwakufunika?
5 Pisaphemba ndzidzi toera munthu akulise cikhulupiro kwa Mulungu, natenepa, kupirira ndi kwakufunika. Kucedza kwathu m’maulendo akutoma, panango nee kunakulumiza munthu toera kutawira kuti Nciti alipo. Mbwenye mukupita kwa ndzidzi, iye anakwanisa kudzindikira kuti panango alipo, peno iye anakwanisa kulonga kuti asabvesesa thangwi yanji munthu anakwanisa kufika pa kutawira pyenepi.
6. Thangwi yanji anthu anango nkhabe pangiza cifuno ca m’Bhibhlya?
6 Ale Akuti Nkhabe Cifuno Peno Kunyindira Bhibhlya: Mbwenye kazinji kene, munthu wakuti asatawira kuti panango Mulungu alipo nee asapangiza cifuno ku pinapfundzisa Bhibhlya, thangwi iye nkhabe khulupira kuti iyo ndi Mafala a Mulungu. Panango iye asakhala mu cisa cakuti anthu nee ndi Acikristu, pontho asaona kuti Bhibhlya ndi ya Cikristu Caunthawatawa. Panango iye asakhala mu dziko yakuti anthu asalonga kuti ndi Akristu, mbwenye pyonsene pinacitwa mwenemu nkhabe bverana na Cikristu, panango iye asaona kuti Bhibhlya nee inadzamphedza. Tinaphedza tani anthu anewa toera kukulisa cifuno ca m’Bhibhlya, na kutawira kupfundza bukhu Biblya Isapfunzisanji?
7. Ndi njira ipi yadidi kakamwe toera kucitisa anthu kupangiza cifuno ca m’Bhibhlya?
7 Komiti ya Filiali ku Gresya yalemba: “Njira yadidi kakamwe toera kuphedza anthu akuti nkhabe cifuno ca m’Bhibhlya ndi kufungula Bhibhlya na kuapangiza pinalonga iyo. Amwazi mphangwa azinji asaona kuti mphangwa za Bhibhlya ndi za mphambvu kakamwe muntima mwa munthu kupiringana cinthu consene cakuti munthu paekha anakwanisa kucilonga. (Aheb. 4:12) Kuona dzina ya Mulungu m’Bhibhlya kusaphedza anthu azinji kukulisa cifuno toera kudinga Bhibhlya.” Komiti ya filiali ku Indiya yalemba: “Undimomwene unalonga pya umaso na kufa usatundusa kakamwe Aindu, mbwenye pikiro ya Bhibhlya inalonga pya dziko yakuti anthu nkhabe kudzasankhulana isatundusambo kakamwe.” Kazinji kene, kuphatisira nyatwa zinaoneka pacisa kusapasa mwai amwazi mphangwa toera kupangiza pinalonga Bhibhlya pyakuti Umambo wa Mulungu unadzacita toera kusasanyira pinthu.
8. Tinalonganji kwa ale akuti nkhabe lemedza Bhibhlya thangwi ya Cikristu Caunthawatawa?
8 Khala munthu nkhabe lemedza Bhibhlya thangwi ya Cikristu Caunthawatawa, mphedzeni kuona kuti Cikristu Caunthawatawa cisaphatisira mwakuipa Bhibhlya na pipfundziso pyayo. Komiti ya filiali ya ku Indiya yalemba: “M’midzidzi inango, tisafunika kuphedza anthu toera kuona kuti magereja nee ndi anaciro Bhibhlya.” Iwo alonga kuti kazinji kene Aindu asatunduka na nsolo 4 wa bruxura, Qual É o Objetivo da Vida? Como Encontrá-lo?, unafokotoza kuti magereja ayesera tani kuthathanya na kufudza Mafala a Mulungu. M’bale wakuti ndi mpainiya ku Brazil asabvundza anthu: “Thangwi yanji nkhabe saka kudziwa pizinji thangwi ya Bhibhlya? Anthu azinji asacita pyenepi na cifuno cadidi, mwakukhonda kakamizwa toera kupita mu uphemberi onsene. Munadzadzuma thangwi ya pinthu pinafuna kudzapfundza imwe.”
