NGAEBƆ MA BƐBƆ BAWA NHYIAMU NE

NHYIAMU TITIRE

BƐTƐL ADWUMA Adawurubɔfoɛ bɔ babɔ asu bɔ banya afoɛ 35, ne bɛbɔ bendwu sɔ bɔ bɛnye gye yenwo kyɛ bɛkɔyɛ adwuma wɔ Bɛtɛl ne yɛ bɛ nhyehyɛeɛ yé, na bahora bahɔ nhyiamu bɔ bɛkɔyɛ ye eyia bɛkɔma bɛ ne bie. Bɛkɔma nekaa ne mmerɛ deinn bɔ bɛkɔyɛ ye nanwo ngaebɔ.

SUKUU BƆ BƐYƐ BƐMA AHINNIE NZƐMBAKAFOƐ Akwampaefoɛ bɔ banya afoɛ 23 kodwu 65 bɔ bɛnye gye yenwo kyɛ bɛkɔyɛ pẽe wɔ soen adwuma nanu ne, bɛkɔhora bɛkɔwa nhyiamu bɔ bɛkɔyɛ kɔma bɛbɔ bɛpena yenwo atẽe bɛkɔ Ahennie Nzɛmbakafoɛ Sukuu Kwasida eyia ne bie. Bɛkɔma nekaa ne mmerɛ deinn bɔ bɛkɔyɛ ye nanwo ngaebɔ.

NGAEBƆ MA BƐBƆ BAWA NHYIAMU NE

ATTENDANTS Bɛbɔ bede ɛwɔfoɛ ne kɔboka wɔ. Akwangyerɛ biala bɔ bɛkɔfa kɔma wɔ fa nekaa bɔ ɛkɔfa wɔ káa kosie, nekaa bɔ mmenia fa, ɔne bia bɔ ɛkɔyakyi kɔto berɛ kɔma ebie ne, tie. Yɛsrɛ wɔ kyɛ, ɛne bɛ yɛ adwene wɔ nikyee foforɛ biala nwo.

ASUBƆ Bɛkɔyakyi bia wɔ anyunu berɛ bɛkɔma bɛbɔ bɛkɔbɔ asu ne, sana bahyire kyɛ bɛngɔyɛ ye sɔ. Odikyɛ asubɔfoɛ ne batena anyunu berɛ kora né asubɔ dwudwolɛ nahɔso ngyerɛmɔ he. Ebiala fa nzaserɛ ɔne ataadeɛ bɔ ɔfata ma asubɔ ne bra.

NDOBOA Yafa sikaa pẽe yayɛ nhyiamu he nwo ndotoeɛ maa yanya bia bɔ yɛkɔtena so, ngaen, vidio nwo nningyein ɔne nikyee foforɛ bɔ ɔkɔboka maa nhyiamu ne kɔyɛ anigye na yapingye Yehowa ɔ. Ndoboa bɔ ɛmɔfi ɛmɔ ahone nu bɛye ne yeɛ ɔboka maa yetua kerɛ bɔ yɛbɔ ne, na yɛfa bie koso yɛboka wiase mukuraati soen adwuma ne. Bɔ ɔkɔyɛ na waboka wɔ ne, bafa alaka bɔ bahyerɛ yenwo basiesie apata nabo. Yɛnye gye ndoboa biala bɔ ɛmɔkɔye nanwo. Akwangyerɛ Kue ne nye sɔ ɛmɔ pɛ nu bɔ ɛmɔfi bɛboka Ahinnie adwuma ne paa.

NEKAA BƆ BEDE AYIRE Yɛsrɛ wɔ, hyɛ ye nzorɛ kyɛ, BƆ WAFOKYƐ NE BƆ WAPIRA MBOFIRINU WƆ NHYIAMU NABO NE NGOME, yeɛ odikyɛ ɔkɔ berɛ ɔ.

NEKAA BƆ BƐFA NIKYEE BƆ WAMINI BƐKƆ Ɔ Nikyee biala bɔ wamini bɔ anwui ne, fakɔ sɔ nekaa ne. Sɛ wɔ nikyee bie mini a, kɔ berɛ na kohyire kyɛbɔ osi te ɔ. Bɛfá ngwalaa bɔ bennwu nekaa bɔ b’awofoɛ te ná bamini ne bɛhɔ berɛ. Nakoso, yɛhyɛ ye nzorɛ kyɛ bɛnnea ngwalaa wɔ berɛ. Yɛsrɛ kyɛ, ma wɔnye hɔ wɔmaa nemɔ nwo, na maa bɛtena wɔ nwo.

NEKAA BƆ ƐKƆTENA Yɛsrɛ wɔ, ɛyɛ a dwene afoforɛ nwo. Kae kyɛ, ɛkɔhora kɔyakyi bia kɔma w’abusuafoɛ, bɛbɔ ɛne bɛ tenane káa nu, bɛbɔ ɛne bɛ te awuro anaa wɔ Bible asuafoɛ ngome. Yɛsrɛ kyɛ, sɛ esielle bia manne ebie a, nnɛfa hwee to so.

ATUNWOAMA ADWUMA Sɛ ekuro kyɛ ɛkɔboka nhyiamu nabo adwuma ne a, yɛsrɛ kyɛ, kɔ bɛbɔ bɛnea amaneɛbɔ ne atunwoama adwuma naso ne nekaa berɛ.