Ngaebɔ Ma Bɛbɔ Bawa Nhyiamu Ne

ATƐNDANTFOƐ Atɛndantfoɛ nemɔ kɔboka wɔ. Bɛ yeɛ bekohyire wɔ nekaa bɔ ɛkɔtena, ɛkɔfa wɔ kar kosie, ɔne nekaa bɔ odikyɛ mmenia fa ɔ. Yeti yɛsrɛ wɔ, ɛyɛ a, tie bɛ.

ASUBƆ Bɛkɔyakyi bia wɔ anyunu berɛ bɛkɔma bɛbɔ bɛkɔbɔ asu ne, sana ebia bahyire kyɛ bɛtena nekaa foforɛ. Bɛbɔ bɛkɔbɔ asu ne, odikyɛ bɛbatena anyunu berɛ kora, né asubɔ dwudwolɛ ne ahyɛ yebo Fue ngyerɛmɔ ne. Odikyɛ bɛfa nzaserɛ bɛba, ná bewura ndaadeɛ bɔ ɔfata ɔ.

NDOBOA Bafa esikaa pẽe bayɛ nhyiamu he anwo nhyehyɛɛ kyɛbɔ ɔkɔyɛ a, yekonya bia bɔ yɛkɔtena so, ngaen bɔ bɛfa bɛbɔ dwein ne vidio, ɔne nningyein foforɛ bɔ ɔkɔboka maa nhyiamu ne kɔyɛ anigye, na wamaa yahora yahwẽ yapingyé Yehowa ɔ. Ndoboa bɔ efi wɔ ahõne nu ye ne boka maa, betua kerɛ bɔ bɛbɔ ne, na yɛfa bie koso yɛboka adwuma bɔ Yehowa Adanzefoɛ yɛ ye wɔ ewiase mukoraati ne. Bɔ ɔkɔyɛ né ahora aye ndoboa ne, bafa ndoboa alaka bɔ bahwerɔ yenwo basiesie nekaa biemɔ wɔ apata nabo. Ɛkɔhora koso kɔfa intanɛt so kɔye ndoboa wɔ donate.jw.org. Ndoboa biala bɔ efi wɔ ahõne nu ye fa boka Ahennie adwuma ne, Akwangyerɛ Kue ne nye gye yenwo paa.

NEKAA BƆ BEDÉ AYIRÉ Ɔ Ebie bɔ ɔkɔfokyɛ anaa okopira wɔ nhyiamu he abo ne ngome yeɛ odikyɛ ɔkɔ berɛ kodé ayiré ɔ.

NEKAA BƆ BƐPENA NIKYEE BƆ WAMINI Ɔ Nikyeebiala bɔ ɛkɔfa ye wɔ ase bɔ ɔtte wɔ deɛ ne, yɛsrɛ wɔ, fakɔ berɛ. Sɛ wɔ nikyee bie mini a, kɔ berɛ na kohyire kyɛbɔ osi te ɔ, na sɛ ɔwɔ berɛ a, bɛkɔfa bɛkɔma wɔ. Sɛ ɛte kyɛ akwalaa bie amini, na wɔnye pɛ yeso wɔ apata nabo a, fa ye kɔ berɛ. Nakoso sɛ ɛmaa wɔnye kɔ wɔ mmaamɔ nwo a, ɔkɔboka bɛbɔ bɛyɛ adwuma wɔ berɛ ne, na ɔngɔma bɛngɔfɛ pẽe.

NEKAA BƆ ƐKƆTENA Ɛkɔhora kɔyakyi bia kɔto berɛ kɔma w’abusũafoɛ, bɛbɔ ɛne bɛ tenane kar nu, bɛbɔ ɛne bɛ te awuro kõ anu, anaa wɔ Bible asũafoɛ. Yɛsrɛ kyɛ, bia bɔ sona biala ɔtte so ne, nnɛfa nikyeefee to so. Sɛ ɛyɛ sɔ a, okohyire kyɛ ɛdwene sona nwo.

ADWUMA BƆ BƐYƐ YE WƆ NHYIAMU NABO Ɛkɔhora kɔyɛ adwuma bɔ bɛyɛ ye wɔ nhyiamu nabo ne bie. Nakoso, odikyɛ edimoa bisa yenwo atẽe fi bɛbɔ bɛnea so ne berɛ.