9. Thangwi yanji nee tisafunika kubwerera nduli khala pakutoma munthu nee asapangiza cifuno ku pipfundziso pya Bhibhlya?
9 Yahova asaona ntima wa m’bodzi na m’bodzi. (1 Sam. 16:7; Mis. 21:2) Iye asakwewera kuna iye ale akuti ali na makhaliro a ntima wadidi toera kupita mu uphemberi wandimomwene. (Jwau 6:44) Azinji mwa anthu anewa cipo akhadapfundziswa pya Mulungu, peno nee akhali na mwai wakudinga Bhibhlya kazinji kene. Utumiki wathu usaapasa mwai toera ‘kupulumuka, mbadziwambo mapfundzisiro adidi [peno cidziwiso candimomwene.]’ (1 Tim. 2:4) Mbwenye khala pakutoma anango nkhabe pangiza cifuno ku pipfundziso pya m’Bhibhlya, lekani kubwerera nduli! Phatisirani mabukhu anagumanika mu cilongero canu toera kukulisa cifuno cawo. Mukupita kwa ndzidzi, panango munadzakwanisa kucinja makani toera kuphatisira feramentu yathu yakutoma toera kucitisa pfundziro ya Bhibhlya, bukhu Kodi Mwandimomwene Biblya Isapfunzisanji?
[Cithundzithundzi pa tsamba 8]
Mwanaciro nyumba angalonga kuti nee asakhulupira Mulungu, yeserani ipi:
• Bvundzani, “Kodi ndzidzi onsene musanyerezera tepo?” toera kudziwa thangwi yanji.
• Khala iye ndi Budista, phatisirani bruxura, Como Ter Verdadeira Paz e Felicidade, matsamba 9-12.
• Khala asakhulupira pya kusanduka kwa pinthu, mphangwa za mabukhu awa zinaphedza kakamwe:
Misolo ya Despertai! yakuti, “Teve um Projeto?”
Vidyu yakuti, As Maravilhas da Criação Revelam a Glória de Deus.
Mabruxura, Como Ter uma Vida Satisfatória, nsolo 4; A Vida — Teve um Criador?; na A Origem da Vida — Cinco Perguntas Que Merecem Resposta.
• Khala iye nkhabe khulupirabve Mulungu thangwi ya uipi na nyatwa, mphangwa za mabukhu awa zinaphedza kakamwe:
Bukhu, Existe um Criador Que Se Importa com Você?
Mabruxura, Kodi Mulungu asatitsalakanadi?, khundu 6, na Qual É o Objetivo da Vida?, khundu 6.
• Mungaona kuti mwanaciro nyumba akupangiza maonero akutawira kuti panango Mulungu alipo, cinjani mwakucimbiza toera kuphatisira bukhu Biblya Isapfunzisanji. Mphyadidi kutoma na nsolo 2 peno nsolo unango wakuthema kwa iye.
[Cithundzithundzi pa tsamba 9]
Khala mwanaciro nyumba nkhabe khulupira Bhibhlya, yeserani ipi:
• Dingani nsolo 17 na 18 wa bukhu, A Vida Qual a Sua Origem? A Evolução ou a Criação?
• Kwa Aindu, phatisirani bruxura, Por Que Devemos Adorar a Deus com Amor e Verdade?
• Kwa Ayuda, phatisirani bruxura, Haverá Algum Dia um Mundo sem Guerra?
