Y’ABRABƆ KYƐ KRISTOFOƐ
Yehowa Boka Yɛ Maa Yegyina Yɛ Haw Ahoroɛ Noa
Wɔ sɔ ayieleɛ mmerɛ he anu ne, ɔhaw ahoroɛ bɔ ye noa yɛ se ngome yeɛ yeyia ɔ. Ɔtɔ mmerɛ bie a, yɛte ngã kyɛ ɔhaw ne noa yɛ se soma, na yɛngɔhora ngogyina ye noa. Nakoso, sɛ yɛkɔso yɛtwẽ yepingyé Yehowa a, ɔkɔboka yɛ maa yɛkɔhora yekogyina ɔhaw bɔ yenoa yɛ se paa po noa. (Aiz 43:2, 4) Yɛkɔyɛ sɛɛ né yahora yapingyé Yehowa, mmerɛ bɔ yeyia ɔhaw ahoroɛ ne?
Bɔ Mbaeɛ. Sɛ yefi y’ahõne nu yɛkã kyɛbɔ yɛte ngã nanwo dwirɛ yekyire Yehowa a, ɔkɔmaa yekonya asomdwee ɔne anwonserɛ bɔ yɛkɔfa yekogyina yɛ haw noa ɔ.—Flp 4:6, 7; 1Tɛ 5:17.
Kɔ Asafo Nhyiamu. Sɔ mmerɛ he paa yeɛ yehia Bible nu ngyerɛkyerɛ, ɔne aliemaamɔ fekue yɛtra mmerɛ biala, na ɛhẽne yeɛ Yehowa maa yɛ sa kã ye wɔ asafo nhyiamu ahoroɛ bo ɔ. (Heb 10:24, 25) Sɛ yesiesie yɛnwo kora né yahɔ asafo nhyiamu, na yɛyere yɛnwo kyɛ yɛkɔma mmuaeɛ a, ɔkɔboka yɛ maa yekonya Yehowa honhom krongron naso mvasoɛ.—Nye 2:29.
Kɔ Asɛnga. Sɛ yɛyɛ bɔ yɛkɔhora biala kyɛ, yɛkɔyɛ asɛnga adwuma ne a, ɔkɔboka yɛ maa yɛkɔfa y’adwene yekosie nningyein pá so. Mmerɛ bɔ yɛyɛ sɔ ne, yɛkɔhyɛ yɛne Yehowa ɔne yeliemaamɔ bɔ bɛte yɛ mangõ adwumayɛfoɛ ne, abusuabɔ nanu serɛ.—1Ko 3:5-10.
NEA VIDIO BƆ YEƐ OLE, YEHOWA NGƆYAKYI WƆ LLÉ, NA YE NZƐMMISA BƆ OLILI SO HEMƆ NOA:
Mmerɛ bɔ né Malu yia ɔhaw ne, nzu yeɛ ɔbokale ye maa ɔhora pingyɛle Yehowa ɔ?
Sɛɛ yeɛ edwirɛ bɔ ɔwɔ Edwein 34:18 maa yenya awerɛkyekyerɛ, mmerɛ bɔ yeyia ɔhaw ahoroɛ bɔ ɔtekyɛ Malu deɛ ne ɔ?
Sɛɛ yeɛ Malu suanwu ne maa yenwui kyɛ, Yehowa kɔma yɛ “tumi bɔ ɔbo sona deɛ so” mmerɛ bɔ yeyia ɔhaw ne?—2Ko 4:7