Y’ABRABƆ KYƐ KRISTOFOƐ

Bɛbɔ Bɛngɔ Asɔre Ne, Boka Bɛ Maa Benwu Yehowa

Sɛ yɛkɔ asɛnga a, ɛyɛ a yeyia mmenia bɔ bɛngɔ asɔre, ɔne bɛbɔ benné benni kyɛ Nyameɛ wɔ berɛ ɔ. Aso anya adwene le kyɛ sɔ mmenia nemɔ de, ɛkã nzɛmba ne kyire bɛ a benngotie anaa? Sɛ sɔ a, yede kae kyɛ bɛbɔ bɛngɔ asɔre, ɔne bɛbɔ benné benni kyɛ Nyameɛ wɔ berɛ ne, benu biemɔ asesã, na kesaalae bɛte Yehowa Adanzefoɛ. Nikyee kõ bɔ ɔboka paa yeɛ ole kyɛ, ɛkɔmaa bekonwu adanzeɛ bɔ okyire kyɛ Nyameɛ wɔ berɛ ɔ.—Rom 1:20; 10:14.

NEA VIDIO BƆ YEƐ OLE, KAE KYƐ—MMENIA BƆ BELLÉ GYIDIE NE KƆHORA KONYA GYIDIE! —BƐBƆ BENNÉ NYAMESOM BENNI Ɔ, NA YE NZƐMMISA HE NOA:

Tommaso dwirɛ ne maa yenwu kyɛ, bɛbɔ benné benni kyɛ Nyameɛ wɔ berɛ ne kɔhora kɔsesã, atẽe beni aso?

Tworɔ wɔ mmuayɛɛ ne wura wa

Ɛhe kɔhora kɔboka wɔ

Sɛ ebie kã kyɛ onné Nyameɛ nni a, nnɛfɛ yeso yaa, na mmom to wɔ boase tie ye. (2Ti 2:24) Afei pena edwirɛ bie bɔ yenye kɔgye yenwo ɔ, na ɛne ye besusu yenwo. Adanzeɛ bɔ ɔmaa mmeni pẽe bale bato nu kyɛ Nyameɛ yeɛ ɔbɔle nningyein ne, aso okuro kyɛ ɛne ye kosusu yenwo anaa? Sɛ sɔ a, yede nwomaa ne vidio ahoroɛ bɔ asafo ne ahyɛda ayɛ ama sɔ mmenia nemɔ ne, fa enu bie boka sona ne. Sɔ nwomaa ne bie yeɛ ole, Was Life Created? ɔne The Origin of Life—Five Questions Worth Asking. Bafa sɔ nwomaa ne bagua Nningyein Bɔ Yɛfa Yekyirekyire Wɔ Asɛnga nu berɛ, kyɛbɔ ɔkɔyɛ a sɛ ɛpena a ɛngɔfɛ ɔ.

Ɔyɛ se ma wɔ kyɛ ɛne bɛbɔ benné Nyameɛ benni ne kɔbɔ ngɔmmɔ anaa? Yede, bisa aliemaa bie bɔ yenwo akokwa má ɔboka wɔ. Kae kyɛ, bɛbɔ benné benni kyɛ Nyameɛ wɔ berɛ ne, benu biemɔ nye gye nahorɛ nanwo. Yeti, Yehowa kɔhora kɔboka yɛ maa yɛkɔhã nzɛmba ne bie yekohyire bɛ.—Aso 13:48.