• Dingani maphindu akutowezera midida ya Bhibhlya. Munakwanisa kuphatisira mabukhu awa toera kupangiza munthu ntengo wakuphatisira Bhibhlya:
Misolo ya Despertai! yakui, “Ajuda para a Família”
Vidyu, A Bíblia: O Poder Dela na Sua Vida
Mabruxura, Mphangwa Zadidi Za Mulungu!, nsolo 9 na 11; Um Livro Para Todas as Pessoas, matsamba 22-26; na bruxura Como Ter uma Vida Satisfatória, khundu 2
Kwa Abuda, phatisirani bruxura O Caminho para a Paz e Felicidade, matsamba 3-7.
Kwa Mamusulumano, phatisirani bruxura Verdadeira Fé—O segredo de uma Vida Feliz, khundu 3.
Khala mukumwaza mphangwa mu cisa cakuti anthu nkhabe lemedza Bhibhlya, panango mphyadidi kukhonda kulonga pfuli ya mafala a cidziwiso cinagawira imwe mpaka kucita maulendo akubwereza mazinji.
• Fokotozani kuti maprofesiya a Bhibhlya asakwanirisaka tani. Munakwanisa kuphatisira mabukhu awa:
Vidyu, A Bíblia—História Exata, Profecias Confiáveis
Bruxura, Um Livro Para Todas as Pessoas, matsamba 27-29
• Cinjani mwakucimbiza toera kuphatisira bukhu Biblya Isapfunzisanji khala munthu asasaka kudziwa pinapfundzisa Bhibhlya m’makhundu akusiyana-siyana.
[Cithundzithundzi pa tsamba 10]
Mwanaciro nyumba angalonga: “Ine nkhabe khulupira Mulungu,” munakwanisa kulonga:
• “Ndikufokotozereni mwakucimbiza ninji cidandicitisa kukhulupira kuti Nsasanyi alipo?” Buluka penepo longani ntsonga za bukhu ya Raciocínios, matsamba 94-96, peno citani masasanyiro toera kumbweresera bukhu idakukomerani pa kuleri.
• “Mphapo, khala Mulungu alipo, mbamudafuna kuti akhale na makhaliro api?” Azinji asalonga kuti mbadakhuyiwa na Mulungu waufuni, wacilungamo, na wa ntsisi, wakuti nkhabe tsankhu. Mpangizeni m’Bhibhlya kuti Mulungu ali na makhaliro anewa. (Mphyakukwanisikambo kuphatisira nsolo 1 wa bukhu Biblya Isapfunzisanji, kutomera pa ndima 6.)
Mwanaciro nyumba angalonga: “Ine nkhabe kukhulupira Bhibhlya,” munakwanisa kulonga:
• “Pana anthu azinji akuti asanyerezera mu njira ineyi. Anango asanyerezera kuti Bhibhlya nkhabe bverana na siyensiya, peno kuti midida ya Bhibhlya nkhabe phata basa. Ndipangeni, mwaleri kale Bhibhlya? [Dikhirani ntawiro. Buluka penepo, pangizani mafala akutoma pa tsamba 3 ya bruxura, Um Livro Para Todas as Pessoas, na gawirani bruxura.] Anthu azinji asiya kukhulupira Bhibhlya thangwi mauphemberi asaphatisira mwakuipa pipfundziso pyayo. Paulendo unafuna kudza, ndisafuna kudinga citsandzo cibodzi cinagumanika pa tsamba 4 na 5.”
• “Anthu azinji ali na maonero mabodzi ene na anu. Ndikupangizeni cinthu cibodzi cinandikhuya kakamwe thangwi ya Bhibhlya? [Lerini Yobe 26:7 peno Izaiya 40:22, inapangiza kuti Bhibhlya ndi yakundendemera mwakubverana na siyensiya.] M’Bhibhlya musagumanikambo mafala adidi toera kuphedza mabanja. Paulendo unafuna kudza, ndisafuna kukupangizani citsandzo cibodzi.”
• “Takhuta thangwi yakundipanga pyenepi. Khala Mulungu alemba bukhu kwa anthu, musanyerezera kuti mbidakhala na mphangwa zanji?” Buluka penepo, mpangizeni m’Bhibhlya cinthu cinabverana na maonero ace.